Edwɛkpa ne kɛmɔ Maake hɛlɛle la 7 - BAEBOLO ANZƐƐ BULUKU NWUANZANWUANZA

Mɔmoane amra ngilehilelɛ ne

¹ Falasiima bie nee mɛla kilehilevolɛma mɔɔ vi Gyɛlusalɛm la rayiale Gyisɛse.

² Na bɛnwunle kɛ ye ɛdoavolɛma ne bie mɔ lɛ bɛ sa anwo evinli ɛlɛdi debie, yemɔ a le kɛ, bɛanrinzi bɛ sa anwo wɔ adenle mɔɔ Falasiima ne kile kɛ ɔwɔ kɛ bɛyɛ ye la anu. (

³ Falasiima nee Dwuuma mɔɔ ɛha la amuala di bɛ mɔmoane amra ngilehilelɛ ne azo la ati, bɛnli debie biala, kyesɛ bɛnrinzi bɛ sa anwo, kɛmɔ bɛ ngilehilelɛ ne se la.

⁴ Eza bɛnli debie biala mɔɔ vi gua nu la, kyesɛ bɛdumua bɛnrinzi nwolɛ, yɛɛ bɛlɛ ngilehilelɛ dɔɔnwo mɔɔ fane kɛ bɛsi bɛnrinzi ahɔpo, ahyɛnze yɛɛ kɔbele mbuakɛ nee mgba nwo la.)

⁵ Zɔhane ati Falasiima ne nee mɛla kilehilevolɛma ne mɔ bizale Gyisɛse kɛ, “Duzu ati a wɔ ɛdoavolɛma ne mɔ ɛnli ngilehilelɛ ne mɔɔ yɛ nlenya mɔ ɛva ɛgyakyi yɛ la azo na bɛfa bɛ sa anwo evinli bɛdi debie ɛ?”

⁶ Gyisɛse buale bɛ kɛ, “Ayezaya nwunle bɛ bɔkɔɔ yɛɛ ɔhanle a. Bɛle nabalabama kpalɛ kpalɛ, kɛmɔ ɔhɛlɛle ɔdole ɛkɛ ne la; ɔse, ‘Nyamenle se, Menli ɛhye mɔ fa bɛ nloa babonle mgbane a kanvo me a, na bɛ ahonle ɛdeɛ, ɔmbikye me.

⁷ Bɛsonle me mgbane, ɔluakɛ bɛkilehile mɔɔ menli ɛhyehyɛ la kɛ asɛɛ me mɛla ɔ!’

⁸ “Bɛmɛ, bɛva Nyamenle mɛla ne bɛzie ahane na bɛdi bɛ mɔmoane amra ngilehilelɛ ne mɔ azo.”

⁹ Gyisɛse vale zɔle zolɛ kɛ, “Bɛmɛ, bɛbɔ nrɛlɛbɛ adenle mɔɔ bɛfa zolɛ bɛtulu Nyamenle mɛla ne mɔ na bɛdi bɛdabɛ bɛ ngilehilelɛ zo a.

¹⁰ Mosisi hanle kɛ, ‘Di ɛ ze nee ɛ nli eni’, na ‘Awie biala mɔɔ kɛyɛ ɔ ze anzɛɛ ɔ nli aholoba la, bɛhu ye.’

¹¹ Na bɛmɛ, bɛkilehile kɛ saa awie lɛ debie mɔɔ ɔkola ɔfa ɔnea ɔ ze anzɛɛ ɔ nli a ɔyɛ boɛ la na saa ɔka kɛ, ‘Ɛhye le Kɔban’ a, (ɔ bo a le, ‘Ɔle Nyamenle ɛdeɛ’)

¹² ɛnee bɛmɛ bɛlie bɛdo nu kɛ moalɛ mɔɔ ɔwɔ kɛ ɔfa ɔboa ɔ ze nee ɔ nli la ɛwie.

¹³ Bɛlua zɛhae adenle zo bɛva bɛ ngilehilelɛ mɔɔ le zɛhae la bɛtia Nyamenle Edwɛkɛ ne azo; yɛɛ ninyɛne dɔɔnwo mɔɔ le kɛ ɛhye mɔ la angome a bɛyɛ a.”

Ninyɛne mɔɔ gua sonla nwo evinli la

¹⁴ Gyisɛse akee vɛlɛle menli dɔɔnwo ne wɔ ɔ nwo ɛkɛ ne bieko na ɔzele bɛ kɛ, “Bɛ muala bɛdie mɔɔ meka la na bɛde ɔ bo kɛ,

¹⁵ debie biala ɛnle ɛkɛ mɔɔ kɔ sonla kunlu a ɔgua ɔ nwo evinli a, na mɔɔ vi sonla kunlu finde la a gua ɔ nwo evinli a. [

¹⁶ Bɛdabɛ mɔɔ bɛlɛ ɛnzonlɛ la, bɛdie!”]

¹⁷ Nzinlii mɔɔ ɔvile menli ne anu ɔhɔle sua nu la, ye ɛdoavolɛma ne bizale ye mɔɔ ɔhanle la abo.

¹⁸ Gyisɛse bizale bɛ kɛ, “Yemɔti bɛdabɛ noko bɛnde ɛhye abo? Debie biala mɔɔ wɔ findezo na ɔkɛhɔ sonla kunlu la ɛngua ɔ nwo evinli,

¹⁹ ɔluakɛ ɔngɔ ye ahonle nu na ɔkɔgua ɔ kunlu na ɔfa ye aze ɔse.” (Ɛhye mɔɔ Gyisɛse hanle la kile kɛ aleɛ biala bɛdi.)

²⁰ Na ɔzɔle zolɛ ɔzele kɛ, “Mɔɔ vi sonla kunlu finde la a gua ɔ nwo evinli a.

²¹ Ɔluakɛ wɔ sonla kunlu, bɔbɔ wɔ ye ahonle nu yɛɛ adwenle ɛtane vi finde na ɔmaa ɔbɔ adwɔmane, ɔwua, ɔyɛ kɔdiawu,

²² ɔfa nwuvolɛ, ɔyɛ anyebolo, ɔyɛ amumuyɛ, ɔbɔ adalɛ, ɔyɛ ahulomrenya anzɛɛ ahulomraalɛ, ɔdi nzisi, ɔyɛ ngunzi, ɔtu ɔ nwo na ɔyɛ ngoaseade a.

²³ Ninyɛne ɛtane ɛhye mɔ amuala vi sonla kunlu a finde a na bɛgua ɔ nwo evinli.”

Raalɛ bie diedi

²⁴ Gyisɛse vile ɛkɛ ne na ɔhɔle maanzinli ne mɔɔ bikye suakpole ne mɔɔ bɛfɛlɛ ye Taya la azo. Ɔhɔwolole awuke bie anu, na ɔyɛle kɛ ɔnrɛmaa awie ɛnrɛnwu kɛ ɔwɔ ɛkɛ ne, noko akee yeangola fea kyɛ.

^25-26 Raalɛ bie mɔɔ ɛnle Dwuunli na bɛwole ye wɔ Fonehyea maanzinli nu wɔ Selea maanle nu la rale Gyisɛse anwo ɛkɛ. Raalɛ ɛhye, sunsum ɛtane wɔ ɔ ra raalɛ anwo. Ɔdele Gyisɛse nganeɛ la, ɔrale ɔradule ɔdɔle ɔ gyakɛ anu na ɔbodole ye kɛ ɔdu sunsum ɛtane ne wɔ ɔ ra ne anwo.

²⁷ Gyisɛse buale ye kɛ, “Maa yɛlumua yɛmaa ngakula ne mɔ ɛli debie na bɛ ko ɛyi; ɔnle kpalɛ kɛ yɛkɛva ngakula ne mɔ aleɛ ne yɛkɛmaa ahwea mralɛ.”

²⁸ Raalɛ ne hanle kɛ, “Ɔle zɔhane, Yɛmenle, noko akee ahwea mralɛ ne mɔ mɔɔ gua ɛkponle ne abo la, ɔyɛ a tafetafe ngakula ne mɔ aleɛ ne abo zo ne.”

²⁹ Gyisɛse zele ye kɛ, “Wɔ edwɛkɛ ne mɔɔ wɔha la ati, kɔ sua nu na sunsum ɛtane ne ɛvi ɛ ra raalɛ ne anwo.”

³⁰ Raalɛ ne hɔle sua nu na ɔhɔnwunle kɛ ɔ ra raalɛ ne la ɛkpa zo, na sunsum ɛtane ne ɛvi ɔ nwo amgba.

Gyisɛse yɛ mumule ayile

³¹ Akee Gyisɛse vile Taya afoa nu na ɔluale Saedɛn sua zo nee Azuamgbole Bulu ne mɔ maanzinli ne anu ɔrale Galeli Tandane ne anloa.

³² Menli bie vale nrenya bie mɔɔ anzo ɛdi na ɔle mumule la rɛlɛle ye na bɛbodole ye kɛ ɔva ɔ sa ɔdo ɔ nwo zo.

³³ Gyisɛse vale nrenya ne vile ɛlɔne ne anu hɔle ahane na ɔvale ɔ sa mrɛlɛsɛka ɔwulowulale nrenya ne anzo nu, ɔdole nyɛlɛ, na ɔvale ɔ sa ɔhanle nrenya ne atafinlima.

³⁴ Akee Gyisɛse nleanle anwuma, ɔgule ɛnwomenle kpole ko na ɔzele nrenya ne kɛ, “Ɛfata!” Ɔ bo a le, “Bɛbuke!”

³⁵ Ɛkɛ ne ala nrenya ne anzo bukele, ɔ tafinlima zianyinle na ɔdendɛle kpalɛ.

³⁶ Na Gyisɛse bɔle menli ne mɔ anloa kɛ bɛmmabɔ mɔɔ ɛzi la azo bɛkile awie biala, noko bɛamkponle na bɛhanle ye dɔɔnwo kpalɛ.

³⁷ Ɔyɛle bɛdabɛ mɔɔ bɛdele la amuala azibɛnwo kpole na bɛbɔle nu bɛhanle kɛ, “Ɔyɛ debie biala boɛ! Ɔmaa anzondilira te edwɛkɛ na mumule tendɛ.”