Edwɛkpa ne kɛmɔ Maake hɛlɛle la 8 - BAEBOLO ANZƐƐ BULUKU NWUANZANWUANZA

Gyisɛse maa menli apenle nna aleɛ

¹ Yeangyɛ biala yɛɛ menli dɔɔnwo bieko rayiale ɔ nwo ɛkɛ a. Bɛ aleɛ mɔɔ bɛdi la wiele la, Gyisɛse vɛlɛle ye ɛdoavolɛma ne mɔ na ɔzele bɛ kɛ,

² “Me kunlu yelɛyela me wɔ menli ɛhye mɔ anwo, ɔluakɛ bɛ nee me ɛradɛnla kenle nsa, yɛɛ bɛnlɛ debie biala mɔɔ bɛdi ye kɛkala a.

³ Saa meammaa bɛ debie bɛanli na mese bɛ kɛ bɛhɔ sua nu a, bɛ nye zo kɛbulu bɛ wɔ adenle nu, ɔluakɛ bie mɔ vi moa a ɛra a.”

⁴ Ye ɛdoavolɛma ne mɔ bizale ye kɛ, “Ɛnee nienwu, wɔ fienemgbole ye anu, yɛɛ yɛkɛnyia aleɛ mɔɔ kɛza menli ɛhye mɔ di a?”

⁵ Gyisɛse bizale bɛ kɛ, “Kpanwo nyɛ a bɛlɛ a?” Bɛbuale kɛ, “Kpanwo mumua nsuu.”

⁶ Gyisɛse manle menli ne dɛnlanle aze na ɔvale kpanwo nsuu ne, ɔyɛle Nyamenle mo, na ɔbubule nu ɔmanle ye ɛdoavolɛma ne mɔ kɛ bɛhyɛ bɛmaa menli ne, na bɛyɛle ye zɔhane.

⁷ Eza bɛlɛ fɛlɛ ekyi bie wɔ ɛkɛ ne. Gyisɛse vale na ɔyɛle Nyamenle mo, na ɔhanle ɔhilele ye ɛdoavolɛma ne mɔ kɛ bɛhyɛ bɛmaa menli ne.

^8-9 Awie biala lile bie manle ɔ ko yile, na menli ne, saa ɛye mraalɛ nee ngakula nu a, bɛlua menli kɛyɛ apenle nna. Ɛdoavolɛma ne wulowulale aleɛ ne abo zo ne ahɛndɛne tetɛkɛɛ nsuu. Na Gyisɛse gyakyile menli ne mɔ adenle,

¹⁰ na ndɛndɛ ne ala ɔ nee ye ɛdoavolɛma ne mɔ vole ɛlɛne nu hɔle Dalemanuta maanzinli nu.

Falasiima kpondɛ sɛkɛlɛneɛ

¹¹ Falasiima bie rale Gyisɛse ɛkɛ nee ye razule kpolera. Ɛnee bɛkpondɛ kɛ bɛsɔ ye bɛnea la ati, bɛzele ye kɛ ɔyɛ nwanwane sɛkɛlɛneɛ ɔmaa bɛnlea, ɔva ɔhile kɛ Nyamenle die mɔɔ ɔlɛyɛ la to nu.

¹² Gyisɛse gule ɛnwomenle na ɔbizale kɛ, “Duzu ati a bɛmɛ adwuleso amra bɛkpondɛ sɛkɛlɛneɛ ɛ? Nɔhalɛ, bɛnrɛyɛ sɛkɛlɛneɛ biala bɛnrɛhile bɛdabɛ menli ɛhye mɔ ɛlɛ!”

¹³ Na ɔgyakyile bɛ ɛkɛ ne ɔvale ɛlɛne ɔpɛle ɔhɔle tandane ne anzi lɔ.

Gyisɛse ka Hɛlɔdo nee Falasiima ngilehilelɛ ne anwo edwɛkɛ

¹⁴ Ɛdoavolɛma ne mɔ arɛle vile kɛ bɛkɛva aleɛ bɛkɛzia bɛ nwo, yemɔti kpanwo mumua ko ala a ɛnee wɔ bɛ bɔlɛ nu a.

¹⁵ Gyisɛse hakyele bɛ kɛ, “Bɛnlea bɛ nwo boɛ wɔ Falasiima mgbɔvonle ne nee Hɛlɔdo mgbɔvonle ne anwo.”

¹⁶ Bɛdwenledwenlenle nwolɛ kɛ, “Ɛnee kpanwo mɔɔ yɛnlɛ ye la ati a ɔlɛka ɛhye a?”

¹⁷ Gyisɛse nwunle mɔɔ bɛlɛkeha la na ɔbizale bɛ kɛ, “Duzu ati a bɛlɛdwenle kpanwo mɔɔ bɛnlɛ ye la anwo ɛ? Yemɔti bɛnze anzɛɛ bɛnde ɔ bo ɔ? Bɛ adwenle ɛnzo nu ɔ?

¹⁸ Bɛlɛ ɛnyelɛ, na bɛnnwu debie ɔ? Anzɛɛ bɛlɛ ɛnzonlɛ na bɛnde edwɛkɛ ɔ? Yemɔti bɛngakye?

¹⁹ Mekɛ mɔɔ membubule kpanwo nnu ne anu memanle menli apenle nnu ne la, ahɛndɛne nyɛ yɛɛ bɛsesale ɔ bo zo mgbokpoloka ne la bɛnyianle a?” Bɛbuale kɛ, “Bulu nee nwiɔ.”

²⁰ Eza Gyisɛse bizale bɛ kɛ, “Na membubule kpanwo nsuu ne memanle menli apenle nna ne noko la, ahɛndɛne nyɛ a ɔ bo zo mgbokpoloka ne yɛle a?” Bɛbuale kɛ, “Nsuu.”

²¹ Na ɔzele bɛ kɛ, “Yɛɛ akee ɛnɛ nee ɛnɛ ala bɛnnyia ndelebɛbo a?”

Gyisɛse yɛ anyenzinliravolɛ bie ayile wɔ Bɛteseeyeda

²² Gyisɛse nee ye ɛdoavolɛma ne rale Bɛteseeyeda na menli bie vale nrenya bie mɔɔ anye ɛzi la rɛlɛle ye na bɛbodole ye kɛ ɔyɛ ye ayile.

²³ Gyisɛse zɔle nrenya ne asa na ɔvale ye ɔhɔle namule ne kandiba. Ɔseanle nyɛlɛ ɔguale ɔ sa nu na ɔvale ɔhanle nrenya ne anye, ɔvale ɔ sa ɔguale ɔ nwo zo na akee ɔbizale ye kɛ, “Ɛnwu debie ɔ?”

²⁴ Nrenya ne manle ɔ nye zo na ɔhanle kɛ, “Ɛhɛe, menwu menli, na bɛle kɛ mbaka mɔɔ ɛlɛtiedia la.”

²⁵ Gyisɛse eza vale ɔ sa hanle nrenya ne anye na zolɛ dele kpalɛ na ɔnwunle debie bɔkɔɔ.

²⁶ Gyisɛse zele ye kɛ, “Kɔ sua nu, mmasia ɛ nzi ɛkɔ namule ne azo bieko.”

Pita se Gyisɛse le Mɛzaya

²⁷ Gyisɛse nee ye ɛdoavolɛma ne hɔle namunamu ne mɔ mɔɔ zuozua suakpole ne mɔɔ bɛfɛlɛ ye Felepe Sizalia la azo. Bɛlua adenle zo bɛlɛkɔ la ɔbizale bɛ kɛ, “Menli se mame a le nwane? Bɛha bɛhile me.”

²⁸ Bɛbuale ye kɛ, “Bie mɔ se wɔmɔ a ɛle Dwɔn Sɔnevolɛ ne; bie mɔ noko se wɔmɔ a ɛle Yilaegya, yɛɛ eza bie mɔ se ɛle Nyamenle kpɔmanvolɛma ne mɔ ko.”

²⁹ Na ɔbizale bɛ kɛ, “Na bɛdabɛ noko ɛ? Bɛse mame a le nwane?” Pita buale kɛ, “Wɔmɔ a ɛle Kelaese ne.”

³⁰ Na Gyisɛse bɔle bɛ nloa kɛ, “Bɛmmaka mɔɔ bɛha ye wɔ me nwo la bɛkile awie biala.”

Gyisɛse ka ye amaneɛnwunlɛ nee ye ewule nwo edwɛkɛ

³¹ Akee Gyisɛse bɔle ɔ bo kɛ ɔkilehile ye ɛdoavolɛma ne kɛ, “Ɔwɔ kɛ Medame Sonla Ra, menwu amaneɛ somaa na mgbanyima ne nee sɛlɛvolɛ mgbanyinli nee mɛla kilehilevolɛma ne mɔ kpo me. Bɛbahu me na kenle nsa ne anzi mebadwazo meara ngoane nu bieko.”

³² Ɔkpale ɛhye anwo ɛdanlɛ wienyi ɔhilele bɛ. Yemɔti Pita vale Gyisɛse hɔle ahane na ɔhwile ɔ nyunlu.

³³ Na Gyisɛse hakyile ɔ nwo na ɔnwunle ye ɛdoavolɛma ne mɔ la, ɔdeanle Pita ɔzele kɛ, “Seetan, twe ɛ nwo fi ɛkɛ ne. Ɛndu folɛ kpalɛ! Wɔ adwenle ne ɛnvi Nyamenle, ɔle sonla adwenle.”

³⁴ Akee Gyisɛse vɛlɛle menli dɔɔnwo ne nee ye ɛdoavolɛma ne wɔ ɔ nwo ɛkɛ ne na ɔzele bɛ kɛ, “Saa awie biala kpondɛ kɛ ɔ nee me dua a, ɛnee ɔkpo ɔ nwo na ɔva ye amaneɛnwunlɛ meanubaka ne ɔdo ɔ kɔme zo na ɔdoa me.

³⁵ Awie biala mɔɔ pele ye ngoane nwo la minli ye; na awie biala mɔɔ kɛminli ye ngoane wɔ mame nee Edwɛkpa ne ati la kɛlie ye ɛkɛla ngoane.

³⁶ Saa sonla nyia ewiade ninyɛne kɔsɔɔti na ɔminli ye ngoane a, ɛnee duzu nvasoɛ a ɔnyia a? Ɔnnyia ɛhwee.

³⁷ Na duzu bɔbɔ yɛɛ sonla kɛhola kɛva kɛzenza ye ɛkɛla a? Bɛhakye kɛ bɛ nee amumuyɛma mɔɔ ɛnlie me ɛnli la a de a.

³⁸ Yemɔti saa awie annea boɛ na ɔmaa me nwo nee me ngilehilelɛ ne yɛ ye nyiane wɔ ɛtane nee amumuyɛ mekɛ ye anu a, ɛnee noko ahenle ɛnwu ye kɛ, ɔdaye noko ɔ nwo bayɛ Medame Sonla Ra nyiane wɔ mekɛ mɔɔ me nee me anwuma soanvolɛma nwuanzanwuanza ne yɛkɛra Egya anyunlunyia ne anu la.”