Edwɛkpa ne kɛmɔ Mateyu hɛlɛle la 5 - BAEBOLO ANZƐƐ BULUKU NWUANZANWUANZA

Boka ne azo Edwɛkpa ne nolobɔlɛ ne

¹ Mɔɔ Gyisɛse nwunle menli dɔɔnwo ne la ɔhɔle boka bie azo na ɔdɛnlanle aze. Ye ɛdoavolɛma ne rale ɔ nwo ɛkɛ ne,

² na ɔbɔle ɔ bo ɔhilehilele bɛ kɛ:

Nyilalɛ mɔɔ di munli

³ “Nyilalɛ ɛha bɛdabɛ mɔɔ bɛze kɛ bɛdi Nyamenle Sunsum ne anwo ehyia la, Ɔluakɛ bɛbanwu Anwuma Belemgbunlililɛ ne!

⁴ “Nyilalɛ ɛha bɛdabɛ mɔɔ nyane ɛha bɛ la; Nyamenle bakyekye bɛ rɛle!

⁵ “Nyilalɛ ɛha bɛdabɛ mɔɔ bɛle bɛlɛvo la; Azɛlɛ ye bayɛ bɛ ɛdeɛ!

⁶ “Nyilalɛ ɛha bɛdabɛ mɔɔ bɛ kunlu anu a anrɛɛ bɛkola bɛyɛ mɔɔ Nyamenle kpondɛ la; Nyamenle bamaa bɛ kunlu adwo bɛ nwo!

⁷ “Nyilalɛ ɛha bɛdabɛ mɔɔ bɛse anwunvɔne la; Nyamenle baze bɛdabɛ noko anwunvɔne!

⁸ “Nyilalɛ ɛha bɛdabɛ mɔɔ bɛ ahonle nu te la; Bɛbanwu Nyamenle!

⁹ “Nyilalɛ ɛha bɛdabɛ mɔɔ bɛpele bɛkpondɛ anzonudwolɛ la; Nyamenle bavɛlɛ bɛ ɔ mra!

¹⁰ “Nyilalɛ ɛha bɛdabɛ mɔɔ bɛyɛ bɛ kpɔdekpɔde kɛ bɛbɔ mɔdenle bɛyɛ mɔɔ Nyamenle kpondɛ la; Anwuma Belemgbunlililɛ ne le bɛ ɛdeɛ!

¹¹ “Nyilalɛ ɛha bɛ kɛ bɛle me ɛdoavolɛma la ati bɛbɔ bɛ aholoba, bɛyɛ bɛ kpɔdekpɔde na bɛsoa ɛzonle ngakyile muala bɛgua bɛ nwo zo la.

¹² Bɛmaa bɛ nye ɛlie na bɛli fɛlɛko, ɔluakɛ bɛlɛ nwolɛ ahatualɛ kpole wɔ anwuma. Zɔhane ala yɛɛ bɛyɛle Nyamenle kpɔmanvolɛma ne mɔ mɔɔ lumua la a.

Ngyenle nee kɛnlaneɛ

¹³ “Bɛmɛ a bɛle azɛlɛ ye azo ngyenle a. Ngyenle mɔɔ kɛda la bɛyɛ ye menlemenle bieko a ɔnyɛ boɛ. Bɛfa bɛyɛ ɛhwee a ɔnyɛ boɛ. Bɛto bɛgua na menli tietia zolɛ.

¹⁴ “Bɛmɛ a bɛle ewiade ye kɛnlaneɛ a. Suakpole mɔɔ bɛhye ye boka zo la ɛnvea.

¹⁵ Awie ɛnzɔ kɛnlaneɛ na ɔnva bondo ɔmbutu zolɛ; ɔsɔ ɔsie ye debie zo anwuma, amaa yeada yeamaa bɛdabɛ mɔɔ bɛwɔ sua ne anu la amuala.

¹⁶ Zɔhane ala yɛɛ bɛmaa bɛ ɛbɛla kpalɛ ne ɛyɛ kɛ kɛnlaneɛ na ɔda wɔ menli nu a, amaa bɛanwu bɛ gyima kpalɛ ne mɔɔ bɛyɛ la na bɛaye bɛ Ze mɔɔ wɔ anwuma la ayɛlɛ.

Mosisi mɛla ne anwo ngilehilelɛ

¹⁷ “Bɛmmadwenle kɛ mera kɛ mebazɛkye Mosisi mɛla ne nee Nyamenle kpɔmanvolɛma ngilehilelɛ ne mɔ. Meamba bɛ ɛzɛkyelɛ; mera kɛ meba meamaa bɛali munli.

¹⁸ Nɔhalɛ, meka meahile bɛ kɛ anwuma nee aze baze ahɔ na mɛla ne anu kpɔkɛ nretee ko bɔbɔ ɛnrɛkpɔkye ɛnrɛdɔ kyesɛ mɔɔ wɔ nu la amuala ɛli munli.

¹⁹ Awie biala mɔɔ kɛbu ɔ nye kɛgua mɛla ɛhye mɔ biala anu nretee ko azo na ɔkɛhilehile awie mɔ zɔhane la kɛyɛ ekyi wɔ Anwuma Belemgbunlililɛ nu.

²⁰ Meka meahile bɛ, kyesɛ bɛ tenleneyɛlɛ tɛla mɛla kilehilevolɛma nee Falasiima ne mɔ, anrɛɛ bɛnrɛnwu Anwuma Belemgbunlililɛ ne ɛlɛ.

Ɛyavalɛ nwo ngilehilelɛ

²¹ “Bɛde kɛ bɛhanle bɛhilele mɔmoane amra kɛ, ‘Bɛmmayɛ kɔdiawu na awie biala mɔɔ kɛyɛ kɔdiawu la bɛkɛbua ye ewule fɔlɛ.’

²² Mame, mese: Awie biala mɔɔ kɛva ɔ diema anwo ɛya la bɛkɛbua ye ewule fɔlɛ. Mɔɔ kɛyɛ ɔ diema aholoba la bɛ nee ye kɛhɔ nyianu sua nu mgbanyima ayia ne anyunlu; na mɔɔ kɛze ɔ diema kɛ, ‘Ɛle koasea!’ la, ɛva ɔ nwo ɛdo ɛbolɔ senle nu.

²³ Zɔhane ati saa ɛkɔ kɛ ɛkabɔ azu na ɛkakye ye wɔ azu ɛkponle ne anyunlu ɛkɛ ne kɛ ɛ nee ɛ diema bie lɛ edwɛkɛ a,

²⁴ gyakyi wɔ azubɔdeɛ ne wɔ azukponle ne anyunlu ɛkɛ ne; dumua kɔ ɛ nee ɛ diema ne bɛbɔ bɛ avinli, na akee sia babɔ wɔ azu ne maa Nyamenle.

²⁵ “Saa awie sɛma wɔ a, ɛ nee ye bɛziezie edwɛkɛ ne ndɛndɛ kolaa na bɛadwu ndɛnebualɛ ɛleka ne, amaa yeanye wɔ yeammaa ndɛnebuavolɛ ne na ndɛnebuavolɛ ne ava wɔ amaa sinzavolɛma kɛ bɛdo wɔ efiade.

²⁶ Nɔhalɛ, meka meahile bɛ, bɛnrɛgyakyi wɔ ɛlɛ kyesɛ ɛtua kakɛ biala mɔɔ ɛha la.

Awuvolɛvalɛ nwo ngilehilelɛ

²⁷ “Bɛde kɛ bɛha kɛ, ‘Mmafa awuvolɛ.’

²⁸ Noko mame, mese: saa nrenya nea raalɛ maa ɔ nwo dɔ ye a ɛnee yeva ye wɔ ye ahonle nu.

²⁹ Zɔhane ati saa ɛ nye fema ne yɛɛ twehwe wɔ ahɔ ɛtane nu a, tu ye to ye lɔ. Ɔle kpalɛ kɛ ɛ nye kɛyɛ ko, kɛdɛla kɛ bɛkɛva wɔ sonlabaka ne amuala bɛkɛhɔdo ɛbolɔ senle nu a.

³⁰ Saa ɛ sa fema noko yɛɛ tenda ɛ gyakɛ anu ahwe wɔ ahɔ ɛtane nu a, pɛ ye to. Ɔle kpalɛ kɛ ɛ sa ko kɛminli tɛla kɛ bɛkɛva wɔ sonlabaka ne amuala bɛkɛdo ɛbolɔ senle nu a.

Ewolebɔlɛ nwo ngilehilelɛ

³¹ “Bɛha ye bieko kɛ, ‘Awie mɔɔ bɔ ɔ ye ewole la ɔhɛlɛ ewolebɔlɛ kɛlata ɔmaa ye.’

³² Noko mame, mese: Ɔnle kɛ awie biala bɔ ɔ ye ewole kyesɛ raalɛ ne ɛva nrenya fofolɛ. Saa tɛ ye zɔhane a ɛnee nrenya ne bamaa raalɛ ne ado awuvolɛvalɛ mɛla ne, yɛɛ nrenya noko mɔɔ kɛgya raalɛ mɔɔ ɛbɔ ewole la to awuvolɛvalɛ mɛla ne.

Ndanehanlɛ nwo ngilehilelɛ

³³ “Bɛde ye bieko kɛ bɛhanle bɛhilele mɔmoane amra kɛ, ‘Mmaka ndandɛla, na di ndane mɔɔ wɔha wɔ Awulae anyunlu la azo.’

³⁴ Noko mame, mese: Bɛmmaka ndane fee. Bɛmmaka anwuma, ɔluakɛ ɔle Nyamenle belemgbunli ebia;

³⁵ bɛmmaka azɛlɛ ye noko, ɔluakɛ ɔle ɔ gyakɛ abo ebia; anzɛɛ Gyɛlusalɛm, ɔluakɛ ɔle Belemgbunli kpole ne suakpole.

³⁶ Mmaka ɛdawɔ mumua ne ɛ ti, ɔluakɛ ɛnrɛhola ɛnrɛhakyi enrinli ko fufule anzɛɛ bile.

³⁷ Bɛmaa bɛ edwɛkɛ ɛyɛ ko, ‘ɛhɛe’ a ‘ɛhɛe’; ‘kyɛkyɛ’ a ‘kyɛkyɛ’. Edwɛkɛ ngakyile biala vi abɔnsam ɛkɛ ne a ba a.

Nzenralɛ nwo ngilehilelɛ

³⁸ “Bɛde kɛ bɛha kɛ, ‘Bɛva ɛnyelɛ bɛzie ɛnyelɛ bo zo’, yɛɛ ‘bɛva egyele bɛzie egyele bo zo’.

³⁹ Noko mame, mese: Saa awie yɛ wɔ ɛtane a, mmasenra ye. Saa awie bɔ ɛ nzo fema ne anu a, kakyi bɛne ne ɔdaye maa ye.

⁴⁰ Saa awie nee wɔ twe manzonle alie wɔ anwuma tɛladeɛ ne a, maa ɔva wɔ bubu ne ɔdaye,

⁴¹ yɛɛ saa awie dua ye tumi zo ahye wɔ mialera nu kɛ ɛ nee ye ɛhɔ adenle kilomita ko a, ɛ nee ye ɛhɔ nwiɔ.

⁴² Awie sɛlɛ wɔ debie a, maa ye bie, yɛɛ mmakakyi ɛ nzi ɛsi mɔɔ kpondɛ kɛ ɔfɛne debie wɔ wɔ ɛkɛ ne la.

Kpɔvolɛma ɛhulolɛ

⁴³ “Bɛde kɛ bɛhanle kɛ, ‘Kulo ɛ gɔnwo mɔ na kpɔ wɔ kpɔvolɛma.’

⁴⁴ Noko mame, mese: Bɛhulo bɛ kpɔvolɛma na bɛzɛlɛ bɛmaa bɛdabɛ mɔɔ bɛyɛ bɛ kpɔdekpɔde la,

⁴⁵ amaa bɛayɛ bɛ Ze mɔɔ wɔ anwuma la amra. Ɔluakɛ yemɔ, ɔmaa ye ezule tɔ na ye ewia fi maa ɛtanevolɛma nee kpalɛyɛlɛma amuala.

⁴⁶ Saa bɛkulo menli mɔɔ kulo bɛ la angome a, ɛnee duzu ahatualɛ a bɛnyia ye wɔ Nyamenle ɛkɛ a? Anzɛɛ tɛ mɔɔ adwuledievolɛma yɛ la ala ɛne?

⁴⁷ Na saa bɛbiza bɛ gɔnwo mɔ angome ahye a, ɛnee duzu debie ngakyile a bɛyɛ bɛmaa yebo zo a? Bɛdabɛ mɔɔ bɛnze Nyamenle bɔbɔ la noko yɛ ye zɔhane ala.

⁴⁸ Zɔhane ati, kɛmɔ bɛ Ze mɔɔ wɔ anwuma la anwo te la, bɛmaa bɛdabɛ noko bɛ nwo ɛde bɔkɔɔ.