Nolo 4 - BAEBOLO ANZƐƐ BULUKU NWUANZANWUANZA

¹ Eza menwunle nzisi mɔɔ ɔlɛkɔ zolɛ wɔ aleɛabo la. Na nea, bɛdabɛ mɔɔ bɛlɛsisi bɛ la, monle ebia bɛ, yɛɛ bɛnlɛ awie ɛnkyekye bɛ rɛle. Menli mɔɔ ɛlɛsisi bɛ la lɛ tumi, yemɔti bɛnlɛ awie ɛnkyekye bɛ rɛle.

² Na mendwenlenle nwolɛ kɛ bɛdabɛ mɔɔ bɛwu la ɛli ye moavolɛ ɛdɛla bɛdabɛ mɔɔ bɛde ngoane nu la.

³ Na bɛdabɛ mɔɔ bɛnyia ye boɛ kpalɛ bɛdɛla mɔwuamra nee anyewɔzoamra la a le bɛdabɛ mɔɔ bɛtɛwole bɛ na bɛanwu munzule ɛbɛla mɔɔ bɛlɛbɔ ye aleɛabo la.

⁴ Akee menwunle kɛ ɛvɛlɛ muala nee sonla asa anloa gyima kɔsɔɔti gyi sonla agɔnwo anwo anyebolo zo. Ɛhye noko le mgbane; ɔle kɛ ɛlɛkye anwoma la.

⁵ Koasea yɛɛ fa ɔ sa sia ye ɛzɔlɛ avinli na ɔkye ɛhɔne a.

⁶ Ɔle kpalɛ kɛ ɛkɛnyia ekyi na ɛkɛnyia anzonudwolɛ tɛla kɛ ɛkɛva ɛ sa nwiɔ ɛkɛhu ɛ nwo ɛvɛlɛ na ɛkɛpele kɛ ɛkye anwoma.

⁷ Eza menwu kɛ debie bieko le mgbane wɔ aleɛabo.

⁸ Sonla ne bie ɛnlɛ ye awie, ɔnlɛ ralɛ, ɔnlɛ adiema nrenya, noko ye ɛvɛlɛ ɛnlɛ awieleɛ, ɔ kunlu ɛndwo ye anwonyia nwo, yɛɛ ɔmbiza ɔ nwo kɛ, “Na nwane ati bɔbɔ yɛɛ melɛku me nwo ɛvɛlɛ na mekpo anyelielɛ a?” Ɛhye noko le debie mgbane na ɔle gyima funli.

⁹ Menli nwiɔ le kpalɛ tɛla sonla ko, ɔboalekɛ bɛ mu nwiɔ bɛbɔ nu a bɛkola bɛyɛ gyima bɛnyia zolɛ nvasoɛ.

¹⁰ Ɔluakɛ saa ko tɔ aze a, ko ne badwazo ye. Na munzule ɛha mɔɔ le baholɛ la, ɔ ngome la ati saa ɔtɔ aze a, awie bieko ɛnle ɛkɛ mɔɔ ɔboa ye yeamaa yeadwazo a.

¹¹ Bieko, saa menli nwiɔ da a bɛ nwo yɛ wuluwulu, na kɛ ɔkɛyɛ na sonla ko ahola amaa ɔ nwo ayɛ wuluwulu ɛ?

¹² Saa awie teta menli nwiɔ a, bɛkɛhola bɛkɛgyinla bɛ gyakɛ anu bɛkɛdɛla sonla ko. Nyɛma bɔ nwolɛ nsa a nuhua ɛdelɛ ɛnla aze.

^13-14 Ehyianli kola fi ye ehyia ne anu ɔbadi belemgbunli wɔ ye maanle nu, anzɛɛ awie kola fi efiade nla badi belemgbunli. Na saa ye mgbanyinli nu ɔyɛ koasea mɔɔ ɔnde folɛ la a, ɛnee kpavolɛ ehyianli mɔɔ ze nrɛlɛbɛ la tɛla ye ɛkpɔyɛɛ.

¹⁵ Meneanle menli kɔsɔɔti mɔɔ wɔ aleɛabo la, na menwunle kɛ kpavolɛ egyegyebaa bie wɔ bɛ avinli mɔɔ bali belemgbunli a.

¹⁶ Menli ne zonle kpalɛ, yɛɛ ɔdaye a ɔsie bɛ muala a. Noko bɛdabɛ mɔɔ bɛrale amozi la, biala anye anlie ɔ nwo. Nɔhalɛ, ɛhye noko le debie mgbane. Ɔle kɛ ɛlɛkye anwoma la.