Sɔlɔmɔn Edwɛne 2 - BAEBOLO ANZƐƐ BULUKU NWUANZANWUANZA

¹ Mele kɛ Hyɛlɔn wulosu ndotolo, mbɔnza nu aloa.

Nrenya ne

² Me kulovolɛ wɔ mbɛlɛra avinli a ɔle kɛ aloa ndotolo wɔ mbowule nu la.

Raalɛ ne

³ Saa me kulovolɛ gyi mgbavolɛ avinli a, ɔle kɛ ampolo baka gyi ɛbɔ nu mbaka avinli. Me nye die ye alubo ne anu ɛdɛnlanlɛ, yɛɛ ye ma ne yɛ me fɛ.

⁴ Ɔvale me ɔhɔle ye ɛkponledolɛ sua ne anu na ɔvale ye ɛhulolɛ fɛlɛnra ne ɔguale me nwo zo.

⁵ Maa me vanye ma welera maa ɔmaa me anwosesebɛ, na maa me ampolo maa ɔmaa me anwosesebɛ fofolɛ, ɔluakɛ ɛhulolɛ ngome ɛmaa me nwo ɛdo me.

⁶ O anrɛɛ yeamaa me ti ala ɔ sa bɛne ne azo, na yeava ɔ sa fema yeado me nwo zo.

⁷ O Gyɛlusalɛm mraalɛ, mese, bɛva weɛlɛ nee ahɛtɛboɛ anwondɛne ne mɔ bɛha ndane kɛ bɛnrɛpele ɛhulolɛ nwo, kɔkpula kɛ ɛhulolɛ ne mekɛ kpalɛ kɛdwu la.

Edwɛne mɔɔ tɔ zo nwiɔ Raalɛ ne

⁸ Mete me kulovolɛ ne ane! Ɔvi awoka ne mɔ azo ɔlɛnriandi, yeawuluwulu awoka mgbole nee ngyikyi zo yeara.

⁹ Me kulovolɛ ne le kɛ kɛtɛboɛ, ɔle kɛ weɛlɛ nyinli edonraa. Yemɔ a gyi yɛ bane ne anzi la, ɔlɛnea nvɛnzɛlɛ ne anu, ɔ nye gyi nvɛnzɛlɛ ne anzi neanleɛ ne anu.

Nrenya ne

¹⁰ Me kulovolɛ ne tendɛ se me kɛ: “Dwazo, me kulovolɛ, me kulovolɛ kɛnlɛmaleɛ, maa yɛhɔ.

¹¹ Ɔluakɛ ɛyɛlɛ mekɛ ne ɛze; ezule ne ɛwie tɔ.

¹² Ndotolo ɛkpakye ɛbɔ biala abo. Edwɛndolɛ mekɛ ɛdwu; bɛte abubule ne mɔ ɛzunlɛ wɔ avule ne mɔ anu.

¹³ Feege mbaka ɛbɔ ɔ bo ɛlɛso, vanye mbaka ɛbɔ ndotolo, bɛmaa maanle nu ɛbɔ evuanlɛ. Dwazo, me kulovolɛ, me kulovokpa, maa yɛhɔ.

¹⁴ Ɛle kɛ abubule mɔɔ vea bodane mɔɔ ɛkpuke la avinli. Maa menwu ɛ nyunlu kɛnlɛma ne, na mende ɛ ne fɛlɛko ne, ɔluakɛ ɛ ne yɛ fɛ, yɛɛ ɛ nyunlu le kɛnlɛma.

¹⁵ Bɛhye ɛzonlɛ ne mɔ bɛmaa yɛ, ɛzonlɛ ngyikyi ne mɔ, mɔɔ sɛkye vanye egyinli ne mɔ la, ɔluakɛ yɛ vanye egyinli ne mɔ ɛbɔ ndotolo.”

Raalɛ ne

¹⁶ Me kulovolɛ ne le me ɛdeɛ, yɛɛ mele ye ɛdeɛ, ɔfa ye nyɛmoa ɔkɔ adidi wɔ aloa avinli.

¹⁷ Sia ɛ nzi, me kulovokpa, maa ɛ nwo ɛyɛ ndɛ kɛ Bitɛ awoka zo kɛtɛboɛ anzɛɛ weɛlɛ, kolaa na mangyee ne azi, na maanle nu atete.