Edwɛkpa ne kɛmɔ Mateyu hɛlɛle la 17 - BAEBOLO ANZƐƐ BULUKU NWUANZANWUANZA

Gyisɛse hakyile

¹ Kenle nsia pɛle nu la Gyisɛse vale Pita, Gyemise, yɛɛ ɔ diema Dwɔn hɔle boka kpole bie azo, bɛ ngome ala a bɛwɔ ɛkɛ a.

² Na Gyisɛse hakyile wɔ bɛ nye zo; ɔ nyunlu dale kɛ sɛnzɛne na ye tɛladeɛ ne yɛle fufule nwohyee na ɔdale kɛ neanleɛ.

³ Na bɛnwunle Mosisi nee Yilaegya kɛ bɛ nee Gyisɛse ɛlɛtendɛ.

⁴ Yemɔti Pita hanle hilele Gyisɛse kɛ, “Awulae, ɔle kpalɛ kɛ yɛwɔ ɛke a; saa ɛkulo a mebabɔ nzeseɛ nsa wɔ ɛke; wɔ ɛdeɛ ko, Mosisi ɛdeɛ ko, yɛɛ Yilaegya ɛdeɛ ko.”

⁵ Mɔɔ ɔ nloa wɔ zo ɔlɛtendɛ la, amungu nwohyee bie rahedale bɛ nwo zo, na ɛnelɛ bie vi amungu ne anu zele kɛ, “Me Ra mɔɔ mekulo ye na me nye die ɔ nwo kpalɛ la ɛne, bɛdie ye!”

⁶ Mɔɔ ɛdoavolɛma ne dele ɛnelɛ ɛhye la, ɛzulolɛ kpole hanle bɛ na bɛdule bɛguale, bɛbutubutule bɛ nye aze.

⁷ Gyisɛse rale bɛ nwo ɛkɛ ne na ɔvale ɔ sa ɔhanle bɛ, na ɔzele bɛ kɛ, “Bɛdwazo, bɛmmasulo!”

⁸ Bɛmanle bɛ ti zo la, bɛannwu awie biala kɛ Gyisɛse angomekye ala.

⁹ Mɔɔ bɛvi boka ne azo bɛlɛtolo bɛara la, Gyisɛse bɔle bɛ nloa kɛ, “Bɛmmaka mɔɔ bɛnwu ye la anwo bie bɛkile awie biala kɔkpula mekɛ mɔɔ bɛkɛdwazo Sonla Ra ne bɛkɛvi ewule nu la.”

¹⁰ Na ɛdoavolɛma ne bizale Gyisɛse kɛ, “Duzu ati a mɛla kilehilevolɛma ne se ɔwɔ kɛ Yilaegya dumua ba ɛ?”

¹¹ Gyisɛse buale kɛ, “Ɔle zɔhane kɛ Yilaegya a balumua ara a, na yearatoto debie biala boɛ.

¹² Noko meka meahile bɛ kɛ, Yilaegya ɛra dɛbadɛba, noko menli annwu ye, bɛyɛle ye kɛmɔ bɛdabɛ bɛkulo la. Zɔhane ala noko yɛɛ bɛbayɛ medame, Sonla Ra a.”

¹³ Na ɛdoavolɛma ne dele ɔ bo kɛ Dwɔn Sɔnevolɛ ne a ɔlɛka ɔ nwo edwɛkɛ yeahile bɛ la.

Gyisɛse yɛ kakula nrenya bie mɔɔ sunsum ɛtane wɔ ɔ nwo la ayile

¹⁴ Mɔɔ bɛziale bɛrale menli dɔɔnwo ne anu la, nrenya bie rahotole Gyisɛse anyunlu ɛkɛ ne

¹⁵ na ɔzɛlɛle ye kɛ, “Yɛmenle, nwu me ra nrenya ye anwunvɔne! Mgbutike wɔ ɔ nwo, na saa ɔto ye a ɔpɛ ye ɔto senle anzɛɛ nzule nu.

¹⁶ Menvale ye membɛlɛle wɔ ɛdoavolɛma ye, na bɛangola ye ayile yɛ.”

¹⁷ Gyisɛse buale kɛ, “Bɛmɛ mɔɔ bɛnlɛ diedi na bɛfo a! Me nee bɛ ɛdɛnla, menyia bɛ nwo abotane ɔhɔdwu kenlenzu? Fa kakula nrenya ne bɛla ɛke.”

¹⁸ Gyisɛse deanle sunsum ɛtane ne mɔɔ wɔ kakula ne anwo la nu, na ɔvi ɔ nwo ɔdule, na kakula ne dele kpɔkɛ ɛkɛ ne ala.

¹⁹ Nzinlii ɛdoavolɛma ne rale Gyisɛse anwo ɛkɛ na bɛbizale ye kɛ, “Duzu ati a yɛangola sunsum ɛtane ne tu a?”

²⁰ Gyisɛse buale bɛ kɛ, “Ɔluakɛ bɛ diedi le ekyi la ati ɔ. Nɔhalɛ, meka meahile bɛ kɛ, saa bɛ diedi ne kpole le kɛ ‘mɛsetade’ ma kunlu ma ekyi bie bɔbɔ a, anrɛɛ bɛbahola bɛaze boka ɛhye kɛ, ‘Tudu kɔ nehane!’ na ɔkɛhɔ; eza debie biala ɛyɛlɛ ɛnrɛyɛ se ɛnrɛmaa bɛ. [

²¹ Noko akee kyesɛ nzɛlɛlɛ nee ɛhɔnehyelɛ ala na ahola deɛ ɛhye tu.”]

Gyisɛse ka ye ewule nwo edwɛkɛ bieko

²² Mɔɔ ɛdoavolɛma ne amuala anloa yiale Galeli la, Gyisɛse zele bɛ kɛ, “Bɛbaye medame Sonla Ra bɛamaa menli

²³ bɛamaa bɛahu me; na ye kenle nsa ne azo Nyamenle badwazo me ara ngoane nu.” Na alɔbɔlɛ hanle ɛdoavolɛma ne.

Ɛzonlenlɛ Sua ne adwule ɛdualɛ

²⁴ Mɔɔ Gyisɛse nee ye ɛdoavolɛma ne rale Kapɛnayɛm la, menli mɔɔ dielie Ɛzonlenlɛ Sua ne adwule ne la rabizale Pita kɛ, “Asoo wɔ kilehilevolɛ ne tua Ɛzonlenlɛ Sua adwule ne?”

²⁵ Pita buale kɛ, “Kɛmɔti ɛ, ɔtua!” Na mɔɔ Pita dwule sua nu la Gyisɛse a lumuale dendɛle a, na ɔbizale ye kɛ, “Saemɔn, kɛ wɔ adwenle se wɔ ɛ? Nwane mɔ a tua adwule anzɛɛ tua ninyɛne nwo adwule maa aleɛabo arelemgbunli a, ezuavolɛ anzɛɛ nyɛvolɛ?”

²⁶ Pita buale kɛ, “Nyɛvolɛ ɔ.” Gyisɛse zele kɛ, “Saa nyɛvolɛ a tua a, se ɛnee ɔkile kɛ ezuavolɛ ne ɛndua bie.

²⁷ Na amaa yɛanvo menli ɛhye mɔ la, kɔ tandane ne anu kɔdo koba, na fɛlɛ mɔɔ ɛkɛlumua ɛkɛhye ye la ɛkɛnwu kɛ ezukoa zia ɔ nloa anu mɔɔ sa me nee wɔ adwule ne tua a; fa kɔdua me nee wɔ yɛ ɛdeɛ ne.”