Edwɛkpa ne kɛmɔ Mateyu hɛlɛle la 2 - BAEBOLO ANZƐƐ BULUKU NWUANZANWUANZA

Nrɛlɛbɛvolɛma nsa ne

¹ Bɛwole Gyisɛse wɔ sua ne mɔɔ bɛfɛlɛ ye Bɛtelɛhɛm la azo, wɔ Dwudiya maanzinli nu, wɔ mekɛ mɔɔ ɛnee Hɛlɔdo a di belemgbunli la. Nrɛlɛbɛvolɛma bie vi aduduleɛ rale Gyɛlusalɛm

² rabizale kɛ, “Nienwu a yɛkɛnwu Dwuuma belemgbunli ne mɔɔ bɛwo ye la a? Ɔluakɛ yɛnwunle ye ɛwɔlɔra ne mɔɔ dule la wɔ aduduleɛ nehane, na yɛra kɛ yɛbazonle ye.”

³ Belemgbunli Hɛlɔdo dele ɛhye la ye adwenle zɛkyele, na Gyɛlusalɛm amra amuala noko atiakunlu zɛkyele.

⁴ Ɔyieyiale sɛlɛvolɛ mgbanyinli ne nee mɛla kilehilevolɛma ne mɔ amuala na ɔbizale bɛ kɛ, “Nienwu a ɔwɔ kɛ bɛwo Kelaese ne a?”

⁵ Bɛbuale ye kɛ, “Wɔ Bɛtelɛhɛm mɔɔ wɔ Dwudiya la. Zɔhane yɛɛ Nyamenle kpɔmanvolɛ ne hɛlɛle a. Ɔse,

⁶ ‘Na wɔmɔ Bɛtelɛhɛm, mɔɔ wɔ Dwuda maanle nu, ɛnle ekyi wɔ Dwuda maanle nu azuamgbole avinli; ɔluakɛ wɔ ɛkɛ ne yɛɛ mɔɔ barali Yizilayɛma ati anlea me menli ne anwo zo la vi bara a.’ ”

⁷ Yemɔti Belemgbunli Hɛlɔdo vɛlɛle nrɛlɛbɛvolɛma ne mɔ ahane na ɔbizebizale bɛ mekɛ mɔɔ ɛwɔlɔra ne vindele la.

⁸ Ɔwiele la ɔhilele bɛ kɛ bɛhɔ Bɛtelɛhɛm, na ɔvale ɔzɔle zo kɛ, “Bɛhɔ na bɛhɔdɔ alagye bɛkpondɛ kakula ne, saa bɛnwu ye a bɛrabɔ me amaneɛ, amaa medame noko meahɔzonle ye bie.”

⁹ Bɛdiele belemgbunli ne edwɛkɛ ne bɛwiele la bɛhɔle. Bɛkɔ la bɛnwunle ɛwɔlɔra ne mɔɔ bɛnwunle ye wɔ aduduleɛ la bieko; ɔlile bɛ nyunlu toonwo ɔhɔgyinlanle ɛleka mɔɔ kakula ne wɔ la anwuma.

¹⁰ Bɛnwunle ɛwɔlɔra ne la bɛlile fɛlɛko kpole.

¹¹ Bɛwolole sua ne anu na bɛnwunle kakula ne nee ɔ nli Mɛle, na bɛbutule bɛzonlenle ye. Akee bɛzianyinli bɛ awɔlɛ ne mɔ anu na bɛhyɛle ye ezukoa nvutuke, ɛyɛlɛ, yɛɛ alufuanlɛ.

¹² Na Nyamenle hanle bɛ ɛlalɛ kɛ bɛmmasia bɛkɔ Belemgbunli Hɛlɔdo anwo lɔ bieko, yemɔti bɛvale adenle gyɛne zo bɛziale bɛhɔle bɛ maanle nu.

Bɛfa Gyisɛse bɛanriandi bɛahɔ Yigyibiti maanle nu

¹³ Mɔɔ bɛhɔle la, Awulae soanvolɛ yele ɔ nwo hilele Dwosefi wɔ ɛlalɛ nu na ɔzele ye kɛ, “Belemgbunli Hɛlɔdo barakpondɛ kakula ye ahu ye, yemɔti dwazo na fa ye nee ɔ nli nriandi kɔ Yigyibiti maanle nu kɔdɛnla ɛkɛ ne kɔkpula mekɛ mɔɔ menwɔze wɔ kɛ akee ɛvi ɛkɛ ne la.”

¹⁴ Dwosefi dunwuele la ɔvale kakula ne nee ɔ nli na nɔe ne ala ɔzile nu ɔhɔle Yigyibiti;

¹⁵ ɔdɛnlanle ɛkɛ ne toonwo ɔhɔkpulale mekɛ mɔɔ Hɛlɔdo wule la. Ɛhye zile amaa edwɛkɛ ne mɔɔ Awulae luale ye kpɔmanvolɛ ne anwo zo hanle la ayɛ nɔhalɛ kɛ, “Menvɛlɛle me ra ne menvile Yigyibiti.”

Ngakula ne mɔ ɛhunlɛ

¹⁶ Mɔɔ Belemgbunli Hɛlɔdo nwunle kɛ nrɛlɛbɛvolɛma ne mɔ ɛbɛlɛbɛla ye la, ɔvale ɛya kpole, na ɔvale ye adwenle ɔbubule ɔvile mekɛ mɔɔ nrɛlɛbɛvolɛma ne rahanle edwɛkɛ ne hilele ye la, na ɔmanle bɛhɔhunle ngakula mrenya ngyikyi ngyikyi mɔɔ wɔ Bɛtelɛhɛm nee azua mɔɔ zuozua Bɛtelɛhɛm, na bɛli ɛvolɛ nwiɔ nee mɔɔ ɛtɛdwule ɛvolɛ nwiɔ la amuala, kɛmɔ nrɛlɛbɛvolɛma ne zile hilele mekɛ ne la.

¹⁷ Ɛhye manle edwɛkɛ ne mɔɔ Nyamenle kpɔmanvolɛ Gyɛlɛmaya hanle la yɛle nɔhalɛ kɛ:

¹⁸ “Bɛdele menli ne wɔ Releema kɛ bɛlɛsu bɛaye awolɛ. Relahyɛle ɛlɛsu ɔ mra, bɛkpɔda ye a ɔndie, ɔluakɛ ɔ mra ne mɔ ɛwie wu.”

Bɛvi Yigyibiti maanle nu bɛzia

¹⁹ Mɔɔ Belemgbunli Hɛlɔdo wule la, Awulae soanvolɛ hanle Dwosefi ɛlalɛ wɔ Yigyibiti na

²⁰ ɔzele ye kɛ, “Dwosefi, fa kakula ne nee ɔ nli sia kɔ Yizilayɛ azɛlɛ zo, ɔluakɛ menli mɔɔ kpondɛ kakula ne ahu ye la ɛwu.”

²¹ Yemɔti Dwosefi dwazole vale kakula ne nee ɔ nli rale Yizilayɛ.

²² Na mɔɔ Dwosefi dele kɛ Aakɛleeyɛse a ɛli ɔ ze Hɛlɔdo agya na yemɔ a ɔdi belemgbunli wɔ Dwudiya la, ɔzulole kɛ ɔkɛhɔ ɛkɛ ne. Bɛhakyele ye ɛhye wɔ ɛlalɛ nu, zɔhane ati ɔhɔle Galeli maanzinli nu,

²³ na ɔhɔdɛnlanle sua ne mɔɔ bɛfɛlɛ ye Nazalɛte la azo. Ɛhye manle mɔɔ Nyamenle luale ye kpɔmanvolɛma ne mɔ anwo zo hanle la yɛle nɔhalɛ kɛ, “Bɛbavɛlɛ ye Nazalɛtenli.”