Sɛlɛ 17 - BAEBOLO ANZƐƐ BULUKU NWUANZANWUANZA

Mogya le ngoane

¹ Ɛdɛnkɛma zele Mosisi kɛ,

² “Ka kile Aalɔn nee ɔ mra mrenya ne mɔ nee Yizilayɛma amuala kɛ: Ngyehyɛlɛ mɔɔ Ɛdɛnkɛma ɛyɛ la ɛne.

³ Saa Yizilayɛnli biala ku ɛnlankɛ, boane anzɛɛ abɔnkye wɔ azokoɛleɛ ɛkɛ ne, anzɛɛ azokoɛleɛ ne kandiba lɔ,

⁴ na yeanva yeamba Ɛdɛnkɛma Ndanlɛ Sua ne anuhɔlɛ ne, yeambɔ azu yeammaa Ɛdɛnkɛma wɔ Ɛdɛnkɛma Ɛzonlenlɛ Sua ne anyunlu a, ɛnee yedo mɛla kɛ yeha mogya yegua. Sonla zɔhane, ɔwɔ kɛ bɛye ye bɛfi Nyamenle menli ne avinli.

⁵ Ɛhye kile kɛ ɔwɔ kɛ Yizilayɛma fa bɛ azubɔlɛ nane ne mɔ mɔɔ bɛku bɛ wɔ ɛleka gyɛne gyɛne la bɛlɛ Ɛdɛnkɛma. Ɔwɔ kɛ bɛfa bɛmaa sɛlɛvolɛ ne wɔ Ɛdɛnkɛma Ndanlɛ Sua ne anuhɔlɛ ne na bɛku bɛ kɛ anzonudwolɛ azubɔdeɛ bɛmaa Ɛdɛnkɛma.

⁶ Sɛlɛvolɛ ne bado ye mogya ne agua Ɛdɛnkɛma azukponle ne anwo ayia wɔ Ɛdɛnkɛma Ndanlɛ Sua ne anuhɔlɛ ne, na yeayela ye ɛnlome ne yeabɔ azu evuanlɛ yeamaa Ɛdɛnkɛma.

⁷ Zɔhane ati ɔnle kɛ awie biala ku nane bɔ azu maa mbɔnkye awozonle ne mɔ na bɛbɔ tuutuu ɛbɛla mgbane biala. Ɛhye bayɛ mɛla amaa bɛ mekɛ biala, wɔ bɛ awolɛndoazo muala anu.

⁸ “Eza ka kile bɛ kɛ: Yizilayɛnli biala, anzɛɛ ɛyɛvolɛ biala mɔɔ wɔ bɛ avinli mɔɔ kɛbɔ ɛyelalɛ azu anzɛɛ kɛbɔ azu ngakyile biala,

⁹ na yeanva yeamba Ɛdɛnkɛma Ndanlɛ Sua ne anuhɔlɛ ne, yeambambɔ azu ne yeammaa Ɛdɛnkɛma la, sonla zɔhane, bɛbaye ye bɛavi Nyamenle menli ne avinli.

¹⁰ “Saa Yizilayɛnli biala, anzɛɛ ɛyɛvolɛ biala mɔɔ wɔ bɛ avinli la di mogya a, mebahyi sonla zɔhane mɔɔ di mogya la, na meaye ye meavi ɔdaye ye menli avinli.

¹¹ Ɔluakɛ nwonane ne ngoane wɔ mogya ne anu, yɛɛ meva memaa kɛ bɛva bɛbɔ azu wɔ azukponle ne azo bɛyɛ mgbɔdalɛ nzɛlɛlɛ bɛmaa bɛ, ɔluakɛ mogya ne a maa mgbɔdalɛ ne di munli a, ɔboalekɛ ngoane wɔ nu.

¹² Yemɔti meha mehile Yizilayɛma kɛ, ‘Bɛ nuhua biala mmadi mogya, yɛɛ ɔnle kɛ ɛyɛvolɛ mɔɔ wɔ bɛ avinli la di mogya.’

¹³ “Eza ɔwɔ kɛ Yizilayɛnli biala anzɛɛ ɛyɛvolɛ biala mɔɔ wɔ bɛ avinli mɔɔ di ɛbɔlɛ ku nane nee nloma mɔɔ bɛdi la, twi mogya ne gua na ɔfe ɛnwea ɔkeda zolɛ.

¹⁴ Ɔluakɛ abɔdeɛ biala ngoane wɔ ye mogya ne anu. Yemɔti meka meahile Yizilayɛma kɛ, ‘Awie biala mmadi abɔdeɛ biala mogya. Ɔluakɛ nane biala ngoane a le ye mogya ne. Mɔɔ kɛli bie la bɛbaye ye bɛavi menli ne avinli.’

¹⁵ “Awie biala mɔɔ kɛli nane mɔɔ ɔdaye ɔ ngome yewu anzɛɛ nanemgbole bie ɛtete ye la, saa ɔle Yizilayɛnli o, ɔle ɛyɛvolɛ o, ɔwɔ kɛ ɔkpo ye adɛladeɛ ne mɔ na ɔbia, yɛɛ ɔ nwo ɛnrɛde toonwo nɔsolɛ, ɛnee bɔ zo mɔɔ ɔ nwo ɛde a.

¹⁶ Na saa yeamkpo ye adɛladeɛ ne mɔ, yeambia ɔ nwo a, ɔdaye ye ɛtane zo ye.”