Sɛlɛ 18 - BAEBOLO ANZƐƐ BULUKU NWUANZANWUANZA

Raalɛ nee nrenya ɛyɛlɛ mɔɔ Nyamenle tua la

¹ Ɛdɛnkɛma zele Mosisi kɛ,

² “Ka kile Yizilayɛma kɛ: Mame a mele Ɛdɛnkɛma bɛ Nyamenle ne a.

³ Ɔnle kɛ bɛyɛ nyɛleɛ ne mɔɔ Yigyibitima mɔɔ ɛnee bɛde bɛ avinli la yɛ la bie. Eza ɔnle kɛ bɛyɛ nyɛleɛ mɔɔ Keenama mɔɔ melɛfa bɛ meara bɛ avinli la yɛ la bie. Ɔnle kɛ bɛdi menli zɔhane amaamuo zo.

⁴ Ɔwɔ kɛ bɛdi me mɛla ne mɔ azo, na bɛsie me ngyehyɛlɛ ne mɔ, bɛdi zolɛ. Medame a mele Ɛdɛnkɛma bɛ Nyamenle ne a.

⁵ Yemɔti ɔwɔ kɛ bɛdi me mɛla nee me ngyehyɛlɛ ne mɔ azo Yemɔ yɛɛ saa bɛyɛ a, bɛkɛnyia ngoane a: Medame a mele Ɛdɛnkɛma a.

⁶ “Ɔnle kɛ bɛ nuhua biala nee ɔ nwo amra ne bie yɛ raalɛ nee nrenya. Medame a mele Ɛdɛnkɛma a.

⁷ Ɔnle kɛ awie fa ɔ nli na ɔgua ɔ ze anyunlu aze. Ɛ nli mɔɔ wole wɔ ɔ, ɔnle kɛ ɛgua ɔ nyunlu aze.

⁸ Ɔnle kɛ ɛfa ɛ ze aye biala. Ɛyɛ ye zɔhane a, wɔgua ɛ ze anyunlu aze.

⁹ Ɔnle kɛ ɛfa ɛ diema raalɛ mɔɔ ɛ nee ye bɛ ze nee bɛ nli ko, anzɛɛ asolo ɔ ze anzɛɛ ɔ nli la.

¹⁰ Ɔnle kɛ ɛfa ɛ ra nrenya ara raalɛ anzɛɛ ɛ ra raalɛ ara raalɛ. Ɔluakɛ bɛ anyiemgba le wɔ anyiemgba.

¹¹ Ɔnle kɛ ɛfa ɛ ze aye ara raalɛ, mɔɔ ɛ ze a ɛwo ye la; ɔle ɛ diema raalɛ.

¹² Ɔnle kɛ ɛfa ɛ ze adiema raalɛ; ɔle ɛ ze anwo sonla mɔɔ bikye ye a.

¹³ Ɔnle kɛ ɛfa ɛ nli adiema raalɛ; ɔle ɛ nli anwo sonla mɔɔ bikye ye a.

¹⁴ Ɔnle kɛ ɛfa ɛ ze adiema nrenya aye. Ɔle ɛ nli.

¹⁵ Ɔnle kɛ ɛfa ɛ ra nrenya aye; ɔle ɛ ra nrenya aye, ɔnle kɛ ɛbɔ ye anyiemgba.

¹⁶ Ɔnle kɛ ɛfa ɛ diema nrenya aye, ɛbɔ ɛ diema nrenya ne anyiemgba.

¹⁷ Ɔnle kɛ ɛfa raalɛ na eza ɛfa ɔ ra raalɛ; mmafa ɔ ra nrenya ara raalɛ anzɛɛ ɔ ra raalɛ ara raalɛ. Ɛyɛ ye zɔhane a, ɛnee wɔgua raalɛ ne anyunlu aze. Bɛ muala bɛle mraalɛ mɔɔ bikye wɔ a, ɛ nwo amra ɔ. Nyɛleɛ zɛhae le amumuyɛ ɛbɛla.

¹⁸ Eza ɔnle kɛ ɛfa ɛ ye adiema raalɛ ɛyɛ ɛ ye ahola wɔ mekɛ mɔɔ ɛ ye de ngoane nu la.

¹⁹ “Ɔnle kɛ ɛfa raalɛ mɔɔ wɔ ɛwazɛne nu la.

²⁰ Eza ɔnle kɛ ɛfa ɛ gɔnwo aye na ɛgua ɛ nwo evinli.

²¹ Ɔnle kɛ bɛtu bɛ mra ne mɔ anu biala bɛsie ahane bɛmaa kɛ bɛyela ye bɛbɔ azu bɛmaa bozonle Molɛke. Bɛyɛ ɛhye a, ɛnee bɛbɔ bɛ Nyamenle ne anyiemgba. Medame a mele Ɛdɛnkɛma a.

²² Ɔnle kɛ nrenya fa ɔ gɔnwo nrenya; ɔle munzule debie.

²³ Eza ɔnle kɛ bɛ nee nane biala da, bɛfa ye na bɛgua bɛ nwo evinli, yɛɛ ɔnle kɛ raalɛ biala maa adenle maa nane fa ye; ɔle ɛtane kpole.

²⁴ “Bɛmmayɛ ɛhye mɔ anu biala bie na bɛgua bɛ nwo evinli, ɔluakɛ zɔhane ninyɛne yɛɛ maanle maanle mɔɔ melɛtu bɛ wɔ azɛlɛ ne azo meava meamaa bɛ la yɛle vale zɛkyele bɛ nwo a.

²⁵ Bɛyɛle zɔhane bɛvale bɛzɛkyele azɛlɛ ne, amaa ɔlua zo mendeanle azɛlɛ ne, yɛɛ azɛlɛ ne ɛlɛtu menli mɔɔ de zolɛ la a.

²⁶ Na bɛmɛ, bɛli me mɛla ne nee me ngyehyɛlɛ ne mɔ azo, bɛdabɛ anzɛɛ bɛ nyɛvolɛ mɔɔ bɛ nee bɛ de la o, bɛ biala mmabɔ munzule ɛbɛla ɛhye mɔ bie.

²⁷ Ɔluakɛ zɛhae munzule ninyɛne yɛɛ menli mɔɔ de azɛlɛ ne azo la yɛle vale zɛkyele azɛlɛ ne a.

²⁸ Saa bɛyɛ bie a azɛlɛ ne bakpo bɛ, kɛmɔ ɔkpole maanle maanle mɔɔ lumuale dɛnlanle zolɛ la.

²⁹ Ɔluakɛ awie biala mɔɔ kɛbɔ munzule ɛbɛla ɛhye mɔ bie la, bɛkɛye ye bɛkɛvi Nyamenle menli ne avinli.

³⁰ Yemɔti bɛli me edwɛkɛ zo, na bɛmmayɛ nyɛleɛ ɛtane ne mɔ bie, na bɛbu munzule amaamuo ne mɔɔ menli mɔɔ lumuale azɛlɛ ne azo la bule la bie. Bɛmmayɛ ye zɔhane bɛgua bɛ nwo evinli. Medame a mele Ɛdɛnkɛma bɛ Nyamenle ne a.”