Edwɛkpa ne kɛmɔ Luku hɛlɛle la 4 - BAEBOLO ANZƐƐ BULUKU NWUANZANWUANZA

Abɔnsam sɔ Gyisɛse anlea

¹ Gyisɛse vi Azule Dwɔdan ne anloa ziale rale la ɛnee Sunsum Nwuanzanwuanza ne ɛyi ye tɛkɛɛ. Sunsum ne vale ye hɔle fienemgbole ne anu

² na abɔnsam zɔle ye nleanle kenle abulanla. Yeanli debie biala wɔ mekɛ zɔhane anu, yemɔti mɔɔ ɔwiele la ɛhɔne hunle ye.

³ Abɔnsam zele ye kɛ, “Saa wɔmɔ a ɛle Nyamenle Ara ne a, ɛnee maa bolɛ ɛhye ɛhakyi kpanwo.”

⁴ Gyisɛse buale ye kɛ, “Nyamenle Edwɛkɛ ne se, ‘Tɛ kpanwo angome a sonla di nyia ngoane a.’ ”

⁵ Abɔnsam vale ye hɔle anwuma na ɛkɛ ne ala ɔvale aleɛabo arelemgbunli maanle maanle kɔsɔɔti ɔhilele ye,

⁶ na ɔzele ye kɛ, “Mebava tumi ɛhye nee anwonyia ɛhye mɔ amuala meamaa wɔ. Bɛva bɛ muala bɛwula me sa nu, na mekola mefa memaa awie biala mɔɔ mekulo la.

⁷ Zɔhane ati saa ɛbɔ ɛ ti aze ɛmaa me, ɛsonle me a, ye kɔsɔɔti bayɛ wɔ ɛdeɛ.”

⁸ Gyisɛse buale ye kɛ, “Nyamenle Edwɛkɛ ne se, ‘Yeyɛ Awulae wɔ Nyamenle ne na sonle ɔdaye ɔ ngomekye.’ ”

⁹ Abɔnsam eza vale ye hɔle Gyɛlusalɛm na ɔvale ye ɔhɔziele Ɛzonlenlɛ Sua ne ati twɔɔnwo ne azo anwuma na ɔzele ye kɛ, “Saa ɛle Nyamenle Ara a, ɛnee gyakyi ɛ nwo te aze.

¹⁰ Ɔluakɛ Nyamenle Edwɛkɛ ne se, ‘Nyamenle kɛmaa ye soanvolɛma kɛnlea wɔ gyɛlɛɛnye.’

¹¹ Eza bɛhɛlɛ ye kɛ, ‘Bɛbazɔ wɔ bɛ sa nu anwuma amaa wɔanva ɛ gyakɛ wɔamkpula bolɛ.’ ”

¹² Gyisɛse buale kɛ, “Nyamenle Edwɛkɛ ne se, ‘Mmasɔ Awulae wɔ Nyamenle ne ɛnea.’ ”

¹³ Mɔɔ abɔnsam zɔle Gyisɛse nleanle wɔ adenle biala anu wiele la, ɔvile ɔ nwo ɛkɛ ne ɔhwenle ɔ nzi ekyii ɔhɔhendɛle mekɛ mɔɔ ɔkɛnyia Gyisɛse anwo adenle kpalɛ bieko la.

Gyisɛse bɔ ye gyima bo wɔ Galeli

¹⁴ Gyisɛse ziale rale Galeli, na ɛnee Sunsum Nwuanzanwuanza ne tumi ne wɔ ɔ nwo. Ye nganeɛ dendenle hɔle maanle ne amuala anu.

¹⁵ Ɔhilehilele wɔ bɛ nyianu azua ne mɔ anu na awie biala yele ye ayɛlɛ.

Bɛkpo Gyisɛse wɔ Nazalɛte

¹⁶ Gyisɛse akee hɔle Nazalɛte, ɛleka mɔɔ bɛtetele ye la, ɔhɔle nyianu sua ne anu Ɛnwomenlelielɛ Kenle ne, kɛmɔ ɔyɛ ye dahuu la, na ɔdwazole kɛ ɔkenga Nyamenle Edwɛkɛ ne.

¹⁷ Bɛvale Nyamenle kpɔmanvolɛ Ayezaya nwoma ne bɛmanle ye. Ɔbukele ɛleka mɔɔ bɛhɛlɛ ye kɛ,

¹⁸ “Awulae Sunsum ne wɔ me nwo zo, ɔboalekɛ yekpa nu yeye me kɛ menva Edwɛkpa ne membɛlɛ ehyianvolɛma. Yezoa me kɛ membɔ fanwodi nwo nolo mengile bɛdabɛ mɔɔ bɛhye bɛ nuokɛ la, na memaa anyenzinliravolɛma ɛnwu debie. Menye bɛdabɛ mɔɔ bɛlɛsisi bɛ la menvi anwongyelelɛ nu,

¹⁹ na membɔ nolo kɛ mekɛ ɛdwu mɔɔ Awulae balie ye menli ngoane a.”

²⁰ Gyisɛse wiele la, ɔbubule nwoma ne na ɔvale ɔmanle sonvolɛ ne na akee ɔdɛnlanle aze. Bɛdabɛ mɔɔ bɛwɔ nyianu sua ne anu la amuala hakyile bɛ nye wɔ ɔ nwo,

²¹ na ɔzele bɛ kɛ, “Ɛnɛ kenle ye Nyamenle Edwɛkɛ ɛhye ɛra nuhua, kɛmɔ bɛdabɛ bɛde ala la.”

²² Bɛ muala bɛ nye liele ɔ nwo na ye ɛdendɛlɛ bɔbɔ zinle bɛ nwo, na bɛzele kɛ, “Asoo tɛ Dwosefi ara ye ɛ?”

²³ Na ɔzele bɛ kɛ, “Meze kɛ bɛbaha bɛahile me kɛ, ‘Ninsinli, ɛdawɔ yɛ ɛ nwo ayile!’ Eza bɛbaha bɛahile me kɛ, ‘Ninyɛne mɔɔ ɛyɛle wɔ Kapɛnayɛm la, yɛde bɛ nganeɛ wɔ ɛke, yemɔti yɛ bie maa yɛnlea.’ ”

²⁴ Gyisɛse zɔle zo hanle kɛ, “Meka ko ɛhye meahile bɛ: Nyamenle kpɔmanvolɛ biala ɛnlɛ ɔ nyunlu wɔ ye sua zo.

²⁵ “Bɛdie mɔɔ meka la. Ɔle nɔhalɛ kɛ Yilaegya mekɛ zo, ezule andɔ toonwo ɛvolɛ nsa siane nsia, na sane kpole zile maanle ne kpokpoti anu.

²⁶ Mekɛ ne anu ɛnee ahunlanvolɛ mraalɛ dɔɔnwo wɔ Yizilayɛ, noko bɛanzoa Yilaegya wɔ biala anwo kɛ kunlanvolɛ raalɛ bie mɔɔ wɔ Zalɛfate mɔɔ wɔ Saedɛn maanzinli nu la ala.

²⁷ Eza Nyamenle kpɔmanvolɛ Yilaehya mekɛ zo ɛnee kokobɛvolɛma dɔɔnwo wɔ Yizilayɛ maanle ye anu noko bɛammaa biala anwo anza kɛ Neeyaman mɔɔ vi Selea la ala.”

²⁸ Mɔɔ bɛdabɛ mɔɔ bɛwɔ nyianu sua ne anu la dele ɛhye la, ɛya hunle bɛ kpole.

²⁹ Bɛzɔle ye nu na bɛhwenlenle ye bɛvile suakpole ne azo bɛhɔle boka ne mɔɔ bɛhye suakpole ne zolɛ la abati kɛ bɛkavuandi ye bɛado kuma ne anu.

³⁰ Na Gyisɛse luale bɛ avinli ɛkɛ ne ala hɔle ye ɛleka bie.

Nrenya bie mɔɔ sunsum ɛtane wɔ ɔ nwo la

³¹ Akee Gyisɛse hɔle Galeli maanzinli nu suakpole bie mɔɔ bɛfɛlɛ ye Kapɛnayɛm la azo, na ɔhilehilele menli ne wɔ Ɛnwomenlelielɛ Kenle ne.

³² Ye ngilehilelɛ ne zinle bɛ nwo, ɔluakɛ ɔfa tumi a ɔtendɛ a.

³³ Nrenya ko wɔ nyianu sua ne anu mɔɔ ɛnee sunsum ɛtane wɔ ɔ nwo a; na ɔdeanle nu ɔzele kɛ,

³⁴ “Aa! Wɔmɔ Gyisɛse mɔɔ ɛvi Nazalɛte, kɛ yɛze wɔ ɛ? Wɔra kɛ ɛbazɛkye yɛ ɔ? Meze wɔ sonlazule. Wɔmɔ a ɛle Nyamenle Sonla ne mɔɔ anwo te la!”

³⁵ Gyisɛse deanle sunsum ɛtane ne nu zele kɛ, “Yɛ koonwu na ɛvi ɔ nwo tu!” Sunsum ɛtane ne manle nrenya ne pɛle finle menli ne anyunlu ɛkɛ na ɔvile ɔ nwo ɔdule, noko nrenya ne anwo ambu ɛbonle.

³⁶ Ɔyɛle bɛ muala azibɛnwo na bɛhanle bɛhilele bɛ nwo ngoko kɛ, “Duzu edwɛkɛ a le ɛhye? Nrenya ɛhye lɛ tumi ɔfa ɔtea sunsum ɛtane ne mɔ nu ɔmaa bɛfi menli nwo bɛtu.”

³⁷ Na Gyisɛse nganeɛ dendenle hɔle maanzinli ne anu amuala.

Gyisɛse yɛ menli dɔɔnwo ayile

³⁸ Gyisɛse vile nyianu sua ne anu na ɔhɔle Saemɔn sua nu la, ɛnee ɛyɛlɛyɛlɛ gyi Saemɔn aye ɔ nli ne anwo, na bɛhanle bɛhilele Gyisɛse.

³⁹ Ɔhɔle ɔhɔgyinlanle ye ɛkpa ne anwo na ɔzele kɛ ɛyɛlɛyɛlɛ ne vi ɔ nwo ɛdu. Ɔ nwo zale ɛkɛ ne ala, na ɔdwazole ɔkpondɛle debie ɔmanle bɛ.

⁴⁰ Mɔɔ sɛnzɛne ne ɛlɛkɔ ahɔdɔ la, bɛdabɛ mɔɔ bɛlɛ agɔnwolɛma mɔɔ ewule ngakyile ɛha bɛ la vale bɛ rɛlɛle Gyisɛse, na ɔvale ɔ sa ɔguguale bɛ nwo zo ngoko ngoko, ɔyɛle bɛ muala ayile ɔmanle bɛ nwo zale.

⁴¹ Sunsum ɛtane ne mɔ noko vi menli dɔɔnwo anwo nriandile, na bɛdeɛdeanle nu kɛ, “Wɔmɔ a ɛle Nyamenle Ara ne a!” Gyisɛse duale sunsum ɛtane ne mɔ, yeamaa bɛandendɛ bieko, ɔluakɛ bɛze kɛ yemɔ a ɔle Mɛzaya ne a.

Gyisɛse bɔ Edwɛkpa ne nolo wɔ nyianu azua ne mɔ anu

⁴² Aleɛ hyenle la, Gyisɛse vi sua ne azo hɔle ɛleka sulokoko bie. Menli ne kpondɛle ye na bɛnwunle ye la, bɛbɔle mɔdenle kɛ bɛnrɛmaa ɔnrɛvi sua ne azo bieko.

⁴³ Na ɔzele bɛ kɛ, “Ɔwɔ kɛ mebɔ Edwɛkpa ne mɔɔ fane Nyamenle Belemgbunlililɛ ne anwo la nolo wɔ azua mɔɔ ɛha la azo noko, ɔluakɛ ɛhye ati yɛɛ Nyamenle zoanle me a.”

⁴⁴ Yemɔti ɔhɔbɔle Edwɛkpa ne nolo wɔ nyianu azua ne mɔ mɔɔ wɔ Dwudiya maanzinli ne anu la amuala anu.