Sɛlɛ 22 - BAEBOLO ANZƐƐ BULUKU NWUANZANWUANZA

Azubɔdeɛ ne mɔ le nwuanzanwuanza

¹ Ɛdɛnkɛma zele Mosisi kɛ,

² “Ka kile Aalɔn nee ɔ mra mrenya ne mɔ kɛ bɛnlea ninyɛne nwuanzanwuanza ne mɔ mɔɔ Yizilayɛma ɛdu ɛzie ahane ɛmaa me la boɛ, amaa bɛanzɛkye me duma; medame a mele Ɛdɛnkɛma a.

³ Ka kile bɛ kɛ, wɔ awolɛndoazo kɔsɔɔti anu, saa evinli ka bɛ bo zo amra ne anu bie, na ɔzo ɔluolua ninyɛne nwuanzanwuanza ne mɔ mɔɔ Yizilayɛma ɛdu ɛzie ahane ɛmaa me la anwo a, bɛbaye sonla zɔhane bɛavi me nye zo. Medame a mele Ɛdɛnkɛma a.

⁴ “Aalɔn abo zo sonla biala mɔɔ le kokobɛvolɛ anzɛɛ anwo twihwi nzule la ɛnlɛ adenle ɛnli aleɛ nwuanzanwuanza ne mɔ bie, kyesɛ ɔ nwo ɛza na ɔ nwo ɛde. Eza awie mɔɔ kɛva ɔ sa kɛha funli anzɛɛ awie mɔɔ anla boɛ la, evinli ɛha ye.

⁵ Awie mɔɔ kɛva ɔ sa kɛha nane mɔɔ twenle ɔ nwo aze, anzɛɛ kɛva ɔ nwo kɛha awie mɔɔ evinli ɛha ye la, saa duzu a ɔyɛle o, saa duzu ewule a hanle ye o, ɔdaye noko evinli ɛha ye.

⁶ Awie biala mɔɔ evinli kɛha ye wɔ ndenle zɛhae mɔ bie anu la anwo ɛnrɛde toonwo aledwolɛ, yɛɛ ɔnle kɛ ɔdi aleɛ nwuanzanwuanza ne bie, kyesɛ ɔbia kolaa.

⁷ Saa sɛnzɛne ne tɔ a ɛnee bɔ zo mɔɔ ɔ nwo ɛde a; nzinlii akee ɔkola ɔdi aleɛ nwuanzanwuanza ne bie, ɔboalekɛ aleɛ mɔɔ ɔwɔ kɛ ɔdi la ala ɛne.

⁸ Debie mɔɔ ɔdaye ɔ ngome ɔkɛwu anzɛɛ nanemgbole bie kɛtete ye la, saa bɛfa bɛ sa bɛka ye a, ɛnee evinli ɛha bɛ Medame a mele Ɛdɛnkɛma a.

⁹ “Yemɔti bɛli me mɛla zo na anrɛɛ bɛkɛli ɛzonle na bɛkɛwu kɛ bɛvonle me mɛla ne a; medame a mele Ɛdɛnkɛma mɔɔ maa bɛ nwo te a.

¹⁰ “Ɔnle kɛ awie biala mɔɔ ɛmboka sɛlɛvolɛma abusua ekpunli ne anwo la di aleɛ nwuanzanwuanza ne bie. Sɛlɛvolɛ biala ɛyɛvolɛ mɔɔ ɔ nee ye de anzɛɛ ye sonvolɛ mɔɔ yebɔ ye ɛkpa la, ɔnle kɛ ɔdi aleɛ nwuanzanwuanza ne bie.

¹¹ Na saa sɛlɛvolɛ bie tɔ kanra a, ɔle ye agyadeɛ. Ɔkola ɔmaa ye kanranli ne di aleɛ nwuanzanwuanza ne bie, yɛɛ ngakula mɔɔ bɛkɛwo bɛ wɔ ye awuke ne anu la kola di bie.

¹² Saa bɛgya sɛlɛvolɛ bie ara raalɛ bɛkɔ abusua ekpunli gyɛne nu a, ɔnle kɛ ɔdi aleɛ nwuanzanwuanza ne mɔɔ bɛva bɛbɔ azu la bie.

¹³ Na saa sɛlɛvolɛ ne ara raalɛ ne le kunlanvolɛ anzɛɛ ɔ hu ɛbɔ ye ewole, na ɔnlɛ ralɛ, na yezia yera ɔ ze sua nu a, ɔle kɛ mɔɔ ye ngakula nu ɔde la; ɔkola ɔdi ɔ ze aleɛ ne bie Noko awie gyɛne ɛdeɛ, ɔngola ɔnli bie.

¹⁴ “Saa awie ɛnze na ɔdi aleɛ nwuanzanwuanza ne bie a, ɔwɔ kɛ ɔtua deɛ nwuanzanwuanza ne kakɛ ɔmaa sɛlɛvolɛ ne na eza ɔkyɛ deɛ ne bolɛ ne anu nnu, ɔtua ko ɔboka nwolɛ.

¹⁵ Ɔnle kɛ sɛlɛvolɛma ne maa evinli ka ninyɛne nwuanzanwuanza ne mɔ mɔɔ Yizilayɛma ɛva ɛra, ɛmaa bɛva bɛbɔ azu bɛmaa Ɛdɛnkɛma la.

¹⁶ Ɔwɔ kɛ bɛnea ninyɛne ne mɔ boɛ, amaa bɛanli ninyɛne nwuanzanwuanza ne mɔ bie, bɛandwe munzule nee fɔlɛlilɛ bɛammaa bɛ nwo; ɔluakɛ medame a mele Ɛdɛnkɛma mɔɔ mete bɛ nwo a.”

¹⁷ Ɛdɛnkɛma zele Mosisi kɛ,

¹⁸ “Ka kile Aalɔn nee ɔ mra ne mɔ nee Yizilayɛma kɛ: Saa Yizilayɛnli bie anzɛɛ nyɛvolɛ mɔɔ wɔ Yizilayɛ la bie fa ye ɛyelalɛ azubɔdeɛ ara Ɛdɛnkɛma anyunlu a, saa ɛwɔkɛyelɛ anzɛɛ ahunlunyele azubɔdeɛ, na ɔkulo kɛ ɔsɔ ɛnyelɛ a,

¹⁹ ɛnee ɔva ɛnlankɛ, anzɛɛ boane anzɛɛ abɔnkye nyinli mɔɔ anwo ɛnlɛ dɛne la.

²⁰ Ɔnle kɛ bɛfa debie biala mɔɔ anwo lɛ dɛne la, ɔluakɛ bɛyɛ ye zɔhane a Ɛdɛnkɛma ɛnrɛlie ɛnrɛdo nu.

²¹ Saa awie babɔ anzonudwolɛ azu yeamaa Ɛdɛnkɛma, kɛ ɔfa yeaye ye ɛwɔkɛ anzɛɛ ɔfa yeabɔ ahonle fufule nu azu, na ɔlɛ nane mɔɔ vi ye nlankɛ anzɛɛ ye nyɛmoa ne mɔ anu a, ɔwɔ kɛ nane ne di munli, mɔɔ ɔ nwo ɛnlɛ dɛne biala, amaa bɛalie ye bɛado nu.

²² Nane mɔɔ anye ɛzi, nane mɔɔ ɛbubu, nane mɔɔ anwo ɛdudu anzɛɛ nane mɔɔ anwo twihwi nzule anzɛɛ nane mɔɔ anwo ɛgua asa anzɛɛ ɛlɔ ngɛkɛba la, ɔnle kɛ bɛfa bɛbɛlɛ Ɛdɛnkɛma anzɛɛ bɛfa bie ɛleka biala bɛyela bɛbɔ azu wɔ azukponle ne azo bɛmaa Ɛdɛnkɛma.

²³ Ɛnlankɛ anzɛɛ boane mɔɔ ye foa ko ɛleka bie wale bo zolɛ anzɛɛ le ezinraa bo zolɛ la, bɛkola bɛfa bɛyɛ ahonle fufule nu ahyɛlɛ azubɔdeɛ, na saa bɛfa bɛaye ɛwɔkɛ a, yemɔ bɛnlie.

²⁴ Bɛmmafa nane biala mɔɔ bɛza ye anzɛɛ bɛbɔ ɔ ndɔma anzɛɛ bɛde ɔ ndɔma la bɛbɛlɛ Ɛdɛnkɛma, anzɛɛ bɛfa bɛbɔ azu wɔ bɛ azɛlɛ ne azo ɛleka biala.

²⁵ “Nane biala mɔɔ bɛkɛnyia ye bɛkɛvi ɛyɛvolɛ ɛkɛ ne la, bɛmmafa bɛyɛ aleɛ azubɔdeɛ bɛbɛlɛ me. Kɛmɔ bɛpepɛle bɛ na bɛahu bɛ la, bɛ nwo lɛ dɛne; bɛfa bɛba a menrɛlie.”

²⁶ Na Ɛdɛnkɛma zele Mosisi kɛ,

²⁷ “Saa ɛnlankɛ, boane anzɛɛ abɔnkye wo fofolɛ a, ɔwɔ kɛ ɔboa ɔ nli anwo ɛkɛ kenle nsuu. Ɔvi kenle mɔtwɛ ne azo mɔɔ kɔ la, saa bɛfa bɛbɔ ɛyelalɛ azu bɛmaa Ɛdɛnkɛma a ɔkɛlie.

²⁸ Saa nane ralɛ ne ɔ nli le ɛnlankɛ anzɛɛ boane a, ɔnle kɛ bɛku ralɛ ne nee ɔ nli kenle ko ne ala.

²⁹ Saa ɔba ye kɛ ɔwɔ kɛ bɛbɔ moyɛlɛ azu bɛmaa Ɛdɛnkɛma a, bɛyɛ ye zɔhane, amaa bɛalie bɛ bɛado nu.

³⁰ Ɔwɔ kɛ bɛdi azubɔdeɛ ne kenle ko ne ala. Ɔnle kɛ bɛgyakyi bie bɛmaa aleɛ kye zolɛ; medame a mele Ɛdɛnkɛma a.

³¹ “Yemɔti ɔwɔ kɛ bɛdi me mɛla ne mɔ azo; medame a mele Ɛdɛnkɛma a.

³² Ɔnle kɛ bɛsɛkye me duma. Ɔwɔ kɛ bɛmaa me duma ne anwo te wɔ bɛdabɛ Yizilayɛma bɛ avinli; medame a mele Ɛdɛnkɛma mɔɔ maa bɛ nwo te a.

³³ Medame a menyele bɛ menvile Yigyibiti azɛlɛ zo na merayɛ bɛ Nyamenle a; medame a mele Ɛdɛnkɛma a.”