Mrɛlɛbulɛ Buluku ne 3 - BAEBOLO ANZƐƐ BULUKU NWUANZANWUANZA

Mgbavolɛ folɛdulɛ

¹ Me ra nrenya, mmamaa ɛ rɛle fi me ngilehilelɛ ne; fa me mɛla ne mɔ sie wɔ ahonle nu,

² na bɛbamaa wɔanyi wɔahyɛ na wɔakpazi ɛbɛlabɔlɛ nu.

³ Mmamaa ɛ rɛle fi kɛ ɛkɛyɛ tieyɛ na ɛkɛli nɔhalɛ; kyekye bɛ mu nwiɔ kenda ɛ kɔme na fa sie wɔ ahonle nu.

⁴ Ɛhye bamaa wɔazɔ ɛnyelɛ, wɔanyia dumamɔlɛ kpalɛ wɔ menli nee Nyamenle anyunlu.

⁵ Yeye wɔ ahonle nu fa ɛ rɛle wula Ɛdɛnkɛma anu, mmafa wɔ adwenle ɛsɔ ɛ ngome wɔ nrɛlɛbɛ.

⁶ Nwu Nyamenle wɔ wɔ ɛbɛlabɔlɛ muala anu, na ɔbamaa wɔ ndenle adenrɛ fɔɔnwo amaa wɔ.

⁷ Mmabu ɛ nwo kɛ ɛze nrɛlɛbɛ, sulo Ɛdɛnkɛma na twe ɛ nwo fi ɛtane nwo;

⁸ ɔbayɛ ayileyɛlɛ yeamaa wɔ nwonane ne, na yeayɛ wɔ mbowule nu ayile.

⁹ Fa ɛ nwo amuala di Ɛdɛnkɛma eni, na fa wɔ egyinli nu bɛyɔba mɔɔ lumua la maa ye,

¹⁰ na wɔ bonwolo ne mɔ azo bayi tɛkɛɛ, na wɔ nwanye angola ne mɔ ayi abulubulu zo.

¹¹ Me ra nrenya, saa Ɛdɛnkɛma tea wɔ adenrɛdenrɛ wɔ a, mmakpo, yɛɛ saa ɔtwi ɛ nyunlu a, mmamaa ɔyɛ wɔ ɛvɛlɛ,

¹² ɔluakɛ Ɛdɛnkɛma tea mɔɔ ɔkulo ye la, kɛmɔ selɛ tea ɔ ra nrenya mɔɔ ɔ nye die ɔ nwo la.

¹³ Nyilalɛ ɛha sonla ne mɔɔ kɛnwu nrɛlɛbɛ na ɔkɛnyia ndelebɛbo la,

¹⁴ ɔluakɛ mɔɔ ɔbanyia ye nu la tɛla dwɛtɛ fufule yɛɛ nvasoɛ mɔɔ ɔbanyia la tɛla ezukoa nvutuke.

¹⁵ Nrɛlɛbɛ sonle bolɛ tɛla anwoneɛ yɛɛ debie biala mɔɔ sonla nye die nwolɛ la nee ye ɛnzɛ.

¹⁶ Nrɛlɛbɛ lɛ ngoane tendenle wɔ ɔ sa fema ne anu, yɛɛ ɔlɛ anyiabɛnwo nee enililɛ wɔ bɛne ne anu.

¹⁷ Nrɛlɛbɛ adenle nu le anyelielɛ nee anzonudwolɛ ngome.

¹⁸ Ɔle ngoane baka ɔmaa bɛdabɛ mɔɔ bɛsɔ nu boɛ la; bɛdabɛ mɔɔ bɛsɔ nu boɛ la di fɛlɛko.

¹⁹ Ɛdɛnkɛma vale ye nrɛlɛbɛ a bɔle ewiade a; ɔvale ye ndelebɛbo a ɔbɔle anwumaneamra a.

²⁰ Ɔvale ye adwenle a ɔmanle buma ne mɔ rale, na amungu ne mɔ tɔ ɛbɔlɛ gua azɛlɛ ye azo a.

²¹ Me ra nrenya, sɔ nrɛlɛbɛ nee adwenlenunwunlɛ nu boɛ; mmamaa bɛfi ɛ sa,

²² na bɛbayɛ ngoane nee ɛ kɔme ndweabane.

²³ Ɛhye bamaa wɔalua, ɛ nwo ayɛ kɔlɔnwo wɔ wɔ ɛlualɛ nu, yɛɛ ɛ gyakɛ ɛnrɛkpula.

²⁴ Saa ɛtɛnla aze a, ɛnrɛzulo, yɛɛ saa ɛda a, wɔ nafelɛ bayɛ wɔ fɛ.

²⁵ Anyezota ba arɛlevilɛ nu a, mmasulo, yɛɛ saa amumuyɛma ɛzɛkyelɛ mekɛ ne dwu a, mmasulo,

²⁶ ɔluakɛ Ɛdɛnkɛma bamaa ɛ nwo ayɛ kɔlɔnwo; ɔnrɛmaa ɛnrɛdo ɛhane.

²⁷ Saa ɛyɛ na ɔkɛyɛ boɛ a, yɛ menli mɔɔ ɔwɔ kɛ ɛyɛ bɛ boɛ la boɛ.

²⁸ Mmaka ɛkile ɛ gɔnwo kɛ, “Kɔ na wɔara, ɛhyema mebava meamaa wɔ”, wɔ mekɛ mɔɔ deɛ ne mɔɔ ɛfa wɔamaa ye la wɔ ɛ nwo ɛkɛ ne la.

²⁹ Mmafa ɛ gɔnwo mɔɔ ɛ nee ye zua bane, na yeva ɔ rɛle yewula wɔ nuhua la anwo adwenle ɛtane.

³⁰ Ɛ nee awie biala mɔɔ ɛtɛyɛle wɔ ɛtane la mmadi butule.

³¹ Mmamaa ɛ nye bolo awie mɔɔ kulo konle la, yɛɛ mmayɛ mɔɔ ɔyɛ la bie,

³² ɔluakɛ Ɛdɛnkɛma kyi sonla mɔɔ ɛnli boɛ la, na ɔmaa mɔɔ di boɛ la nwu ye ngyehyɛlɛ ne.

³³ Ɛdɛnkɛma maa munzule tɔ amumuyɛma awuke nu, na ɔyila tenlenema awuke.

³⁴ Ɛdɛnkɛma ɛmbu bɛdabɛ mɔɔ bɛmbu debie la bie, na ɔ nye wɔ bɛdabɛ mɔɔ bɛle bɛlɛvo la anwo zo.

³⁵ Bɛdabɛ mɔɔ bɛze nrɛlɛbɛ la, bɛbali bɛ eni, na ahoasea anyunlu bagua aze.