Nolo 2 - BAEBOLO ANZƐƐ BULUKU NWUANZANWUANZA

¹ Menganle mengilele me nwo kɛ, “Medielie me nye meanlea kɛ fɛlɛkolilɛ si de la.” Na nea, ɛhye noko le debie mgbane.

² Menganle ye wɔ ɛzelekɛ nwo kɛ, “Ɔle ɛzɛlɛde” yɛɛ menganle ye wɔ anyelielɛ noko nwo kɛ, “Duzu nvasoɛ a wɔ zolɛ a?”

³ Memanle me nrɛlɛbɛ zinzale me na menvale me adwenle memkpondɛle adenle mɔɔ medua zolɛ meava nwanye mealielie me nye, na meazɔ ngoaseadeyɛlɛ nu kɔkpula kɛ menwɔnwu mɔɔ le kpalɛ maa menli, mɔɔ ɔwɔ kɛ bɛyɛ wɔ aleɛabo wɔ bɛ ngoane mekɛ ekyi ye anu la.

⁴ Menyɛle ninyɛne mgbole; mensisile azua na menzonle me ti anwo vanye egyinli.

⁵ Mengyele me ti anwo tola nee ma tola na menluale mbaka mɔɔ so ma ngakyile ngakyile la wɔ nu.

⁶ Membɔle nzule bula mɔɔ mesa nuhua nzule megugua mbaka mɔɔ menwɔlua la azo.

⁷ Mendɔle ahanra, mrenya nee mraalɛ, na menyianle ahanra mɔɔ bɛwole bɛ medame me awuke nu la. Eza menyianle nlankɛ nee nyɛmoa mendɛlale awie biala mɔɔ ɛdɛnla Gyɛlusalɛm ɛlɛ la.

⁸ Memboɔboale dwɛtɛ fufule nee ezukoa nvutuke yɛɛ arelemgbunli nee maanzinli maanzinli gyadeɛ nloa. Menyianle mrenya nee mraalɛ edwɛndolɛma, yɛɛ debie mɔɔ sonla nrenya anye die nwo la, mgbɔnla dɔɔnwo.

⁹ Yemɔti menyɛle sonlakpole mendɛlale menli mɔɔ li me nyunlu wɔ Gyɛlusalɛm la, yɛɛ me nrɛlɛbɛ ne ammaa meamkpo aze.

¹⁰ Debie biala mɔɔ mekpondɛle la, menyianle ye. Meambɔ me nwo abolɛ wɔ anyelielɛ nu. Debie biala mɔɔ menyɛle gyima menyianle ye la me nye liele nwolɛ. Ɛhye a le me ɛvɛlɛ nwo ahatualɛ a.

¹¹ Akee mendwenlenle mɔɔ meyɛ la amuala nee ɛvɛlɛ mɔɔ mevɛ bɛ ɛyɛlɛ nu la anwo, na menwunle kɛ ɛhye mɔ amuala le mgbane. Ɔle kɛ ɛlɛkye anwoma la. Debie biala anwo ɛnlɛ nvasoɛ wɔ aleɛabo.

¹² Yemɔti membɔle ɔ bo kɛ medwenle nrɛlɛbɛ, ɛzɛlɛde, yɛɛ ngoaseade nwo meade bɛ bo, ɔluakɛ duzu a sonla mɔɔ bali belemgbunli agya la kɛhola kɛyɛ a? Kyesɛ mɔɔ belemgbunli ne ɛyɛ ye dɛba la ala.

¹³ Akee menwunle kɛ nrɛlɛbɛ le kpalɛ tɛla ngoaseade, kɛmɔ wienyi le kpalɛ tɛla awozinli la.

¹⁴ Nrɛlɛbɛvolɛ anye gyi ɔ ti anwo, na koasea dua awozinli nu. Noko akee menwunle kɛ bɛ muala bɛ awieleɛ le ko.

¹⁵ Akee menganle mengilele me nwo kɛ, “Mɔɔ si koasea nwo zo la a bazi medame noko me nwo zo a. Duzu ati yɛɛ akee menwu nrɛlɛbɛ kpole zɛhae a?” Na menganle mengilele me nwo kɛ ɛhye noko le mgbane.

¹⁶ Ɔluakɛ nrɛlɛbɛvolɛ o, koasea o, bɛnrɛhakye biala dahuu. Mekɛ bara amaa bɛ rɛle avi bɛ bɔkɔɔ. Nrɛlɛbɛvolɛ wu yɛɛ koasea wu.

¹⁷ Yemɔti mengyile ɛbɛlabɔlɛ, ɔboalekɛ debie biala mɔɔ bɛyɛ ye aleɛabo la twe edwɛkɛ nyane maa me, ɔluakɛ ɔ muala le mgbane, yɛɛ ɔle kɛ ɛlɛkye anwoma la.

¹⁸ Mengyile me ɛvɛlɛ kɔsɔɔti mɔɔ mevɛ aleɛabo la, ɔluakɛ menwunle kɛ ɔwɔ kɛ megyakyi debie biala memaa me kɔliagya;

¹⁹ na nwane a ze a, saa ɔle nrɛlɛbɛvolɛ anzɛɛ ɔle koasea a? Noko akee ɔbahendehende debie biala mɔɔ meva me nrɛlɛbɛ mevɛ mekpondɛ la azo. Ɛhye noko le mgbane.

²⁰ Yemɔti menvule me nwo kɛ mevɛ ɛvɛlɛ kpole ɛhye wɔ aleɛabo a,

²¹ ɔboalekɛ ɔdwu mekɛ ne bie a, ɔwɔ kɛ sonla mɔɔ ɛva nrɛlɛbɛ, adwenle, nee ɔ sa anloa gyima ɛkpondɛ debie la gyakyi ɔ muala maa sonla mɔɔ anvɛ fee la maa ɔfa ɔyɛ ɔ nwo kutukɛtɛɛ. Ɛhye noko le mgbane yɛɛ ɔle munzule kpole.

²² Duzu nvasoɛ yɛɛ sonla nyia ye wɔ gyima ɛsesebɛ mɔɔ ɔyɛ nee ɛvɛlɛ mɔɔ ɔfɛ aleɛabo la azo a?

²³ Ɔluakɛ ye mekɛ kɔsɔɔti le nyanedelɛ ngome, yɛɛ ye gyimayɛlɛ nu le abodelɛ ngome. Nɔɔzo bɔbɔ ɔda a ye adwenle ɛnla. Ɛhye noko le mgbane.

²⁴ Debie kpalɛ biala ɛnle ɛkɛ ɛmmaa sonla ɛndɛla kɛ ɔkɛli na ɔkɛnlo, na ɔkɛlielie ɔ nye wɔ ye ɛvɛlɛ nwo. Menwunle kɛ ɛhye noko vi Nyamenle ɛkɛ,

²⁵ ɔluakɛ saa ɛkoati yemɔ a nwane a kɛnyia ye kɛli anzɛɛ kɛhola kɛlie ɔ nye a?

²⁶ Ɔluakɛ Nyamenle maa sonla ne mɔɔ sɔ ɔ nye la nrɛlɛbɛ, adwenle, yɛɛ anyelielɛ, na ɛtanevolɛ ne ɛdeɛ, ɔmaa ɔsesa ɔkuohua bɛ nloa ɔmaa mɔɔ sɔ Nyamenle anye la. Ɛhye noko le mgbane; ɔle kɛ ɛlɛkye anwoma la.