Nolo 3 - BAEBOLO ANZƐƐ BULUKU NWUANZANWUANZA

Debie biala lɛ ye mekɛ

¹ Debie biala lɛ ye ɛlobɔ, yɛɛ debie biala mɔɔ wɔ aleɛabo la lɛ ye mekɛ:

² mekɛ mɔɔ bɛwo sonla, yɛɛ mekɛ mɔɔ sonla wu; mekɛ mɔɔ bɛdua, yɛɛ mekɛ mɔɔ bɛbu mɔɔ bɛlua la;

³ mekɛ mɔɔ bɛku, yɛɛ mekɛ mɔɔ bɛyɛ ayile; mekɛ mɔɔ bɛbubu bɛgua aze, yɛɛ mekɛ mɔɔ bɛsi;

⁴ mekɛ mɔɔ bɛsu, yɛɛ mekɛ mɔɔ bɛsele; mekɛ mɔɔ bɛdi nyane, yɛɛ mekɛ mɔɔ bɛsi agole;

⁵ mekɛ mɔɔ bɛfuandi awolɛ bɛgua, yɛɛ mekɛ mɔɔ bɛkuohua awolɛ nloa; mekɛ mɔɔ bɛyɛ atuu, yɛɛ mekɛ mɔɔ bɛnyɛ atuu;

⁶ mekɛ mɔɔ bɛkpondɛ, yɛɛ mekɛ mɔɔ bɛminli debie; mekɛ mɔɔ bɛfa bɛsie, yɛɛ mekɛ mɔɔ bɛfuandi bɛto;

⁷ mekɛ mɔɔ bɛsuosua nu, yɛɛ mekɛ mɔɔ bɛkpomgba; mekɛ mɔɔ bɛyɛ koonwu, yɛɛ mekɛ mɔɔ bɛtendɛ;

⁸ mekɛ mɔɔ bɛkile ɛhulolɛ, yɛɛ mekɛ mɔɔ bɛkile ɛkpɔlɛ; mekɛ mɔɔ bɛkɔ konle, yɛɛ mekɛ mɔɔ anzonudwolɛ ba.

⁹ Duzu nvasoɛ yɛɛ gyimayɛvo nyia fi ye ɛvɛlɛ nu a?

¹⁰ Menwu gyima mɔɔ Nyamenle ɛva ɛmaa menli kɛ bɛyɛ la.

¹¹ Yeyɛ debie biala kɛnlɛma wɔ ye mekɛ nloa; eza yeva mɔɔ ɛnlɛ awieleɛ yewula sonla adwenle nu noko, amaa sonla annwu mɔɔ Nyamenle ɛyɛ, ɔvi mɔlebɛbo mɔɔ kɔ awieleɛ.

¹² Meze kɛ debie kpalɛ biala ɛnle ɛkɛ ɛmmaa bɛ tɛla kɛ bɛkɛli fɛlɛko na bɛkɛlie bɛ nye wɔ mekɛ mɔɔ bɛde ngoane nu la.

¹³ Eza ɔle Nyamenle ahyɛlɛdeɛ mɔɔ yeva yemaa sonla kɛ awie biala kɛli kɛnlo na ɔkɛlie ɔ nye wɔ ye ɛvɛlɛ nwo.

¹⁴ Meze kɛ debie biala mɔɔ Nyamenle yɛ la bawoa ɛkɛ dahuu; bɛnva bie bɛmboka nwolɛ, yɛɛ bɛnye bie bɛnvi nuhua. Nyamenle ɛyɛ ye zɔhane amaa menli azulo ye.

¹⁵ Mɔɔ wɔ ɛkɛ ne la wɔ ɛkɛ ne dɛbadɛba; mɔɔ bara la, ɛra ɛlɛ; yɛɛ Nyamenle kpondɛ mɔɔ ɛze ɛhɔ la abo zo.

Pɛlepɛlelilɛ ɛnle ewiade

¹⁶ Bieko, menwu ye wɔ aleɛabo kɛ ɛleka bɔbɔ mɔɔ pɛlepɛlelilɛ wɔ la, amumuyɛ wɔ ɛkɛ, yɛɛ ɛleka mɔɔ tenleneyɛlɛ wɔ la, ɛtaneyɛlɛ wɔ ɛkɛ.

¹⁷ Menganle ye me ahonle nu kɛ Nyamenle babua tenlenema nee amumuyɛma ndɛne, ɔluakɛ yehile debie biala nee gyima biala mekɛ.

¹⁸ Mɔɔ fane menli nwo la, menganle ye me ahonle nu kɛ Nyamenle ɛlɛsɔ bɛ anlea, ahile bɛ kɛ bɛle kɛ nane ala la.

¹⁹ Ɔluakɛ menli nee nane kɔsɔɔti awieleɛ le ko; sonla wu, kɛmɔ nane wu la. Bɛ muala bɛdie bɛ ɛnwomenle, sonla anwo ɛnlɛ nvasoɛ ɛndɛla nane, ɔluakɛ ɔ muala le mgbane.

²⁰ Bɛ muala bɛkɔ ɛleka ko, bɛ muala bɛvi ndɛtɛlɛ nu, yɛɛ bɛ muala bɛsia bɛkɔ ndɛtɛlɛ nu bieko.

²¹ Nwane a ze kɛ sonla sunsum kɔ anwuma na nane sunsum kɔ azɛlɛ bo a?

²² Yemɔti menwunle kɛ debie kpaziwɔkɛ biala ɛnle ɛkɛ tɛla kɛ sonla kɛdidi ye gyima nwo, ɔluakɛ ye afoa nu ɛdeɛ ne ala ɛne. Nwane a kɛhola kɛva ye kɛra kɛmaa ɔkɛnwu mɔɔ bazi ye ewule nzi la a?