Nolo 6 - BAEBOLO ANZƐƐ BULUKU NWUANZANWUANZA

¹ Menwu munzule bie wɔ aleɛabo, na ɔgyi menli nwo zo kpalɛ kpalɛ.

² Nyamenle maa sonla ne bie nyia anwonyia, agyadeɛ, yɛɛ enililɛ, nɔhalɛ, ɔlɛ debie biala mɔɔ ɔkpondɛ la, noko Nyamenle ɛmmaa ye tumi ɛmmaa ɔnlidi nwolɛ ɔnva ɔnlie ɔ nye. Ɛyɛvolɛ bie yɛɛ badi a. Ɛhye le debie mgbane; ɔmaa sonla edwɛkɛ yɛ nyane kpalɛ.

³ Saa sonla wo mralɛ ɛya ko, ɔnyi ɔdi ɛvolɛ dɔɔnwo, ɔyɛ kpanyinli kpalɛ na yeanlie ɔ nye wɔ ɛbɛla nu ninyɛne kpalɛ nwo, na ɔwu na ye ɛzielɛ nu anyɛ kɛnlɛma a, ɛnee ralɛ mɔɔ kɛkpɔne la tɛla ye ɛkpɔyɛɛ.

⁴ Ɔluakɛ yemɔ ɔba mgbane na ɔdua awozinli nu ɔkɔ, na awozinli ne keda ye duma zo.

⁵ Eza yemɔ yeannwu sɛnzɛne ne anzɛɛ debie biala, noko ɔnyia ɛnwomenlelielɛ ɔtɛla sonla ne mɔɔ kɛli ɛvolɛ dɔɔnwo la.

⁶ Saa sonla di ɛvolɛ apenle nwiɔ bɔbɔ na yeanli ɔ ti ɛlɛ a, bɛ muala bɛkɔ ɛleka ko.

⁷ Sonla ɛvɛlɛ kɔsɔɔti wie aleɛlilɛ ko ye ala, noko ɔ ti akunlu ɛnye aleɛ zo ɛlɛ.

⁸ Ɛnee duzu a nrɛlɛbɛvolɛ fa tɛla koasea a? Yɛɛ saa ehyianli nwu kɛ bɛsi bɛsɔ ɛbɛla sa la a, duzu a ɔnyia ye a?

⁹ Ɔle kpalɛ kɛ ɛ kunlu kɛdwo mɔɔ ɛlɛ la anwo tɛla kɛ dahuu ɛkɛbɔ mɔdenle kɛ ɛkpondɛ fofolɛ. Ɛhye noko le debie mgbane na ɔle kɛ ɛlɛkye anwoma.

¹⁰ Debie biala mɔɔ ɛzi la ɛnee bɛha bɛdo ɛkɛ dɛba, yɛɛ yɛ muala yɛze kɛ sonla si de la, bɛ nee sonla mɔɔ anwo yɛ se tɛla bɛ la ɛnli butule.

¹¹ Ɛdendɛlɛ dɔɔnwo maa bɛka mgbane mgbane, yɛɛ ɔmmaa sonla ɛbɛla ɛngakyi.

¹² Nwane a kɛhola kɛnwu debie mɔɔ le kpalɛ maa sonla wɔ ye ngoane mekɛ ezinraa ɛhye mɔɔ se waa kɛ ɛlawolɛ la anu a? Saa sonla wu a, kɛ ɔkɛyɛ na yeanwu mɔɔ bazi ɔ nzi wɔ aleɛabo la ɛ?