Edwɛkpa ne kɛmɔ Maake hɛlɛle la 1 - BAEBOLO ANZƐƐ BULUKU NWUANZANWUANZA

Dwɔn Sɔnevolɛ ne bɔ nolo

¹ Gyisɛse Kelaese, Nyamenle Ara ne anwo Edwɛkpa ne ɛne.

² Ɔbɔle ɔ bo, kɛmɔ Nyamenle kpɔmanvolɛ Ayezaya hɛlɛle la. Ɔse, “Nyamenle se, ‘Mebazoa me ɛbɔfoɔ meamaa yealumua ɛ nyunlu yeahɔziezie wɔ adenle ne anu.’

³ Awie ɛlɛtea nu wɔ fienemgbole ne anu kɛ, ‘Bɛziezie Awulae adenle ne; bɛdenrɛdenrɛ ye ndenle ne mɔ!’ ”

⁴ Mekɛ ne anu Dwɔn vindele fienemgbole ne anu, ɔzɔnenle menli na ɔbɔle nolo kɛ, “Bɛnlu bɛ nwo na bɛmaa bɛzɔne bɛ, na Nyamenle kɛva bɛ ɛtane ne mɔ kɛhyɛ bɛ.”

⁵ Menli dɔɔnwo vi Dwudiya maanzinli ne anu nee suakpole Gyɛlusalɛm azo hɔle kɛ bɛkadie Dwɔn. Bɛhanle bɛ ɛtane ne mɔ na ɔzɔnenle bɛ wɔ Azule Dwɔdan ne anu.

⁶ Dwɔn wula tɛladeɛ mgbane bie mɔɔ bɛva afunlumu enrinli a bɛnwo la, na ɔhye nwoma akyeso; ye aleɛ a le abɛbɛ nee wolɛ.

⁷ Ɔbɔle nolo ɔhilele menli ne kɛ, “Sonla ne mɔɔ li me nzi ɛlɛba la lɛ tumi tɛla me. Menfɛta kɛ menwɔbutu kɛ mesianyi ye mgbɔlaboa zo nyɛma bɔbɔ.

⁸ Mame, mefa nzule a mesɔne a; na yemɔ, ɔbava Sunsum Nwuanzanwuanza ne a yeazɔne bɛ a.”

Gyisɛse ɛzɔnenlɛ nee ye sɔnea

⁹ Mekɛ ne anu Gyisɛse vi Nazalɛte mɔɔ wɔ Galeli maanzinli nu la rale, na ɔmanle Dwɔn zɔnenle ye wɔ Dwɔdan ne anu.

¹⁰ Mɔɔ Gyisɛse vi azule ne anu vole file zo ala la, ɔnwunle kɛ anwuma ɛbuke na Sunsum ne ɛlɛdwu ɔ nwo zo kɛ abubule la.

¹¹ Na ɛnelɛ bie vi anwuma zele kɛ, “Wɔmɔ a ɛle me ra mɔɔ mekulo wɔ kpalɛ a. Me nye die ɛ nwo kpole.”

¹² Ndɛndɛ ne ala Sunsum ne vale ye hɔle fienemgbole ne anu.

¹³ Ɔlile kenle abulanla wɔ ɛkɛ ne, na Seetan zɔle ye nleanle. Ɔ nee ɛbɔ nu nanemgbole dɛnlanle, na Nyamenle soanvolɛma raboale ye.

Gyisɛse fɛlɛ fɛlɛkyevoma nna

¹⁴ Nzinlii mɔɔ bɛhyele Dwɔn bɛdole efiade la, Gyisɛse hɔle Galeli hɔbɔle Edwɛkpa ne nolo kɛ,

¹⁵ “Mekɛ ne ɛdwu, Nyamenle Belemgbunlililɛ ne ɛbikye. Bɛnlu bɛ nwo na bɛlie Edwɛkpa ne bɛli.”

¹⁶ Gyisɛse lua Galeli Tandane ne anloa la, ɔnwunle fɛlɛkyevoma nwiɔ kɛ bɛlɛgua asawu. Bɛmɛ a le Saemɔn nee ɔ diema Andelu.

¹⁷ Gyisɛse zele bɛ kɛ, “Bɛrɛla bɛmaa yɛhɔ na mebahilehile bɛ meamaa bɛahye menli kɛ bɛkye fɛlɛ la.”

¹⁸ Na bɛgyakyile bɛ asawu ne mɔ ɛkɛ ne na bɛ nee ye hɔle.

¹⁹ Ɔhɔle ɔ nyunlu ekyii la, ɔnwunle mediema nwiɔ bieko, Gyemise nee Dwɔn, nrenya Zɛbɛdi amra ne mɔ kɛ bɛwɔ ɛlɛne nu bɛlɛsa bɛ avonle.

²⁰ Gyisɛse vɛlɛle bɛ, na bɛgyakyile bɛ ze Zɛbɛdi nee ye ɛkpama ne mɔ wɔ ɛlɛne ne anu na bɛdoale ye.

Nrenya bie mɔɔ sunsum ɛtane wɔ ɔ nwo la

²¹ Gyisɛse nee ye ɛdoavolɛma ne dwule Kapɛnayɛm sua zo la, bɛhɔle nyianu sua ne anu wɔ Ɛnwomenlelielɛ Kenle ne, na Gyisɛse bɔle ɔ bo kɛ ɔkilehile.

²² Ye ngilehilelɛ ne zinle menli mɔɔ diele ye la anwo, ɔboalekɛ ɔngilehile kɛ mɛla kilehilevolɛma ne mɔ la. Ɔkilehile kɛ sonla mɔɔ lɛ tumi la.

²³ Mekɛ ne anu ala, nrenya bie mɔɔ sunsum ɛtane wɔ ɔ nwo la vindele nyianu sua ne anu na ɔdeanle nu ɔzele kɛ,

²⁴ “Gyisɛse mɔɔ vi Nazalɛte, kɛ yɛze wɔ ɛ? Wɔra kɛ ɛbazɛkye yɛ ɔ? Meze wɔ sonlazule: Wɔmɔ a ɛle Nyamenle Sonla ne mɔɔ anwo te la!”

²⁵ Gyisɛse deanle sunsum ɛtane ne nu zele kɛ, “Yɛ koonwu na ɛvi ɔ nwo tu!”

²⁶ Sunsum ɛtane ne kpusule nrenya ne kpole kpalɛ, na ɔdeanle nu kpole ko, na ɔvi ɔ nwo ɔdule.

²⁷ Ɛhye yɛle menli ne amuala azibɛnwo kpole na bɛbizale bɛ nwo ngoko kɛ, “Duzu edwɛkɛ ɛ? Ngilehilelɛ fofolɛ boni ɛ? Nrenya ye lɛ tumi mɔɔ ɔtendɛ ɔkile sunsum ɛtane ne mɔ bɔbɔ a, bɛtie ye!”

²⁸ Na Gyisɛse nganeɛ dendenle hɔle Galeli maanzinli ne anu amuala.

Gyisɛse yɛ menli dɔɔnwo ayile

²⁹ Gyisɛse nee ye ɛdoavolɛma ne yɛɛ Gyemise nee Dwɔn vile nyianu sua ne anu na bɛhɔle Saemɔn nee Andelu sua nu.

³⁰ Bɛhɔle la ɛnee ɛyɛlɛyɛlɛ gyi Saemɔn aye ne ɔ nli ne anwo, na ɔla ɛkpa zo. Gyisɛse dwule ɛkɛ ne ala la, bɛbɔle ye amaneɛ

³¹ na ɔhɔle ɔ nwo ɛkɛ. Ɔzɔle raalɛ ne asa ɔboale ye ɔmanle ɔkpogyale ɔ nwo zo ɔdɛnlanle aze. Na ɛkɛ ne ala ye ɛyɛlɛyɛlɛ ne dule, na ɔdwazole ɔkpondɛle debie ɔmanle bɛ.

³² Ɔdwule nɔsolɛ nu mɔɔ ɛnee sɛnzɛne ne ɛdɔ la, menli vale bɛ wuleravolɛma nee bɛdabɛ mɔɔ mbɔnsam wɔ bɛ nwo la rɛlɛle Gyisɛse.

³³ Sua ne azo amra amuala rayile anuhɔlɛ ne.

³⁴ Na Gyisɛse yɛle menli ne mɔ ewule ngakyile ne mɔ ayile na ɔdule mbɔnsam dɔɔnwo. Yeammaa adenle yeammaa mbɔnsam ne mɔ andendɛ, ɔluakɛ bɛze ye sonlazule.

Gyisɛse bɔ Edwɛkpa ne nolo wɔ Galeli

³⁵ Aleɛbahye ne ala, Gyisɛse dwazole vile sua ne azo na ɔhɔveale ɛleka bie ɔzɛlɛle.

³⁶ Saemɔn nee ɔ gɔnwo mɔ hɔle ye ɛkpondɛlɛ;

³⁷ bɛnwunle ye la bɛzele kɛ, “Bɛlɛkpondɛ wɔ kpole.”

³⁸ Gyisɛse buale kɛ, “Bɛmaa yɛhɔ namunamu mɔɔ bikye ɛke la azo. Ɔwɔ kɛ mebɔ Edwɛkpa ne nolo wɔ ɛkɛ ne mɔ noko, ɔluakɛ ɛhye mɔ ati a membale a.”

³⁹ Zɔhane ati ɔhɔkpɔsale Galeli maanzinli ne anu amuala ɔbɔle Edwɛkpa ne nolo wɔ nyianu azua ne mɔ anu na ɔdudule mbɔnsam.

Gyisɛse yɛ nrenya bie ayile

⁴⁰ Kokobɛvolɛ bie rahotole bodole Gyisɛse kɛ, “Saa ɔyɛ wɔ ɛhulolɛ a, ɛkola ɛmaa me nwo sa.”

⁴¹ Gyisɛse nwunle ye anwunvɔne na ɔvale ɔ sa ɔhanle ye ɔzele kɛ, “Mekulo, ɛ nwo ɛza!”

⁴² Ɛkɛ ne ala nrenya ne kokobɛ ne hɔle na ɔ nwo zale.

⁴³ Gyisɛse bɔle ɔ nloa na ɔyele ye ali ndɛndɛ kɛ ɔhɔ,

⁴⁴ na ɔzele ye kɛ, “Nea, mmabɔ mɔɔ ɛzi la azo ɛkile awie biala. Maa ɔyɛ ndɛ kɔva ɛ nwo kile sɛlɛvolɛ ne na bɔ anwonzalɛ azu ne mɔɔ Mosisi hyehyɛle dole ɛkɛ ne la fa kile kɛ ɛ nwo ɛza.”

⁴⁵ Noko nrenya ne hɔbɔle mɔɔ zile la nolo wɔ ɛleka biala ɔmanle ɔlua zo Gyisɛse ɛnee akee ɛngola ɔ nyunlu ye wɔ bagua nu. Ɔhwenle ɔ nwo ɔvile sua zo, noko menli vi ɛleka ɛleka rale ɔ nwo.