Mrɛlɛbulɛ Buluku ne 4 - BAEBOLO ANZƐƐ BULUKU NWUANZANWUANZA

Nrɛlɛbɛ zo nvasoɛ

¹ O me mra mrenya, bɛdie bɛ ze ngilehilelɛ na bɛva bɛzie boɛ, amaa bɛanyia ndelebɛbo,

² ɔluakɛ melɛmaa bɛ mɛla kpalɛ, bɛmmakpo me ngilehilelɛ ne.

³ Mekɛ mɔɔ mele kakula na me nee egya de, mele ekyi bie, na me ngome a ɔmɔ anye die me nwo la,

⁴ egya hilehilele me, na ɔzele me kɛ, “Sɔ me nloa edwɛkɛ nu boɛ kpalɛ, di me mɛla zo na wɔanyia ngoane.

⁵ Mmamaa ɛ rɛle fi, yɛɛ mmakpo me nloa edwɛkɛ. Nwu nrɛlɛbɛ na nyia ndelebɛbo.

⁶ Mmakpo nrɛlɛbɛ, na ɔbazie wɔ boɛ; kulo nrɛlɛbɛ, na ɔbazinza wɔ.

⁷ Nrɛlɛbɛnwunlɛ bo ɛbɔlɛ a le ɛhye: Nwu nrɛlɛbɛ, yɛɛ debie biala mɔɔ ɛkɛnyia ye la, nyia ndelebɛbo.

⁸ Kulo nrɛlɛbɛ, na ɔbamaa wɔayɛ sonlakpole; die ye ɛ sa amu nwiɔ, na ɔbamaa wɔanyia ɛ nyunlu.

⁹ Ɔbayɛ ndotolo kɔtɔlɔba abɔtile kɛnlɛma nee belemgbunli kyɛlɛ kɛnlɛma wɔ ɛ ti zo.”

¹⁰ Me ra nrenya, tie na die me edwɛkɛ ne to nu, amaa wɔanyi wɔahyɛ.

¹¹ Mehile wɔ nrɛlɛbɛ ndenle ne mɔ; meva wɔ melua tenlene ndenle ne mɔ anu.

¹² Saa ɛlɛtia a ɛ gyakɛ ɛnrɛdo ɛnrɛbɛka nu, yɛɛ saa ɛlɛnriandi a ɛ gyakɛ ɛnrɛkpula.

¹³ Sɔ folɛdulɛ nu boɛ, mmagyakyi nuhua, sie ye boɛ, ɔluakɛ yemɔ azo yɛɛ wɔ ngoane gyi a.

¹⁴ Mmafa amumuyɛma adenle nu, yɛɛ mmafa ɛtanema adenle nu.

¹⁵ Kpo zɔhane adenle ne bɔkɔɔ, mmafa zolɛ ɛlɛ. Kakyi ɛ nzi si adenle zɔhane na pɛ nuhua kɔ,

¹⁶ ɔluakɛ menli mɔɔ fa zɔhane adenle zo la ɛnla kyesɛ bɛli ɛtane. Saa bɛtɛmanle awie ɛtɛtule koti a, bɛngola da,

¹⁷ ɔluakɛ bɛ aleɛ mɔɔ bɛdi la a le amumuyɛ, yɛɛ bɛ nza mɔɔ bɛ nye die nwolɛ la a le konle.

¹⁸ Tenlenema adenle nu le wienyi kɛ nwonlomɔ sɛnzɛne mɔɔ kɛkpuke la, ɔfi, ɔta toonwo ɔyɛ kɛ sɛnzɛngyinla ewia.

¹⁹ Amumuyɛma adenle nu le awozinli kabii, bɛlua nu na bɛkpula a bɛnnwu ye.

²⁰ Me ra nrenya, tie me edwɛkɛ ne boɛ; yɛ ɛnzonlɛ tie mɔɔ meka la.

²¹ Mmamaa bɛminli wɔ adwenle nu; fa sie wɔ ahonle nu.

²² Ɔluakɛ bɛle ngoane bɛmaa sonla ne mɔɔ kɛnwu bɛ la, na bɛle ayileyɛlɛ bɛmaa ye nwonane ne.

²³ Nea kɛ ɛsi ɛdwenle la boɛ, ɔluakɛ nuhua yɛɛ wɔ ngoane vi ba a.

²⁴ Mmaka edwɛkɛ mɔɔ ɛnle nɔhalɛ la, yɛɛ mmamaa ɛ nloa fula adalɛ edwɛkɛ.

²⁵ Nea ɛ nyunlu fɔɔnwo, yɛɛ ɛnea debie a nea ye boɛ.

²⁶ Nea kɛ ɛsi ɛtudu ɛ gyakɛ la, amaa wɔ adwenle azi pi wɔ wɔ ndenle nu.

²⁷ Mmatɔ ɛkɔ fema zo anzɛɛ bɛne zo; twe ɛ gyakɛ fi ɛtane adenle zo.