Nolo 8 - BAEBOLO ANZƐƐ BULUKU NWUANZANWUANZA

¹ Nwane a le kɛ nrɛlɛbɛvolɛ ne a, yɛɛ nwane a ze ninyɛne bo kile a? Sonla nrɛlɛbɛ maa ɔ nyunlu yɛ gyakogyako na ɔ nyunlu ɛmunlanlɛ kakyi ɛzelekɛ.

Yɛ tieyɛ maa belemgbunli

² Di edwɛkɛ mɔɔ belemgbunli kɛha la azo, na mmamaa wɔ adwenle sɛkye kɛ wɔbɔ Nyamenle ɛwɔkɛ a.

³ Belemgbunli ne kola yɛ debie biala mɔɔ ɔdaye ɔkulo la, yemɔti saa edwɛkɛ mɔɔ ɛlɛba la ɛnle kpalɛ a fi ɔ nyunlu ɛkɛ ne kɔ.

⁴ Ɔluakɛ mɔɔ belemgbunli kɛha la le tumi, yɛɛ nwane bɔbɔ a kɛhola kɛze ye kɛ, “Na duzu a ɛlɛyɛ la?”

⁵ Awie biala mɔɔ di mɛla zo la anwo ɛnrɛbu ɛbonle, yɛɛ nrɛlɛbɛvolɛ ze mekɛ ne nee adenle mɔɔ ɔwɔ kɛ ɔdua nu ɔyɛ la.

⁶ Ɔluakɛ debie biala lɛ ye mekɛ nee ye adenle noko akee sonla ɔdaye ye munzule doa ye kpalɛ kpalɛ.

⁷ Awie biala ɛnze edwɛkɛ mɔɔ bazi la, ɔluakɛ awie biala ɛnle ɛkɛ mɔɔ ɔbaha kɛ ɔbazi yeazi la yeahile ye a.

⁸ Awie biala ɛnlɛ tumi mɔɔ ɔkola ɔmaa ye sunsum ne tɛnla ye nu dahuu, anzɛɛ awie biala ɛnle ɛkɛ mɔɔ lɛ tumi wɔ ye ewule mekɛ zo; ɔle konle mɔɔ bɛkɔ a bɛnzia a, yɛɛ amumuyɛ ɛyɛlɛ ɛnlie bɛdabɛ mɔɔ bɛyɛ amumuyɛ la ɛnvi nu.

Amumuyɛma nee tenlenema

⁹ Menwunle ɛhye mɔ amuala wɔ mekɛ mɔɔ ɛnee melɛdwenle ninyɛne mɔɔ bɛyɛ wɔ aleɛabo, mekɛ mɔɔ bie mɔ lɛ tumi ɛlɛsisi bie mɔ bɛamaa bɛanwu amaneɛ la anwo la.

¹⁰ Akee menwunle kɛ bɛzie amumuyɛma; ɛnee bɛdi ɛleka nwuanzanwuanza ne anu wolofinde, na menli kanvo bɛ wɔ suakpole ne azo, ɛleka mɔɔ bɛyɛle bɛ ninyɛndane ne mɔ la. Ɛhye noko le debie mgbane.

¹¹ Kɛmɔ bɛndua amumuyɛyɛlɛ nwo kakɛ ndɛndɛ la ati, menli fa sie bɛ nyunlu yɛ amumuyɛ dahuu.

¹² Ɛtanevolɛ yɛ ninyɛmunli fane ɛya na ye ngoane yɛ tendenle, noko meze kɛ ɔbayɛ boɛ yeamaa menli mɔɔ sulo Nyamenle la, ɔboalekɛ ɔ nyunlu, bɛsulo ye;

¹³ na amumuyɛma ɛdeɛ, ɔnrɛyɛ boɛ ɔnrɛmaa bɛ, yɛɛ bɛ ngoane ɛnrɛwa kɛ ɛlawolɛ, ɔboalekɛ bɛnzulo Nyamenle.

¹⁴ Debie mgbane bie kɔ zolɛ wɔ ewiade ye anu, tenlenema nyia amumuyɛma ndeanlɛ, yɛɛ amumuyɛma nyia tenlenema ahatualɛ. Na menganle kɛ ɛhye noko le debie mgbane.

¹⁵ Yemɔti menwu ye wienyi kɛ ɔwɔ kɛ sonla dielie ɔ nye, ɔboalekɛ ye fɛlɛkolilɛ mɔɔ ɔlɛ ye wɔ ye ɛbɛlabɔlɛ nu la a le kɛ ɔkɛli, ɔkɛnlo na ɔkɛlielie ɔ nye. Yeanyɛ boɛ bɔbɔ a, mekɛ mɔɔ Nyamenle ɛva ɛmaa ye wɔ ewiade, mɔɔ ɔlɛyɛ gyima la, ɔwɔ kɛ ɔdielie ɔ nye.

¹⁶ Mekɛ biala mɔɔ mendwenlenle nwolɛ kɛ mesukoa nrɛlɛbɛ, na meanwu mɔɔ ɛlɛsisi ewiade, mɔɔ yemɔti sonla si epe nɔɔzo nee ewiazo la,

¹⁷ menwunle kɛ sonla ɛnrɛde Nyamenle gyima mɔɔ ɛlɛdi wɔ ewiade la abo. Sonla babɔ mɔdenle kɛ duzu bɔbɔ ala a, ɔnrɛde ɔ bo ɛlɛ. Nrɛlɛbɛvolɛma baha kɛ bɛze, noko bɛnze.