Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 6 - BAEBOLO ANZƐƐ BULUKU NWUANZANWUANZA

Menli mɔɔ ɛdu bɛ nwo ɛzie ɛkɛ ɛmaa Nyamenle la anwo ngyehyɛlɛ

¹ Ɛdɛnkɛma zele Mosisi kɛ

² ɔva ngyehyɛlɛ ɛhye mɔ ɔmaa Yizilayɛma. “Saa nrenya anzɛɛ raalɛ bɔ ɛwɔkɛ kɛ ɔtu ɔ nwo yeazie ɛkɛ yeamaa Ɛdɛnkɛma a,

³ ɔnle kɛ ɔno nwanye nee nza ɛsesebɛ biala. Ɔnle kɛ ɔno nzanvinli anzɛɛ nza biala mɔɔ bo la, anzɛɛ debie mɔɔ bɛva vanye ma nzule bɛyɛ la, yɛɛ ɔmmadi vanye ma amolɛ anzɛɛ welera.

⁴ Melɛ tendenle biala mɔɔ ɔkɛdu ɔ nwo ɔkɛmaa Ɛdɛnkɛma la, ɔmmadi debie biala mɔɔ bɛva vanye ma bɛyɛ la, ɔmmadi ye ma yɛɛ ye abonle mgbane bɔbɔ, ɔmmafufo bie anu.

⁵ “Melɛ tendenle biala mɔɔ ɔkɛdu ɔ nwo ɔkɛmaa Ɛdɛnkɛma la, ɔnle kɛ dadeɛ dɛma ka ɔ ti yɛɛ ɔmmakpa ɔ kɛsa. Sumunli kenle ala mɔɔ yedu ɔ nwo yezie ɛkɛ yemaa Ɛdɛnkɛma la, ɔwɔ kɛ ɔmaa ɔ nwo te, yemɔti ɔwɔ kɛ ɔsie ɔ ti enrinli buzuu.

^6-7 Ɔ ti enrinli ne a le sɛkɛlɛneɛ kɛ yedu ɔ nwo yemaa Nyamenle a, yemɔti ɔnle kɛ ɔbikye funli ɔmaa evinli ka ye. Saa ɔ ze, ɔ nli, ɔ diema nrenya anzɛɛ ɔ diema raalɛ bɔbɔ wu a, ɔnle kɛ ɔbikye nwolɛ.

⁸ Sumunli kenle ala mɔɔ yedu ɔ nwo yezie ɛkɛ yemaa Nyamenle la, ɔ nwo te maa Awulae.

⁹ “Saa arɛlevilɛ nu awie wu ɔ sa nu na evinli ka ɔ ti enrinli nwuanzanwuanza ne a, ɔhendɛ toonwo kenle nsuu ne mɔɔ ɔnua ɔ nwo la na ɔkpa ɔ ti nee ɔ kɛsa na ɔ nwo ade.

¹⁰ Kenle mɔtwɛ ne azo, ɔva abubule nwiɔ anzɛɛ mɔlɔnoma nwiɔ ɔrɛlɛ sɛlɛvolɛ ne wɔ Ɛdɛnkɛma Ndanlɛ Sua ne anlenkɛ ne anloa.

¹¹ Sɛlɛvolɛ ne bava ko ayɛ ɛtane azubɔdeɛ na yeava ko yeayɛ ɛyelalɛ azubɔdeɛ yeanlua ye, ɔboalekɛ ɔ nwo ɛha funli. Kenle ko ne ala, eza ɔbadu ye enrinli ne yeamaa Nyamenle

¹² na eza yeadu ɔ nwo yeazie ɛkɛ yeamaa Ɛdɛnkɛma bɔkɔɔ. Mekɛ dɛba ne mɔɔ ɔdule ɔ nwo ɔziele ɛkɛ ɔmanle Ɛdɛnkɛma la, bɛndia bɛmboka nwo, ɔboalekɛ evinli hanle ye enrinli nwuanzanwuanza ne. Ɔbava boane ralɛ nyinli mɔɔ ɛli ɛvolɛ ko la yeayɛ fɔlɛlilɛ azubɔdeɛ.

¹³ “Na saa mekɛ dodo mɔɔ ɔkɛdu ɔ nwo ɔkɛzie ɛkɛ ɔkɛmaa Nyamenle la wie a, ɛnee mɛla mɔɔ wɔ nwolɛ la ɛne. Ɔkɔ Ɛdɛnkɛma Ndanlɛ Sua ne anlenkɛ ne anloa,

¹⁴ ɔfa ahyɛlɛ ninyɛne ɛhye mɔ ɔmaa Ɛdɛnkɛma: boane ralɛ nyinli ko mɔɔ ɛli ɛvolɛ ko, mɔɔ anwo ɛnlɛ dɛne la bɛyɛ ɛyelalɛ azubɔdeɛ, boane ralɛ belɛ mɔɔ ɛli ɛvolɛ ko mɔɔ anwo ɛnlɛ dɛne la bɛyɛ ɛtane azubɔdeɛ, na bɛava boane nyinli kpole ko mɔɔ anwo ɛnlɛ dɛne la bɛayɛ anzonudwolɛ azubɔdeɛ.

¹⁵ Eza ɔfa kpanwo mɔɔ mgbɔvonle ɛnle nu, keeki mɔɔ bɛva esamo kɛnlɛma mɔɔ bɛva ɔlivi nwole bɛfɔtɔ la kɛndɛne ko, kpanwo ndɛbandɛba ngukulungukulu mɔɔ bɛva nwole kɛkpokpa zolɛ, yɛɛ nwolɛ ma nee nwanye azubɔdeɛ.

¹⁶ “Sɛlɛvolɛ ne tu ɛhye mɔ kɔsɔɔti maa Ɛdɛnkɛma na yeabɔ ɛtane nee ɛyelalɛ azu ne mɔ.

¹⁷ Ɔfa boane nyinli ne ɔboka kpanwo kɛndɛne ko ne anwo ɔyɛ anzonudwolɛ azubɔdeɛ. Eza ɔfa ma nee nwanye azubɔdeɛ ne mɔ ɔmaa Ɛdɛnkɛma.

¹⁸ Sonla ne mɔɔ ɛdu ɔ nwo ɛmaa Ɛdɛnkɛma la kpa ɔ ti wɔ Ndanlɛ Sua ne anlenkɛ ne anloa na ɔfa ɔgua senle ne mɔɔ anzonudwolɛ azubɔdeɛ ne gyi zolɛ la anu.

¹⁹ “Saa sonla mɔɔ ɛdu ɔ nwo ɛmaa Nyamenle la kpa ɔ ti nee ɔ kɛsa wie na ɔfa ye azubɔdeɛ ne ɔba a, sɛlɛvolɛ ne ye boane ne abɛsa ne na ɔye kpanwo ɛzamo ko nee ndɛbandɛba ne mɔ ko wɔ kɛndɛne ne anu ɔmaa sonla ne mɔɔ dule ɔ nwo ziele ɛkɛ manle Ɛdɛnkɛma la.

²⁰ Akee sɛlɛvolɛ ne to bɛ ehono maa Ɛdɛnkɛma kɛ ehono azubɔdeɛ. Bɛle azubɔdeɛ nwuanzanwuanza mɔɔ le sɛlɛvolɛ ne ɛdeɛ na bɛfa bɛboka boane nyinli ne akɛnrazo ne nee ye ndwɛlɛ ne mɔɔ le maamɛla kɛ sɛlɛvolɛ ne ɛdeɛ ɔ la anwo. Ɛhye wie a, sonla ne mɔɔ dule ɔ nwo ziele ɛkɛ manle Ɛdɛnkɛma la kola no nza.

²¹ “Ɛhye mɔ a le menli mɔɔ tu bɛ nwo sie ɛkɛ maa Ɛdɛnkɛma la ngyehyɛlɛ a, na saa awie tu ɔ nwo azie ɛkɛ amaa Ɛdɛnkɛma, na ɔbɔ ɛwɔkɛ bie, na mekɛ ne dwu a, ɔwɔ kɛ ɔye ɛwɔkɛ ne ɔboka ngyehyɛlɛ mɔɔ wɔ ɛkɛ ne la anwo.”

Sɛlɛvolɛ nyilalɛ ne

²² Ɛdɛnkɛma zele Mosisi kɛ,

²³ “Ka kile Aalɔn nee ɔ mra mrenya ne mɔ kɛ bɛva edwɛkɛ agbɔkɛ ɛhye mɔ bɛyila Yizilayɛma:

²⁴ Ɛdɛnkɛma ɛyila bɛ na ɔva bɛ ɔzie gyɛlɛɛnye;

²⁵ Ɛdɛnkɛma ɛyɛ atiakunlukɛnlɛma ɛmaa bɛ na ɔlo bɛ.

²⁶ Ɛdɛnkɛma ɛkpogya ɔ nye zo ɛnlea bɛ na ɔmaa bɛ anzonudwolɛ.”

²⁷ Na Ɛdɛnkɛma zele kɛ, “Saa bɛbɔ me duma bɛyila Yizilayɛma a, mebayila bɛ.”