Edwɛkpa ne kɛmɔ Maake hɛlɛle la 6 - BAEBOLO ANZƐƐ BULUKU NWUANZANWUANZA

Nazalɛtema kpole Gyisɛse

¹ Gyisɛse vi ɛkɛ ne la ɔ nee ye ɛdoavolɛma ne ziale rale ye sua zo.

² Ɛnwomenlelielɛ Kenle ne dwule la, ɔbɔle ɔ bo kɛ ɔyɛ ngilehilelɛ wɔ nyianu sua ne anu. Ɛnee menli dɔɔnwo kpalɛ wɔ ɛkɛ; bɛdiele ye bɛwiele la, ɔzinle bɛ nwo na bɛbizale kɛ, “Nienwu a nrenya ye nee ɛhye vi a? Ɔzukoale ye nrɛlɛbɛ ɛhye wɔ nienwu? Adenle boni anu a ɔfa ɔyɛ ye nwanwane ninyɛne ɛhye mɔ a?

³ Na tɛ Mɛle ara kapenta ye ɛ? Tɛ ɔ mediema mrenya a le Gyemise, Dwosefi, Dwudase, yɛɛ Saemɔn? Tɛ ɔ mediema mraalɛ noko a yɛ nee bɛ gua sua ye azo la ɔ?” Na bɛkpole ye.

⁴ Gyisɛse zele bɛ kɛ, “Nyamenle kpɔmanvolɛ biala lɛ ɔ nyunlu wɔ ɛleka biala, kyesɛ ɔdaye ye sua zo, ye mbusua nu anzɛɛ ye sua nu ala.”

⁵ Yeangola yeanyɛ nwanwane debie wɔ ɛkɛ ne kɛ ɔ sa mɔɔ ɔvale ɔguale wuleravolɛma ekyi bie anwo zo ɔyɛle bɛ ayile la ala.

⁶ Na ɔyɛle ye azibɛnwo kpole kɛ menli ne ɛnlɛ diedi a. Akee Gyisɛse hɔkpɔsale namunamu ne mɔ mɔɔ zuozua ɛkɛ ne la azo hilehilele menli ne.

Gyisɛse soa ɛdoavolɛma bulu nee nwiɔ ne

⁷ Ɔvɛlɛle Bulu nee Nwiɔ ne na ɔzoanle bɛ nwiɔ nwiɔ, na ɔmanle bɛ tumi wɔ sunsum ɛtane nwo zo,

⁸ na ɔzele bɛ kɛ, “Bɛmmafa debie biala bɛtu adenle ne kɛ kpɔma ala; bɛmmafa aleɛ anzɛɛ kodoku, yɛɛ bɛmmafa ezukoa bɛbɔ bɛ nwo.

⁹ Bɛwula mgbɔlaboa, noko bɛmmafa tɛladeɛ bieko bɛboka mɔɔ bɛwula la anwo.”

¹⁰ Eza ɔzele bɛ kɛ, “Awuke biala mɔɔ bɛkɛlie bɛ nu la, bɛdɛnla ɛkɛ ne ala bɛmaa ɔhɔkpula kenle mɔɔ bɛkɛvi sua ne azo la.

¹¹ Saa bɛkɔ sua bie azo noko na menli ne anlie bɛ anzɛɛ ɛnrɛdie bɛ a, bɛvi ɛkɛ ne bɛhɔ na bɛkpɔlɔkpɔla bɛ gyakɛ anwo munlutu bɛgua, bɛva bɛhile kɛ menli ne di ɛzonle.”

¹² Yemɔti bɛzile nu bɛhɔle na bɛbɔle nolo kɛ menli ɛnlu bɛ nwo.

¹³ Bɛdule mbɔnsam dɔɔnwo, na bɛvale nwole bɛkpokpale wuleravolɛma dɔɔnwo bɛyɛle bɛ ayile.

Dwɔn Sɔnevolɛ ne ewule

¹⁴ Belemgbunli Hɛlɔdo dele ɛhye mɔ anwo bie, ɔluakɛ Gyisɛse nganeɛ ɛdwu ɛleka biala, na menli ɛlɛkeha kɛ, “Dwɔn Sɔnevolɛ ne ɛzia ɛra ngoane nu bieko, yemɔti a ɔkola ɔyɛ nwanwane ninyɛne ɛhye mɔ a.”

¹⁵ Bie mɔ se, “Yilaegya ɔ.” Bie mɔ noko hanle kɛ, “Ɔle Nyamenle kpɔmanvolɛ, kɛ mɔmoane Nyamenle kpɔmanvolɛma ne mɔ anu ko la.”

¹⁶ Mɔɔ Hɛlɔdo dele ɛhye la ɔhanle kɛ, “Dwɔn Sɔnevolɛ ne mɔɔ memanle bɛpɛle ɔ ti la a ɛzia ɛra ngoane nu bieko la.”

¹⁷ Hɛlɔdo manle bɛhyele Dwɔn bɛguale ye nwɔnzɔnwɔnzɔ na bɛdole ye efiade wɔ ɔ diema Felepe aye Hɛlɔdease mɔɔ ɔdaye Hɛlɔdo ɔgyale ye la ati,

¹⁸ ɔluakɛ Dwɔn vale zile Hɛlɔdo anyunlu dahuu kɛ, “Ɔnle amaamuo kpalɛ kɛ ɛkɛgya ɛ diema ne aye ne.”

¹⁹ Ɛhye ati Dwɔn anwo yɛle Hɛlɔdease ɛya kpole na ɔbɔle kpɔkɛ kɛ ɔnyia ye a ɔkɛhu ye, noko Hɛlɔdo ammaa ye adenle.

²⁰ Hɛlɔdo zulole, ɔboalekɛ Dwɔn le sonla mɔɔ ye ɛbɛla tenrɛ na ɔ nwo te a, yemɔti ɔvale ye ɔziele kpalɛ. Ɔhulole kɛ ɔkɛdie Dwɔn anloa edwɛkɛ, noko kenle mɔɔ ɔkɛdie ye la ɛnee ɔ ti akunlu ɛzɛkye bɔkɔɔ.

²¹ Nzinlii Hɛlɔdease asa hanle Dwɔn wɔ mekɛ mɔɔ ɛnee Hɛlɔdo ɛlɛdi ye awolɛ kenle ɛvoyia la. Hɛlɔdo dole ɛkponle na ɔvɛlɛvɛlɛle arane mbɔlɔba mgbanyinli, ye safohyenlema nee Galeli mgbanyima ne mɔ amuala.

²² Wɔ ɛkponledolɛ ne abo, Hɛlɔdease ara raalɛ ne razile agole manle ɔzɔle Hɛlɔdo nee mgbanyima ne mɔ anye. Na belemgbunli ne zele ye kɛ, “Biza me debie biala mɔɔ ɛkulo la na menwɔva menwɔmaa wɔ.”

²³ Akee ɔhanle ndane kɛ, “Debie biala mɔɔ ɛkulo la, biza, saa me belemgbunli maanle ye foa ko bɔbɔ a, menwɔva menwɔmaa wɔ.”

²⁴ Bɛlɛra ne vindele hɔbizale ɔ nli kɛ, “Duzu a membiza a?” Ɔ nli buale kɛ, “Biza die Dwɔn Sɔnevolɛ ne ati.”

²⁵ Na ndɛndɛ ne ala bɛlɛra ne razele belemgbunli ne kɛ, “Mekpondɛ kɛ ɛfa Dwɔn Sɔnevolɛ ne ati ɛto apawa nu ɛmaa me kɛkala.”

²⁶ Ɛhye yɛle belemgbunli ne nyane somaa, noko akee yeha ndane, yɛɛ wɔ ye mgbanyima ne mɔ nee ye nyɛvolɛ ne mɔ anyunlu, yeangulo kɛ ɔkɛdo ye ndane ne.

²⁷ Ɛhye ati ɔzoanle sinzavolɛ ko ɔmanle ɔhɔle efiade ne ɔhɔpɛle Dwɔn ati,

²⁸ ɔvale ɔdole apawa nu ɔrɛlɛle bɛlɛra ne, na ɔvale ɔhɔmanle ɔ nli.

²⁹ Dwɔn ɛdoavolɛma ne mɔ dele, bɛhɔliele ye funli ne na bɛhɔziele ye.

Gyisɛse maa menli apenle nnu aleɛ

³⁰ Ɛzoanvolɛma ne ziale rale na bɛrahanle ninyɛne mɔɔ bɛyɛle nee mɔɔ bɛhilehilele la amuala bɛhilele Gyisɛse.

³¹ Kɛmɔ ɛnee menli dɔɔnwo si kɔ na bɛba Gyisɛse anwo ɛkɛ ne la, ɔ nee ye ɛdoavolɛma ne mɔ annyia adenle bɔbɔ na bɛade aleɛ bɛawula bɛ nloa anu. Yemɔti ɔzele ye ɛdoavolɛma ne mɔ kɛ, “Bɛrɛla bɛmaa yɛhɔvea ɛleka bie koonwu na bɛlie bɛ ɛnwomenle ekyii.”

³² Na bɛdabɛ bɛ ngome bɛvale ɛlɛne bɛzile nu kɛ bɛkɔ bɛahɔvea ɛleka bie koonwu.

³³ Noko menli dɔɔnwo ze bɛ, yemɔti mɔɔ bɛnwunle kɛ bɛlɛkɔ la bɛvale ɛnriandilɛ bɛvi azua ne mɔ azo bɛbule bɛ nyunlu.

³⁴ Gyisɛse vi ɛlɛne ne anu dwule aze la, ɔnwunle menli dɔɔnwo ne na ɔ kunlu yelɛyelale ye kpole, ɔluakɛ bɛle kɛ mboane mɔɔ ɛnlɛ neavolɛ la. Zɔhane ati ɔbɔle ɔ bo ɔhilehilele bɛ ninyɛne dɔɔnwo.

³⁵ Mɔɔ aleɛ ne hɔle bie la, ye ɛdoavolɛma ne mɔ razele ye kɛ, “Aleɛ ne anloa ɛbɔ aze, yɛɛ ɛke noko ɛmbikye sua zo.

³⁶ Yemɔti maa menli ye adenle maa bɛhɔ azua nee namunamu ne mɔ azo na bɛhɔdɔ debie bɛli.”

³⁷ Gyisɛse buale bɛ kɛ, “Bɛdabɛ bɛmaa bɛ debie bɛli.” Bɛbizale ye kɛ, “Ɛnee yɛhɔdɔ kpanwo etaku nna nna ɛya nwiɔ yɛmaa bɛ ɔ?”

³⁸ Gyisɛse zele bɛ kɛ, “Bɛhɔnlea kɛ bɛlɛ kpanwo nyɛ?” Bɛhɔnleanle na bɛrazele ye kɛ, “Kpanwo nnu yɛɛ fɛlɛ nwiɔ.”

³⁹ Gyisɛse zele ye ɛdoavolɛma ne mɔ kɛ bɛmaa menli ne mɔ ɛdɛnlɛdɛnla aze ekpunli ekpunli wɔ ndile ne azo.

⁴⁰ Menli ne mɔ dɛnlɛdɛnlanle aze ekpunli ekpunli, ekpunli ne bie anu amra le ɛya, bie noko le abulanlu.

⁴¹ Na Gyisɛse vale kpanwo nnu ne nee fɛlɛ nwiɔ ne na ɔnleanle anwomanyunlu, ɔyɛle Nyamenle mo, ɔbubule kpanwo ne ɔmanle ye ɛdoavolɛma ne mɔ kɛ bɛva bɛmaa menli ne mɔ. Eza ɔhyɛle fɛlɛ nwiɔ ne ɔmanle bɛ muala.

⁴² Awie biala nyianle bie lile manle ɔ ko yile tɛkɛɛ.

⁴³ Na ɛdoavolɛma ne sesale kpanwo nee fɛlɛ ne abo zo ne ahɛndɛne bulu nee nwiɔ.

⁴⁴ Menli mɔɔ lile kpanwo ne la, saa ɛye mraalɛ nee ngakula ne mɔ nu a bɛlua mrenya apenle nnu.

Gyisɛse tia azule nye

⁴⁵ Ndɛndɛ ne ala Gyisɛse manle ye ɛdoavolɛma ne vale ɛlɛne ne lumuale ɔ nyunlu wɔ sunvoa lɔ, wɔ Bɛteseeyeda sua zo na ɔyɛle ɛ ɔnea yeagyakyi menli ne adenle.

⁴⁶ Ɔ nee menli ne wiele nrɛlaleɛ di la, akee ɔhɔle boka bie azo kɛ ɔkazɛlɛ.

⁴⁷ Aleɛ ne muanle nwo la, ɛnee ɛlɛne ne la tandane ne buma ne anu lɔ na yeha Gyisɛse angome wɔ ɛnwea ne anloa.

⁴⁸ Ɔnwunle kɛ ye ɛdoavolɛma ne anwo ɛhyele bɛ wɔ azule ne anye lɔ, ɔluakɛ ɛnee anwoma ne ɛlɛbɔ atia bɛ. Zɔhane ati aleɛbahye ne kɛyɛ akɔlɛmɔleɛ, ɔdiale azule ne anye ɔrale bɛ nwo ɛkɛ ne na ɔyɛle kɛ ɔse bɛ nwo.

⁴⁹ Mɔɔ ɛdoavolɛma ne mɔ nwunle ye la, bɛdwenlenle kɛ nwomenle ɔ, yemɔti bɛdeɛdeanle nu,

⁵⁰ ɔluakɛ ɛnee bɛ ahonle ɛdu kpole kpalɛ. Ndɛndɛ ne ala Gyisɛse zele bɛ kɛ, “Bɛdo bɛ ahonle azule nu! Medame ɔ, bɛmmasulo!”

⁵¹ Na ɔvole ɛlɛne ne anu la, ɛkɛ ne ala anwoma ne gyakyile ɛdulɛ. Ɛhye yɛle ɛdoavolɛma ne nwanwane kpole,

⁵² ɔluakɛ ɛnee bɛtɛtele ɔ bo kɛ ɔzile ɔyɛle mɔɔ Gyisɛse holale manle menli apenle nnu ne aleɛ la; nɔhalɛ, ɛnee bɛ adwenle ɛnzo nu fee.

Gyisɛse yɛ wuleravolɛma ayile wɔ Gɛnɛzalɛte

⁵³ Bɛpɛle tandane ne bɛrale sua bie mɔɔ bɛfɛlɛ ye Gɛnɛzalɛte la azo na bɛhendanle bɛ ɛlɛne ne wɔ ɛvoleɛ ne.

⁵⁴ Bɛvi ɛlɛne ne anu bɛdwule aze ala la yɛɛ menli ne nwunle Gyisɛse a.

⁵⁵ Zɔhane ati bɛhanle bɛ nwo bɛwolole maanzinli ne anu ɛleka biala; bɛhɔzoale bɛ wuleravolɛma wɔ ɛkpa nu bɛrɛlɛle Gyisɛse wɔ ɛleka biala mɔɔ bɛkɛde kɛ ɔwɔ la.

⁵⁶ Ɛleka biala mɔɔ ɔhɔle la, saa namule nu o, saa suakpole zo o, anzɛɛ ɛya nu bɔbɔ a, menli vale bɛ wuleravolɛma raguale gua ne mɔ azo na bɛbodole ye kɛ ɔmaa adenle ɔmaa bɛva bɛ sa bɛha ye tɛladeɛ ne anloa ala, na bɛdabɛ noko mɔɔ bɛyɛle ye zɔhane la amuala dele kpɔkɛ bɔkɔɔ.