Sɛlɛ 9 - BAEBOLO ANZƐƐ BULUKU NWUANZANWUANZA

Aalɔn bɔ azu amaa Nyamenle

¹ Kenle mɔtwɛ ne azo, Mosisi vɛlɛle Aalɔn nee ɔ mra mrenya ne mɔ nee Yizilayɛ mgbanyima;

² na ɔzele Aalɔn kɛ, “Fa ɛnlankɛ nyinli edonraa ko yɛ ɛtane azubɔdeɛ na fa boane nyinli ko yɛ ɛyelalɛ azubɔdeɛ maa Ɛdɛnkɛma. Ɔnle kɛ nane nwiɔ ne biala anwo nyia dɛne.

³ Na ka kile Yizilayɛma kɛ, ‘Bɛva abɔnkye nyinli bɛyɛ ɛtane azubɔdeɛ; bɛva boane edonraa nee ɛnlankɛ edonraa mɔɔ bɛ nwo ɛnlɛ dɛne, na bɛli ɛvolɛ ngoko la bɛyɛ ɛyelalɛ azubɔdeɛ,

⁴ yɛɛ akee boane nyinli ko nee ɛnlankɛ nyinli kpole ko bɛyɛ anzonudwolɛ azubɔdeɛ, na bɛva ma azubɔdeɛ mɔɔ bɛva nwole bɛfɔtɔ la bɛboka nwo bɛbɔ azu bɛmaa Ɛdɛnkɛma. Ɔluakɛ ɛnɛ Ɛdɛnkɛma baye ɔ nwo ahile bɛ.’ ”

⁵ Na bɛvale ninyɛne mɔɔ Mosisi zele bɛ kɛ bɛsesa la bɛrale Ɛdɛnkɛma Ndanlɛ Sua ne anyunlu.

⁶ Na Mosisi zele kɛ, “Debie mɔɔ Ɛdɛnkɛma ɛze bɛ kɛ bɛyɛ la ɛne, na Ɛdɛnkɛma baye ye anyunlunyia ne ahile bɛ.”

⁷ Mosisi zele Aalɔn kɛ, “Kɔ azukponle ne anwo, fa wɔ ɛtane azubɔdeɛ ne nee wɔ ɛyelalɛ azubɔdeɛ ne mɔ kɔ, na bɔ mgbɔdalɛ nzɛlɛlɛ azu maa ɛ nwo nee menli ne, kɛmɔ Ɛdɛnkɛma ɛze wɔ la. Na fa menli ne mɔ azubɔdeɛ ne bɔ mgbɔdalɛ azu maa bɛ.”

⁸ Yemɔti Aalɔn hɔle azukponle ne anwo na ɔhunle ɔdaye ye ɛtane azubɔdeɛ ɛnlankɛ ne.

⁹ Ɔ mra mrenya ne mɔ vale mogya ne rɛlɛle ye, na ɔvale ɔ sa ɛrɛlɛsɛka ɔbɔle nu na ɔvale ɔpepenle azukponle ne abati kpokpɔkoo ne mɔ azo, na ɔwolale mogya ne mɔɔ hale la ɔguale azukponle ne abo ne anwo.

¹⁰ Ɔyelale nane ɛnlome ne, ye ɛzizira ne mɔ, ye ɛbolɛ nee nwolɛ ninyɛne ne mɔ wɔ azukponle ne azo kɛ ɛtane azubɔdeɛ, kɛmɔ Ɛdɛnkɛma zele Mosisi la.

¹¹ Azubɔdeɛ ne nane ne nee ye nwoma ne, ɔyelale bɛ wɔ azokoɛleɛ ne kandiba.

¹² Akee Aalɔn hunle ɛyelalɛ azubɔdeɛ ne; ɔ mra mrenya ne mɔ vale mogya ne hɔmanle ye, na ɔdole ɔguale azukponle ne anwo amuala ɔyiale.

¹³ Bɛvale ɛyelalɛ azubɔdeɛ ne azinli azinli ne mɔɔ bɛpepɛ la nee ɔ ti ne bɛrɛlɛle ye, na ɔyelale bɛ wɔ azukponle ne azo.

¹⁴ Akee ɔnrinzinle ɔ kunlu ne nee ye ndwɛlɛ ne mɔ anwo na ɔyelale bɛ ɔbokale ɛyelalɛ azubɔdeɛ ne anwo wɔ azukponle ne azo.

¹⁵ Akee Aalɔn vale menli ne azubɔdeɛ ne, ɔhunle abɔnkye ɛtane azubɔdeɛ ne, na ɔvale ɔbɔle azu wɔ menli ne ɛtane ti, kɛ mɔɔ ɔyɛle alumua ɛtane azubɔdeɛ ne la.

¹⁶ Eza ɔbɔle ɛyelalɛ azubɔdeɛ azu ne, kɛmɔ ngyehyɛlɛ ne kile la.

¹⁷ Ɔbɔle ma azubɔdeɛ azu ne na ɔyelale ye wɔ azukponle ne azo ɔbokale nwonlomɔ ɛyelalɛ azubɔdeɛ ne anwo.

¹⁸ Ɔhunle ɛnlankɛ nyinli ne nee boane nyinli ne ɔbɔle anzonudwolɛ azu ne ɔmanle menli ne. Aalɔn amra mrenya ne mɔ vale mogya ne rɛlɛle ye, na ɔdole ɔguale azukponle ne anwo amuala ɔyiale.

¹⁹ Ɛnlankɛ ne nee boane nyinli ne mɔ akunlu ɛnlome ne, boane ne adua dɔlera ne, ɛnlome ne mɔɔ wɔ bɛ kunlu ninyɛne ne mɔ anwo, bɛ ɛzizira ne mɔ nee ninyɛne mɔɔ wɔ bɛ ɛbolɛ ne mɔ anwo, mɔɔ bɛyeyele la,

²⁰ bɛvulale bɛ kɔsɔɔti bɛguale azubɔdeɛ ne mɔ akɛnra azo ne mɔ mɔɔ bɛdudule la azo bɛrɛlɛle ye, na Aalɔn yelale nane ɛnlome ne wɔ azukponle ne azo.

²¹ Na nane ne mɔ akɛnra azo ne mɔ nee bɛ ɛzɔlɛ fema ne mɔ mɔɔ bɛdudule la, Aalɔn dole bɛ ehono na ɔvale ɔbɔle ehono azu ɔmanle Ɛdɛnkɛma, kɛmɔ Mosisi zele la.

²² Akee Aalɔn manle ɔ sa zo wɔ menli ne anwo zo na ɔyilale bɛ, na ɔvi ɛleka mɔɔ ɔvale ɛtane azubɔdeɛ ne, ɛyelalɛ azubɔdeɛ ne nee anzonudwolɛ azubɔdeɛ ne mɔ ɔbɔle azu la ɔdwule aze.

²³ Na Mosisi nee Aalɔn hɔle Ɛdɛnkɛma Ndanlɛ Sua ne anu, na bɛvindele bɛrayilale menli ne, na Ɛdɛnkɛma manle menli ne kɔsɔɔti nwunle ye anyunlunyia ne.

²⁴ Na senle vi Ɛdɛnkɛma ɛkɛ ne rayelale ɛyelalɛ azubɔdeɛ ne nee nane ɛnlome ne mɔɔ wɔ azukponle ne azo la. Menli ne amuala nwunle ye la, bɛdeɛdeanle nuhua na bɛbutubutule bɛ nye aze.