Edwɛkpa ne kɛmɔ Luku hɛlɛle la 20 - BAEBOLO ANZƐƐ BULUKU NWUANZANWUANZA

Gyisɛse tumi ne anwo kpuyia

¹ Kenle ko Gyisɛse wɔ Ɛzonlenlɛ Sua ne anu ɔlɛkilehile na ɔbɔ Edwɛkpa ne nolo la, sɛlɛvolɛ mgbanyinli ne, mɛla kilehilevolɛma ne, yɛɛ mgbanyima ne mɔ

² rabizale ye kɛ, “Ka kile yɛ, duzu tumi a ɛlɛ, kɛ ɔwɔ kɛ ɛyɛ ninyɛne ɛhye mɔ a? Nwane a manle wɔ tumi ne a?”

³ Gyisɛse buale bɛ kɛ, “Bɛmaa medame noko membiza bɛ edwɛkɛ ko. Bɛha bɛhile me,

⁴ Dwɔn Sɔnevolɛ ne tumi ne mɔɔ ɔvale ɔzɔnenle menli la, ɔvi Nyamenle anzɛɛ sonla?”

⁵ Bɛbɔle ɔ bo kɛ bɛsu bɛ nwo kpolera kɛ, “Duzu edwɛkɛ a yɛha a? Saa yɛka kɛ, ‘Ɔvi Nyamenle’ a, ɔkɛha kɛ, ‘Ɛnee duzu ati a bɛanlie Dwɔn bɛanli a?’

⁶ Saa yɛka noko kɛ, ‘Ɔvi sonla’ a, menli ɛwolaa ye mɔɔ wɔ ɛke la amuala kɛzi yɛ awolɛ, ɔboalekɛ bɛdie bɛto nu kɛ Dwɔn le Nyamenle kpɔmanvolɛ.”

⁷ Yemɔti bɛbuale ye kɛ, “Yɛnze ɛleka mɔɔ ye tumi ne vi a.”

⁸ Na Gyisɛse zele bɛ kɛ, “Ɛnee medame noko menrɛha tumi holɛ ko mɔɔ mefa meyɛ ninyɛne ɛhye mɔ la menrɛhile bɛ.”

Abunsama mɔɔ wɔ vanye tola ne anu la anwo ɛrɛlɛ

⁹ Akee Gyisɛse bule menli ne ɛrɛlɛ ɛhye kɛ, “Nrenya bie hyele ye tola na ɔluale vanye ma wɔ nu. Ɔvale ɔmanle abunsama na ɔhɔle maanle zo ɔhɔhyɛle kpalɛ.

¹⁰ Ɛbuhenle ne dwule la, ɔzoanle ye sonvolɛ ko ɔmanle ɔhɔzele abunsama ne kɛ bɛva ye ɛkpɔ ɛdeɛ bɛmaa ɔrɛlɛ ye. Na abunsama ne bole ye na bɛmanle ɔlɛle ɔ sa mgbane ɔhɔle.

¹¹ Yemɔti ɔzoanle sonvolɛ fofolɛ, na ɔdaye noko bɛbole ye, bɛzale ye, na bɛmanle ɔlɛle ɔ sa mgbane ɔhɔle.

¹² Akee ɔzoanle ye sonvolɛ ne mɔɔ tɔ zo nsa la, na abunsama ne bodɛbodale ye, na bɛvuandinle ye bɛdole tola ne anzi lɔ.

¹³ Na tola menle ne zele kɛ, ‘Duzu a menyɛ a? Mesoa medame me ra ye mɔɔ mekulo ye la; medie medi kɛ bɛkɛli ye eni!’

¹⁴ Na mɔɔ abunsama ne nwunle ye la, bɛhanle bɛhilele bɛ nwo ngoko kɛ, ‘Ɛya menle ne ara ne ɛne. Bɛmaa yɛhu ye na ye agyadeɛ ne ɛyɛ yɛ ɛdeɛ.’

¹⁵ Yemɔti bɛvuandinle ye bɛdole ɛya ne anzi lɔ na bɛhunle ye.” Gyisɛse bizale bɛ kɛ, “Ɛnee akee duzu a tola menle ne kɛyɛ abunsama ne ɛ?

¹⁶ Ɔkɛrahu abunsama ne mɔ amuala, na ɔkɛva ɛya ne ɔkɛwula abunsama fofolɛ asa anu.” Menli ne mɔ dele ɛhye la, bɛzele kɛ, “Kyɛkyɛ, ɔnrɛyɛ ye zɔhane.”

¹⁷ Gyisɛse nleanle bɛ koonwu na ɔbizale bɛ kɛ, “Ɛnee akee kɛ Nyamenle Edwɛkɛ ɛhye abo se ɛ? ‘Bolɛ ne mɔɔ suasivoma ne kpole la, ɛrayɛ bolɛ mɔɔ anwo hyia kpole kpalɛ a.’

¹⁸ “Awie biala mɔɔ kɛdɔ bolɛ zɔhane azo la, ɔbatete nzokanzoka; yɛɛ saa ɔtɔ awie anwo zo a, ɔbabɛtɛ ye kɛ tata.”

Adwuledualɛ nwo kpuyia

¹⁹ Mɛla kilehilevolɛma ne nee sɛlɛvolɛ mgbanyinli ne mɔ yɛle kɛ bɛkye Gyisɛse ɛkɛ ne ala, ɔboalekɛ bɛze kɛ ɔbule ɛrɛlɛ ne ɔtiale bɛ; noko akee bɛzulole menli ne anye.

²⁰ Yemɔti bɛtetɛle ye. Bɛmanle menli bie ndoloboa bɛmanle bɛyɛle bɛ nwo kɛ asɛɛ bɛdi nɔhalɛ, na bɛzoanle bɛ kɛ bɛhɔdo Gyisɛse abɛla bɛbizebiza ye edwɛkɛ, amaa saa ɔ nloa fo a bɛahye ye na bɛava ye bɛahɔmaa Wulomu Amɛnlado ne ali ye edwɛkɛ.

²¹ Menli ɛhye mɔ zele Gyisɛse kɛ, “Kilehilevolɛ, yɛze kɛ mɔɔ ɛka nee mɔɔ ɛkilehile la le fɔɔnwo. Yɛze kɛ wɔmɔ ɛnnea sonla nyunlu yɛɛ ɛndie menli ngehaleɛ, na ɛkilehile Nyamenle ɛhulolɛdeɛ ne nɔhalɛ nu.

²² Ka kile yɛ, asoo yɛ mɛla ne tua kɛ yɛmmatua adwule yɛmaa Wulomu Maanle Maanle Belemgbunli ne anzɛɛ ɔwɔ kɛ yɛtua?”

²³ Na Gyisɛse nwunle bɛ agyiba ne anzi na ɔzele bɛ kɛ,

²⁴ “Bɛva dwɛtɛ fufule bɛrɛla bɛmaa menea. Nwane nvoninli nee ye duma a wɔ zolɛ la?” Bɛzele ye kɛ, “Wulomu Maanle Maanle Belemgbunli ne ɔ.”

²⁵ Yemɔti Gyisɛse zele bɛ kɛ, “Ɛnee mɔɔ le Wulomu Maanle Maanle Belemgbunli ne ɛdeɛ la, bɛdua bɛmaa ye, na bɛdua mɔɔ le Nyamenle noko ɛdeɛ la bɛmaa ye.”

²⁶ Gyisɛse nyelebɛnloa ne zinle bɛ nwo, yemɔti bɛ sa anga ye wɔ debie biala anu wɔ menli ne anyunlu ɛkɛ ne, na bɛhanle bɛ nloa bɛdole nu.

Ewudwazo nwo kpuyia

²⁷ Akee Sadusiima bie noko rale Gyisɛse ɛkɛ ne. Menli ɛhye mɔ se sonla wu a bɛnrɛdwazo ye bɛnrɛra ngoane nu. Bɛbizale Gyisɛse kɛ,

²⁸ “Kilehilevolɛ, Mosisi hɛlɛle mɛla ɛhye manle yɛ, ɔse: ‘Saa nrenya wu na ɔgyakyi ɔ ye mɔɔ ɔ nee ye anwo la a, ɔwɔ kɛ ɔ diema gya kunlanvolɛ raalɛ ne, na ɔ nee ye wo mralɛ maa ɔ diema ne mɔɔ ɛwu la.’

²⁹ Na mediema nsuu bie ɛnee wɔ ɛkɛ. Bɛ nuhua kpanyinli ne gyale raalɛ na ɔ nee ye anwo yɛɛ ɔwule a.

³⁰ Adiema ne mɔɔ tɔ zo nwiɔ la gyale raalɛ ne,

³¹ eza mɔɔ tɔ zo nsa la gyale ye. Zɔhane ala yɛɛ bɛdabɛ nsuu ne amuala bɛyɛle a. Bɛ biala nee ye anwo na yeawu.

³² Nzinlii raalɛ ne ɔdaye ɔwule.

³³ Ɛnee akee kenle mɔɔ mɔwuamra kɛdwazo kɛra ngoane nu la, boni aye ɔ? Bɛdabɛ nsuu ne amuala bɛgyale ye bie.”

³⁴ Gyisɛse buale bɛ kɛ, “Adwuleso mrenya nee mraalɛ gya bɛ nwo,

³⁵ na mrenya nee mraalɛ mɔɔ anwo fɛta Nyamenle Belemgbunlililɛ ne la, saa mekɛ ne dwu na bɛdwazo bɛ bɛfi ewule nu a bɛngya bɛ nwo.

³⁶ Bɛbayɛ kɛ anwuma soanvolɛma la na bɛnrɛwu ɛlɛ. Bɛle Nyamenle amra, ɔboalekɛ bɛdwazo bɛ bɛvi ewule nu.

³⁷ Mosisi noko kile nu wienyi kɛ bɛdwazo mɔwuamra bɛba ngoane nu. Nyamenle Edwɛkɛ ne mɔɔ fane ɛbɔ ne mɔɔ ɛnee ɛlɛsɔ la anwo la, Mosisi ka kɛ Awulae le ‘Ebileham Nyamenle, Ayezeke Nyamenle, yɛɛ Gyekɔbo Nyamenle.’

³⁸ Ɛhye kile kɛ ɔle teasema Nyamenle, ɔnle bɛdabɛ mɔɔ bɛwu la Nyamenle; ɔluakɛ ɔ nye zo a bɛ muala bɛde ngoane nu.”

³⁹ Mɛla kilehilevolɛma ne bie mɔ zele kɛ, “Kilehilevolɛ, wɔ nyelebɛnloa ne le kpalɛ bɔkɔɔ!”

⁴⁰ Na ɔvi kenle ko ne bɛangola ye kpuyia bieko biza.

Mɛzaya ne anwo kpuyia

⁴¹ Gyisɛse bizale bɛ kɛ, “Kɛmɔti a bɛka kɛ Mɛzaya ne bayɛ Devidi anlɔnra ɛ?

⁴² Ɔluakɛ Devidi mumua ne ka ye wɔ Edwɛndolɛ Buluku ne anu kɛ, ‘Awulae zele me Awulae kɛ, tɛnla me fema zo ɛke,

⁴³ kɔkpula kɛ menwɔva wɔ kpɔvolɛma menwɔyɛ ɛ gyakɛ abo ebia.’

⁴⁴ Saa Devidi vɛlɛle ye ‘Awulae’ a, ɛnee kɛ ɔsi mɔɔ Mɛzaya ne yɛ ye anlɔnra ɛ?”

Gyisɛse bɔ kɔkɔ wɔ mɛla kilehilevolɛma anwo

⁴⁵ Gyisɛse akee zele ye ɛdoavolɛma ne mɔ wɔ menli ne amuala anyunlu ɛkɛ ne kɛ,

⁴⁶ “Bɛnlea boɛ wɔ mɛla kilehilevolɛma ne anwo; bɛmɛ, mɔɔ bɛkulo la a le adɛladeɛ ndendenle ɛwulalɛ, gua zo ɛkpɔsalɛ nee menli mɔɔ bɔ bɛ ti aze abiza bɛ ahye wɔ gua nu la; bɛkulo nyianu azua nu mgbanyinli ɛleka nee ɛkponledolɛ bo ɛleka kpalɛ ne mɔ ɛdɛnlanlɛ.

⁴⁷ Bɛbɛlɛbɛla ahunlanvolɛ mraalɛ bɛbɔ bɛ awuke ne mɔ, na akee bɛakpati bɛayɛ nwolɛ nzɛlɛlɛ ndendenle. Bɛ ndeanlɛ bayɛ kpole kpalɛ!”