Sɛlɛ 3 - BAEBOLO ANZƐƐ BULUKU NWUANZANWUANZA

Anzonudwolɛ azubɔdeɛ ne mɔ

¹ “Saa awie fa ɛnlankɛ nyinli anzɛɛ belɛ azubɔdeɛ arabɔ anzonudwolɛ azu a, ɔwɔ kɛ ɔfa ɛnlankɛ mɔɔ anwo ɛnlɛ dɛne la a ɔfinde Ɛdɛnkɛma anyunlu a.

² Ɔwɔ kɛ ɔfa ɔ sa ɔto nane ne ati zo, na ɔku ye wɔ Ɛdɛnkɛma Ndanlɛ Sua ne anyunlu. Aalɔn amra sɛlɛvolɛma ne bado ye mogya ne agua azukponle ne anwo amuala ayia.

³ Akee ɔyeye nane ne akunlu ne anwo ɛnlome kɔsɔɔti,

⁴ ye ɛzizira nwiɔ ne nee nwolɛ ɛnlome ne mɔɔ wɔ ɔ nze nu yɛɛ ye ɛbolɛ nwo ninyɛne kɔsɔɔti ɔvi ɛyelalɛ azubɔdeɛ ne mɔɔ bɛfa bɛamaa Ɛdɛnkɛma la anu.

⁵ Aalɔn amra mrenya ne mɔ bayela bɛ wɔ ɛyɛne ne mɔɔ wɔ azukponle ne azo la azo. Ɔle azubɔdeɛ mɔɔ bɛfa senle a bɛbɔ a, na ye evuanlɛ sɔ Ɛdɛnkɛma anye.

⁶ “Saa awie fa boane nyinli anzɛɛ belɛ azubɔdeɛ arabɔ anzonudwolɛ azu a, ɔwɔ kɛ ɔfa boane mɔɔ anwo ɛnlɛ dɛne la.

⁷ Saa ɔfa boane ralɛ a yeabɔ azu ne a, ɛnee ɔva ye ɔrɛla Ɛdɛnkɛma anyunlu,

⁸ ɔva ɔ sa ɔdo nane ne ati zo, ɔhu ye wɔ Ɛdɛnkɛma Ndanlɛ Sua ne anyunlu. Aalɔn amra sɛlɛvolɛma ne mɔ bado ye mogya ne agua azukponle ne anwo amuala ayia.

^9-10 Akee ɔyeye ɛyelalɛ azubɔdeɛ ne akunlu ɛnlome ne, ɔpɛ ɔ dua ne mɔɔ ɛlɔ mɔɔ kɔne ɔ nzi bowule ne azo la, ɔyeye ɛnlome mɔɔ wɔ nane ne akunlu ninyɛne ne mɔ anwo, ye ɛzizira nwiɔ ne nee nwolɛ ɛnlome ne mɔɔ wɔ ɔ nze nu la amuala, yɛɛ ye ɛbolɛ nwo ninyɛne kɔsɔɔti ɔvi ɛyelalɛ azubɔdeɛ ne mɔɔ bɛfa bɛamaa Ɛdɛnkɛma la anu.

¹¹ Sɛlɛvolɛ ne ɛyela bɛ wɔ azukponle ne azo kɛ aleɛ ɛyelalɛ azubɔdeɛ ɔmaa Ɛdɛnkɛma.

¹² “Saa ahenle ne azubɔdeɛ ne le abɔnkye a, ɔva ɔhɔ Ɛdɛnkɛma anyunlu

¹³ na ɔva ɔ sa ɔdo abɔnkye ne ati zo, na ɔhu ye wɔ Ɛdɛnkɛma Ndanlɛ Sua ne anyunlu. Aalɔn amra ne mɔ bado ye mogya ne agua azukponle ne anwo amuala ayia.

^14-15 Akee ɔyeye nane ne akunlu nee nwolɛ ɛnlome ne kɔsɔɔti, ye ɛzizira nwiɔ ne nee nwolɛ ɛnlome mɔɔ wɔ ɔ nze nu la, yɛɛ ye ɛbolɛ nwo ninyɛne ne mɔ amuala ɔvi ɛyelalɛ azubɔdeɛ ne mɔɔ bɛfa bɛamaa Ɛdɛnkɛma la anu.

¹⁶ Sɛlɛvolɛ ne ɛyela bɛ wɔ azukponle ne azo kɛ aleɛ ɛyelalɛ azubɔdeɛ mɔɔ bɔ evuanlɛ la. Nane ne ɛnlome ne amuala le Ɛdɛnkɛma ɛdeɛ.

¹⁷ Ɔwɔ kɛ ɛhye yɛ mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu, wɔ ɛleka biala mɔɔ bɛde la; ɔnle kɛ bɛdi nane ɛnlome anzɛɛ mogya.”