Sɛlɛ 12 - BAEBOLO ANZƐƐ BULUKU NWUANZANWUANZA

Ɛwofoɔ ɛnluanlɛ

¹ Ɛdɛnkɛma zele Mosisi kɛ,

² “Ka kile Yizilayɛma kɛ, saa raalɛ fa ɛkolɛ na ɔwo ralɛ nrenya a, evinli baha ye kenle nsuu, kɛ asɛɛ ɔhɔle amozi la.

³ Kenle mɔtwɛ ne azo bɛbayɛ kakula ne mrenyanu nzonlɛ.

⁴ Akee raalɛ ne bahɔ zolɛ ahyi evinli ne kenle abulasa nee nsa yeavi ye ɛdane yeawie. Mekɛ ne anu, ɔnle kɛ ɔfa ɔ sa ɔka debie biala mɔɔ anwo te la, yɛɛ ɔnle kɛ ɔkɔ ɛleka nwuanzanwuanza ne, kɔkpula mekɛ ne mɔɔ ɔfa yeanlua ɔ nwo la.

⁵ “Saa raalɛ wo raalɛ a, evinli baha ye dapɛne nwiɔ kɛ sonla mɔɔ ɛhɔ amozi la, na yeahyi evinli ne kenle abulasia nee nsia na yeawie ye ɛdane fi.

⁶ “Saa raalɛ wo na ɔwie ɛdane ne mɔ fi a, saa ɔwole nrenya o, ɔwole raalɛ o, ɔwɔ kɛ ɔfa boane edonraa mɔɔ ɛli ɛvolɛ ko la ɔyɛ ɛyelalɛ azubɔdeɛ yɛɛ mɔlɔnoma ekyi ko anzɛɛ abubule ɔyɛ ɛtane azubɔdeɛ na ɔfa ɔbɛlɛ sɛlɛvolɛ ne wɔ Ɛdɛnkɛma Ndanlɛ Sua ne anuhɔlɛ ne.

⁷ Sɛlɛvolɛ ne bava ye azubɔdeɛ ne abɔ azu amaa Ɛdɛnkɛma, na yeayɛ ɔ ti mgbɔdalɛ nzɛlɛlɛ. Ɔyɛ ɛhye ɔwie a, ɛnee akee ɔ nwo ɛde ɛvi mogya ne mɔɔ dule ye la anwo. Awie mɔɔ kɛwo ralɛ nrenya anzɛɛ ralɛ raalɛ la mɛla a le ɛhye.

⁸ “Saa ɔnrɛhola boane fa a, ɛnee ɔwɔ kɛ ɔfa abubule nwiɔ anzɛɛ mɔlɔnoma ngyikyi nwiɔ; bɛfa ko bɛbɔ ɛyelalɛ azu bɛmaa ye na bɛfa ko ne noko bɛyɛ ɛtane azubɔdeɛ. Sɛlɛvolɛ ne bayɛ mgbɔdalɛ nzɛlɛlɛ amaa ye, na ɔ nwo ade.”