Edwɛkpa ne kɛmɔ Maake hɛlɛle la 5 - BAEBOLO ANZƐƐ BULUKU NWUANZANWUANZA

Gyisɛse tu nrenya bie anwo mbɔnsam

¹ Gyisɛse nee ye ɛdoavolɛma ne dwule aze wɔ Galeli Tandane ne anzi wɔ Gɛlasa maanle nu.

² Gyisɛse vi ɛlɛne ne anu dwule la, nrenya bie mɔɔ sunsum ɛtane wɔ ɔ nwo la vi azie ne azo rayiale ye.

³ Nrenya ɛhye ɛva azie ne azo ɛyɛ ye sua nu; awie biala ɛngola ɛngua ye nwɔnzɔnwɔnzɔ.

⁴ Mekɛ dɔɔnwo ne ala menli ɛzɔ ye ɛbɔ ye kpanwu, noko yedu kpanwu ne na yetete nwɔnzɔnwɔnzɔ ne mɔɔ gua ɔ sa nee ɔ gyakɛ la amuala; awie biala ɛngola ye sɔ.

⁵ Alehyenlɛ nee aledwolɛ muala ɛnee ɔluolua azie ne nee awoka ne mɔ azo ɔteɛdea nuhua na ɔfa awolɛ ɔpepɛ ɔ nwo.

⁶ Ɔnwunle Gyisɛse kɛ ɔlua moa moa lɔ ɔlɛba la, ɔnriandile ɔrahotole ɔ nyunlu ɛkɛ ne

⁷ na ɔhanle ye kpole kɛ, “Anwuma Anwuma Nyamenle Ara Gyisɛse, ɛ nee me lɛ bie ɔ? Mefa Nyamenle mekpa wɔ kyɛlɛ, mmatea me!”

⁸ (Ɔhanle ɛhye, ɔluakɛ ɛnee Gyisɛse ɛlɛka kɛ, “Sunsum ɛtane, ɛvi nrenya ye anwo tu!”)

⁹ Gyisɛse bizale ye kɛ, “Kɛ bɛfɛlɛ wɔ ɛ?” Nrenya ne buale ye kɛ, “Bɛfɛlɛ me ɛlɔne, ɔluakɛ yɛ nwo zonle.”

¹⁰ Na ɔbodole Gyisɛse kɛ ɔmmatu bɛ ɔfi maanle ne anu.

¹¹ Mekɛ ne anu ɛnee agbolike dɔɔnwo bie ɛlɛdidi boka bie anye anwo wɔ ɛkɛ ne afoa nu.

¹² Sunsum ɛtane ne mɔ bodole Gyisɛse kɛ, “Maa yɛ adenle maa yɛhɔwolo agbolike ne mɔ nu.”

¹³ Gyisɛse manle bɛ adenle. Sunsum ɛtane ne mɔ vile nrenya ne anwo, na bɛhɔwolole agbolike ne mɔ. Agbolike ne mɔ mɔɔ bo apenle nwiɔ la dule twi pianle bɛ nwo wɔ boka ne anye anwo na bɛhɔguale tandane ne anu bɛwule.

¹⁴ Menli mɔɔ ɛlɛnea agbolike ne mɔ la nriandile hɔbɔle suakpole ne nee namunamu ne mɔ azo amra amaneɛ. Menli rale kɛ bɛbanlea mɔɔ ɛzi la.

¹⁵ Bɛradwule la, ɛnee nrenya bɔnavolɛ ne mɔɔ anrɛɛ mbɔnsam dɔɔnwo wɔ ɔ nwo la anye zo ɛtete ye, na ɔheda ɛdanlɛ ɔde Gyisɛse anwo ɛkɛ. Ɛhye yɛle bɛ ɛzulolɛ kpole.

¹⁶ Menli mɔɔ nwunle mɔɔ zile la hanle kɛ ɔyɛle mɔɔ nrenya ne anye zo zile tetele ye nee mɔɔ zile agbolike ne mɔ anwo zo la amuala hilele bɛ.

¹⁷ Ɛhye ati bɛzele Gyisɛse kɛ ɔvi bɛ maanle ne anu ɔhɔ.

¹⁸ Gyisɛse kɔ ahɔvo ɛlɛne nu la, nrenya ne mɔɔ anrɛɛ mbɔnsam ne mɔ wɔ ɔ nwo la razɛlɛle ye kɛ, “Maa me nee wɔ ɛlua!”

¹⁹ Na Gyisɛse amkponle zo. Ɔzele ye kɛ, “Sia kɔ sua nu na kɔha debie mɔɔ Nyamenle ɛyɛ ɛmaa wɔ nee anwunvɔne mɔɔ yeze wɔ la kile ɛ gɔnwo mɔ.”

²⁰ Yemɔti nrenya ne ziale hɔle na ɔbɔle ɔ bo kɛ ɔbɔ mɔɔ Gyisɛse ɛyɛ ɛmaa ye la nolo wɔ Azuamgbole Bulu ne mɔ azo. Na ɔyɛle bɛdabɛ mɔɔ bɛdele la amuala azibɛnwo.

Gyeeyaelɛse ara raalɛ ne nee raalɛ ne mɔɔ vale ɔ sa hanle Gyisɛse tɛladeɛ ne la

²¹ Gyisɛse ziale pɛle rale azule nzi nehae bieko, na menli dɔɔnwo rayiale ye wɔ ɛnwea ne anloa.

²² Gyeeyaelɛse mɔɔ le sua ne azo nyianu sua ne mgbanyima ne mɔ ko la radule dɔle ɔ gyakɛ anu

²³ na ɔbodole ye kɛ, “Me ra raalɛ ekyi ne ɛlɛdie ewule awu. Mebodo wɔ, bɛla bava ɛ sa to ɔ nwo zo maa ɔde kpɔkɛ na ɔnyia ngoane.”

²⁴ Na Gyisɛse nee ye hɔle. Menli dɔɔnwo kpalɛ doale ye na bɛhyelele ɔ nwo zo.

²⁵ Raalɛ bie wɔ ɛkɛ, yedudu mogya toonwo ɛvolɛ bulu nee nwiɔ,

²⁶ na yenwu amaneɛ dɔɔnwo wɔ ninsinlima asa anu. Ɔ nwo ezukoa muala ɛwie, noko ɔnde kpɔkɛ; ye ewule ne, ɔ nyunlu ala a ɔkɔ a.

²⁷ Ɛnee yede Gyisɛse nganeɛ, yemɔti ɔralile ɔ nzi wɔ menli ne anu,

²⁸ na ɔhanle ye ɔ ti anu kɛ, “Saa mefa me sa meka ye tɛladeɛ ne bɔbɔ a, me nwo kɛza.” Ɛhye ati ɔvale ɔ sa ɔhanle Gyisɛse tɛladeɛ ne,

²⁹ na ɛkɛ ne ala mogya ne mɔɔ ɛlɛtu ye la pɛle, na ɔdele ye wɔ ye nu kɛ yede kpɔkɛ.

³⁰ Ɛkɛ ne ala Gyisɛse dele ye wɔ ye nu kɛ tumi vi ye nuhua ɛhɔ. Ɔhakyile ɔ nwo na ɔbizale kɛ, “Nwane a vale ɔ sa hanle me tɛladeɛ ne a?”

³¹ Ye ɛdoavolɛma ne mɔ buale ye kɛ, “Nea kɛ menli ɛhyele ɛ nwo zo bie a; duzu ati a ɛlɛbiza kɛ, ‘Nwane a vale ɔ sa hanle me a?’ ”

³² Na Gyisɛse vale ɔ nye kpɔlale nu kɛ ɔnea ahenle mɔɔ vale ɔ sa hanle ye la.

³³ Raalɛ ne nwunle mɔɔ ɛzi ye nu la, ɔvale ɛzulolɛ nee anwowozolɛ ɔrahotole Gyisɛse agyakɛ anu, na ɔhanle ye edwɛkɛ nɔhalɛ nu ɔhilele ye.

³⁴ Gyisɛse zele ye kɛ, “Me ra raalɛ, wɔ diedi ɛlie wɔ ngoane. Fa anzonudwolɛ kɔ na wɔ ewule ne ɛhɔ bɔkɔɔ.”

³⁵ Gyisɛse anloa wɔ zo ɔlɛtendɛ la, ɛbɔfoɔ vi Gyeeyaelɛse sua nu razele ye kɛ, “Ɛ ra raalɛ ne ati ɛbɔ aze na mmagyegye kilehilevolɛ ne bieko.”

³⁶ Gyisɛse dele mɔɔ bɛhanle la, noko ɔzile nyianu sua ne kpanyinli ne ahonle na ɔzele ye kɛ, “Mmasulo, wɔmɔ die di ala.”

³⁷ Yeammaa adenle yeammaa awie biala nee ye angɔ kɛ Pita nee Gyemise nee ɔ diema Dwɔn ala.

³⁸ Bɛdwule Gyeeyaelɛse awuke ne anu la, Gyisɛse nwunle menli dɔɔnwo wɔ ɛkɛ ne na bɛlɛsu bɛye awolɛ.

³⁹ Ɔhɔle sua ne anu na ɔzele bɛ kɛ, “Na ɛzunlɛ bebelebe ye ɛ? Kakula ne ɛtɛwule; ɔlɛdafe ala!”

⁴⁰ Menli ne mɔ zelele ye. Yemɔti ɔdule bɛ muala ɔvile sua ne anu na ɔvale kakula raalɛ ne ɔ ze nee ɔ nli yɛɛ ye ɛdoavolɛma nsa ne na ɔ nee bɛ hɔle ɛleka mɔɔ bɛdeda kakula ne la.

⁴¹ Ɔzɔle kakula raalɛ ne asa na ɔzele ye kɛ, “Talita, Kumi!” Ɔ bo a le “Kakula raalɛ, mese, dwazo!”

⁴² Ɛkɛ ne ala ɔdwazole na ɔkpɔsale sua ne anu. (Ɛnee yeli ɛvolɛ bulu nee nwiɔ.) Ɛhye yɛle menli ne nwanwane kpole.

⁴³ Na Gyisɛse bɔle bɛ nloa kɛ bɛmmaka bɛkile awie biala, na ɔzele bɛ kɛ, “Bɛmaa ye debie ɔli.”