Edwɛkpa ne kɛmɔ Mateyu hɛlɛle la 14 - BAEBOLO ANZƐƐ BULUKU NWUANZANWUANZA

Dwɔn Sɔnevolɛ ne ewule

¹ Mekɛ ne anu ala Hɛlɔdo mɔɔ ɛnee le amɛnlado mɔɔ sie Galeli maanle ne la dele Gyisɛse nganeɛ,

² na ɔzele ye sonvolɛma ne kɛ, “Dwɔn Sɔnevolɛ ne ala a ɛzia ɛra ngoane nu bieko la, yemɔti a ɔlɛdi tumi gyima mgbole ɛhye mɔ a.”

³ Na yemɔ a le kɛ, Hɛlɔdo manle bɛhyele Dwɔn, bɛguale ye nwɔnzɔnwɔnzɔ na bɛdole ye efiade. Ɔ diema Felepe aye Hɛlɔdease ati a ɔyɛle ɛhye a,

⁴ ɔluakɛ Dwɔn hanle hilele ye fane dɔɔnwo kɛ, “Ɔnle amaamuo kpalɛ kɛ ɛkɛgya Hɛlɔdease.”

⁵ Yemɔti Hɛlɔdo dwenlenle nwo kɛ ɔku Dwɔn, noko ɛnee ɔsulo Dwuuma ne, ɔluakɛ ɛnee bɛva Dwɔn kɛ ɔle Nyamenle kpɔmanvolɛ.

⁶ Kenle ko Hɛlɔdo awolɛ kenle dwule na ɔdi ye ɛvoyia la, Hɛlɔdease ara raalɛ ne razile agole lieliele menli ne anye. Hɛlɔdo anye liele ye agolezilɛ ne anwo kpole,

⁷ na ɔhanle ndane ɔbɔle ye ɛwɔkɛ kɛ debie biala mɔɔ ɔkɛbiza la ɔkɛva ɔkɛmaa ye.

⁸ Kakula raalɛ ne hɔbizale ɔ nli Hɛlɔdease adwenle la, ɔzele ye kɛ ɔbiza ɔlie Dwɔn Sɔnevolɛ ne ati. Na kakula ne hɔhanle hilele Hɛlɔdo kɛ, “Medie Dwɔn Sɔnevolɛ ne ati wɔ apawa nu ɛke kɛkala.”

⁹ Nyane hanle belemgbunli ne, noko kɛmɔ yeha ndane wɔ ye nyɛvolɛ ne mɔ anyunlu la ati, ɔhanle kɛ bɛyɛ mɔɔ kakula raalɛ ne kpondɛ la bɛmaa ye.

¹⁰ Yemɔti Hɛlɔdo manle bɛhɔpɛle Dwɔn ati wɔ efiade ne.

¹¹ Bɛvale tile ne bɛdole apawa nu bɛrɛlɛle kakula raalɛ ne, na ɔdaye noko ɔvale ɔhɔmanle ɔ nli.

¹² Dwɔn ɛdoavolɛma ne raliele funli ne hɔziele ye, na bɛhɔbɔle Gyisɛse amaneɛ.

Gyisɛse maa menli apenle nnu aleɛ

¹³ Mɔɔ Gyisɛse dele Dwɔn Sɔnevolɛ ne ewule amaneɛ la, ɔvole ɛlɛne nu ɔvile ɛkɛ ne, ɔ ngomekye ɔhɔle ɛleka bie mɔɔ ɛkɛ ne le sulokoko la. Menli ne dele la, bɛvi bɛ azua ne mɔ azo bɛvale aze bɛdoale ye.

¹⁴ Gyisɛse tolole rale azule ne anloa na ɔnwunle menli dɔɔnwo ne la, ɔlile bɛ nwo nyane na ɔyɛle wuleravolɛma mɔɔ wɔ nu la ayile ɔmanle bɛdele kpɔkɛ.

¹⁵ Ɔdwule nɔsolɛ nu la, ye ɛdoavolɛma ne rahanle hilele ye kɛ, “Aleɛ asɛɛ ɛdwo, yɛɛ ɛke noko ɛmbikye sua zo; yemɔti maa menli ne adenle maa bɛhɔ namunamu ne mɔ azo bɛhɔkpondɛ debie bɛli.”

¹⁶ Gyisɛse zele bɛ kɛ, “Ɔngyia kɛ bɛkɛhɔ; bɛdabɛ bɛmaa bɛ debie bɛli.”

¹⁷ Bɛbuale ye kɛ, “Yɛnlɛ debie biala wɔ ɛke kɛ kpanwo mumua nnu yɛɛ fɛlɛ nwiɔ ala.”

¹⁸ Gyisɛse zele bɛ kɛ, “Bɛva bɛrɛlɛ me.”

¹⁹ Akee ɔmanle menli ne mɔ dɛnlanle aze wɔ ndile ne azo, ɔvale kpanwo mumua nnu ne nee fɛlɛ nwiɔ ne; ɔnleanle anwuma na ɔyɛle Nyamenle mo. Ɔbubule nuhua na ɔvale ɔmanle ye ɛdoavolɛma ne, na ɛdoavolɛma ne vale manle menli ne.

²⁰ Na bɛ muala bɛlile na bɛ ko yile. Nzinlii ɛdoavolɛma ne sesale ɔ bo zo ne ahɛndɛne bulu nee nwiɔ.

²¹ Na bɛdabɛ mɔɔ bɛlile la, saa ɛye mraalɛ nee ngakula ne mɔ nu a, bɛlua mrenya kɛyɛ apenle nnu.

Gyisɛse tia azule nye

²² Akee Gyisɛse manle ye ɛdoavolɛma ne vole ɛlɛne nu na bɛlumuale ɔ nyunlu wɔ tandane ne anzi lɔ, na yemɔ ɔnleanle ɔmanle menli ne zandele.

²³ Mɔɔ menli ne hɔle la, ɔdaye ɔ ngome ɔhɔle boka ne azo kɛ ɔkazɛlɛ. Aleɛ muanle nwo la, ɛnee yeha ɔdaye ɔ ngome ala wɔ ɛkɛ ne;

²⁴ zɛhae mekɛ ne anu ɛnee ɛlɛne ne ɛhɔ moa na azudulɛ ne bɔ ye mgbaka, ɔluakɛ ɛnee anwoma ne bɔ tia ye.

²⁵ Mɔɔ ɔdwule akɔlɛmɔleɛ la, Gyisɛse diale azule ne anye na ɔrale bɛ nwo ɛkɛ ne.

²⁶ Mɔɔ ɛdoavolɛma ne nwunle ye kɛ ɔlɛtia azule ne anye yeara la, ɛzulolɛ hanle bɛ na bɛdeɛdeanle nu bɛzele kɛ, “Nwomenle o, nwomenle o!”

²⁷ Na ɛkɛ ne ala Gyisɛse zele bɛ kɛ, “Bɛmmasulo, bɛha bɛ ahonle bɛdo azule nu na medame ɔ.”

²⁸ Pita hanle kɛ, “Awulae, saa ɛdawɔ amgba a, ɛnee maa adenle maa medame mendia azule ye anye membɛla ɛ nwo ɛkɛ.”

²⁹ Gyisɛse zele ye kɛ, “Bɛla!” Yemɔti Pita vi ɛlɛne ne anu dwule na ɔbɔle ɔ bo kɛ ɔtia azule ne anye yeahɔ Gyisɛse anwo lɔ.

³⁰ Na mɔɔ ɔnwunle kɛ anwoma ne anloa yɛ se la, ye ahonle dule, na ɔbɔle ɔ bo kɛ ɔnoma. Na ɔdeanle nu kɛ, “Awulae, die me!”

³¹ Ɛkɛ ne ala Gyisɛse denrɛle ɔ sa zɔle ye na ɔzele ye kɛ, “O nrenyakpa, wɔ diedi le ekyi! Duzu ati a ɛ ti anu yɛle wɔ kesee ɛ?”

³² Bɛ mu nwiɔ bɛvole ɛlɛne ne anu, na anwoma ne gyinlanle.

³³ Na ɛdoavolɛma ne mɔɔ wɔ ɛlɛne ne anu la rayeyɛle Gyisɛse zele kɛ, “Nɔhalɛ, wɔmɔ a ɛle Nyamenle Ara ne!”

Gyisɛse yɛ wuleravolɛma ayile wɔ Gɛnɛzalɛte

³⁴ Gyisɛse nee ye ɛdoavolɛma ne pɛle tandane ne hɔle Gɛnɛzalɛte,

³⁵ na menli mɔɔ wɔ ɛkɛ ne la nwunle ye. Yemɔti bɛmanle bɛhɔvale wuleravolɛma mɔɔ wɔ namunamu nee azua mɔɔ bikye ɛkɛ ne la azo la bɛrale na

³⁶ bɛzɛlɛle Gyisɛse kɛ ɔmaa wuleravolɛma ne adenle ɔmaa bɛva bɛ sa bɛha ye tɛladeɛ ne anloa bɔbɔ ala. Na bɛdabɛ mɔɔ bɛvale bɛ sa bɛhanle ye tɛladeɛ ne la amuala dele kpɔkɛ.