Edwɛkpa ne kɛmɔ Luku hɛlɛle la 2 - BAEBOLO ANZƐƐ BULUKU NWUANZANWUANZA

Gyisɛse awolɛ ne

¹ Mekɛ ne anu Wulomu Maanle Maanle Kpanyinli ne mɔɔ bɛfɛlɛ ye Ɔgɛsetɛse la lile mɛla kɛ bɛdia menli mɔɔ wɔ Wulomu maanle maanle ne mɔ anu la kɔsɔɔti.

² Ɛhye a le menli ɛdianlɛ mɔɔ lumua a. Mekɛ ne anu ɛnee Koyeleneɛse a di amɛnlado wɔ Selea maanzinli nu a.

³ Na awie biala hɔle ɔ nzi kɛ ɔkɔ yeamaa bɛadia ye wɔ ɔdaye ye abusua sua zo.

⁴ Dwosefi vi Nazalɛte mɔɔ wɔ Galeli maanzinli nu la hɔle Belemgbunli Devidi sua zo Bɛtelɛhɛm mɔɔ wɔ Dwudiya maanzinli nu la. Ɔhɔle ɛkɛ ne, ɔluakɛ ɔvi Devidi abusua nu.

⁵ Ɔhɔle kɛ ɔkɔ yeamaa bɛadia ye nee Mɛle, mɔɔ ɛnee yeyia ye la. Mekɛ ne anu ɛnee Mɛle ɛva ɛkolɛ,

⁶ yemɔti Bɛtelɛhɛm yɛɛ ɔ ko hanle ye a.

⁷ Ɔwole ye belamunli ralɛ ne nrenya na ɔvale avuazinli ɔkyekyele ɔ nwo na ɔdole ye mboane adidi ɛlɛka nu wɔ mboane tunli bie anu, ɔluakɛ bɛannyia ɛleka wɔ nyɛvolɛ sua ne anu.

Mboaneneavolɛma nee Nyamenle soanvolɛma

⁸ Mboaneneavolɛma bie wɔ maanle ne anu na bɛlɛsi epe bɛanlea bɛ mboane wɔ fiene ne azo.

⁹ Nyamenle soanvolɛ vindele bɛ nwo ɛkɛ ne, na Awulae anyunlunyia ne dale bɛ nwo zo manle ɛzulolɛ kpole hanle bɛ.

¹⁰ Nyamenle soanvolɛ ne zele bɛ kɛ, “Bɛmmasulo! Melɛ amaneɛ kpalɛ melɛbɛlɛ bɛ, mɔɔ bamaa fɛlɛkolilɛ kpole aha menli kɔsɔɔti a.

¹¹ Ɛnɛ kenle ye bɛwo bɛ Ngoanedievolɛ ne, mɔɔ le Awulae Kelaese ne wɔ Devidi sua zo.

¹² Bɛlua sɛkɛlɛneɛ ɛhye azo a bɛbanwu ye a: bɛbanwu kɛ bɛva avuazinli bɛkyekye adɔma ne anwo na bɛva ye bɛdo mboane adidi ɛlɛka nu.”

¹³ Arɛlevilɛ nu ala anwuma soanvolɛma dɔɔnwo rabokale Nyamenle soanvolɛ ko ne anwo na bɛdole edwɛne bɛyele Nyamenle ayɛlɛ kɛ:

¹⁴ “Anyunlunyia ɛha Nyamenle wɔ anwuma anwuma, anzonudwolɛ ɛha bɛdabɛ mɔɔ ɔ nye die bɛ nwo wɔ ewiade ye la.”

¹⁵ Mɔɔ Nyamenle soanvolɛma ne vi bɛ nwo ɛkɛ ne ziale hɔle anwuma la, mboaneneavolɛma ne hanle hilele bɛ nwo kɛ, “Bɛmaa yɛhɔ Bɛtelɛhɛm yɛhɔnlea mɔɔ ɛzi, mɔɔ Awulae ɛraha ɛhile yɛ la.”

¹⁶ Ndɛndɛ ne ala mboaneneavolɛma ne hɔle na bɛhɔnwunle Mɛle nee Dwosefi nee adɔma ne kɛ ɔla mboane adidi ɛlɛka nu.

¹⁷ Mɔɔ mboaneneavolɛma ne nwunle adɔma ne la, bɛhanle edwɛkɛ mɔɔ Nyamenle soanvolɛ ne hanle ye kakula ne anwo hilele bɛ la bɛhilele menli ne.

¹⁸ Na ɔyɛle bɛdabɛ mɔɔ bɛdele mɔɔ mboaneneavolɛma ne mɔ hanle la azibɛnwo.

¹⁹ Mɛle vale edwɛkɛ ɛhye mɔ amuala ziele ɔ ti anu na ɔdwenlenle nwolɛ kpalɛ.

²⁰ Mboaneneavolɛma ne ziale hɔle, bɛdole edwɛne bɛyele Nyamenle ayɛlɛ wɔ mɔɔ bɛde nee mɔɔ bɛnwu ye la anwo; mɔɔ bɛnwunle ye la amgba le kɛ mɔɔ Nyamenle soanvolɛ ne hanle hilele bɛ ala la.

Bɛdo Gyisɛse duma

²¹ Mɔɔ ɔlile kenle mɔtwɛ la, bɛyɛle kakula ne mrenyanu nzonlɛ na bɛdonle ye duma Gyisɛse. Duma ɛhye a Nyamenle soanvolɛ ne vale manle ye kolaa na bɛanrenzɛ ye a.

Bɛva Gyisɛse bɛhɔ Ɛzonlenlɛ Sua ne anu

²² Mekɛ dwule kɛ akee Dwosefi nee Mɛle yɛ mɔɔ Mosisi mɛla ne kile, mɔɔ fane kakula ne nee ɔ nli ɛnluanlɛ nwo la, bɛvale ye bɛhɔle Gyɛlusalɛm kɛ bɛkava ye bɛahile Awulae,

²³ kɛmɔ bɛhɛlɛ ye wɔ Awulae Mɛla ne anu la. Ɔse, “Bɛdu belamunli ralɛ nrenya biala bɛmaa Awulae.”

²⁴ Eza bɛvale abubule anzɛɛ mɔlɔnoma ngyikyi nwiɔ bɛhɔbɔle azu, kɛmɔ bɛhɛlɛ ye wɔ Awulae Mɛla ne anu la.

²⁵ Mekɛ ne anu ɛnee nrenya bie mɔɔ bɛfɛlɛ ye Semɛyɔn la wɔ Gyɛlusalɛm. Nrenya ɛhye le sonlakpalɛ. Nyamenle nwo ɛzulolɛ wɔ ye nu na ɔlɛkendɛ Yizilayɛma ngoanelielɛ ne. Sunsum Nwuanzanwuanza ne wɔ ye nu,

²⁶ na yeye yehile ye kɛ ɔnrɛwu ɛlɛ kyesɛ ɔnwu Awulae Mɛzaya ne mɔɔ ɔvale ɔbɔle ɛwɔkɛ la.

²⁷ Sunsum ne vale Semɛyɔn hɔle Ɛzonlenlɛ Sua ne anu, na mɔɔ Gyisɛse awovolɛ ne vale ye rale ɛkɛ ne kɛ bɛbayɛ mɔɔ Nyamenle Mɛla ne se la,

²⁸ Semɛyɔn liele kakula ne dole ɔ sa zo na ɔyɛle Nyamenle mo ɔhanle kɛ:

²⁹ “Awulae, wɔli wɔ ɛwɔkɛ ne azo. Akee gyakyi wɔ akɛlɛ adenle anzonudwolɛ nu.

³⁰ Me nye ɛnwu wɔ ngoanelielɛ ne

³¹ mɔɔ ɛvale ɛbɔle menli kɔsɔɔti ɛwɔkɛ la.

³² Ɔle wienyi mɔɔ baye wɔ ɛhulolɛdeɛ ne yeahile menli mɔɔ ɛnle Dwuuma la, na yeava anyunlunyia yearɛlɛ wɔ menli Yizilayɛma.”

³³ Ɛhye mɔ mɔɔ Semɛyɔn hanle wɔ Gyisɛse anwo la zinle ɔ ze nee ɔ nli anwo.

³⁴ Semɛyɔn yilale bɛ na ɔzele ɔ nli Mɛle kɛ, “Nyamenle ɛye kakula ɛhye ɛzie ɛkɛ. Yizilayɛma dɔɔnwo balua ɔ nwo zo adu koti, na dɔɔnwo noko alua ɔ nwo zo anyia ngoane; ɔbayɛ Nyamenle sɛkɛlɛneɛ mɔɔ menli dɔɔnwo ɛnrɛlie ɛnrɛdo nu,

³⁵ noko ɔlua ɔ nwo zo, menli dɔɔnwo awozinli nu adwenle kpɔkɛ biala mɔɔ bɛkɛbɔ la bala ali wienyi. Na ɛhye anwo nyane bayɛ kɛ dadeɛ mɔɔ yɛ nla la awɔ wɔ ahonle ne anu.”

^36-37 Nyamenle kpɔmanvolɛ raalɛ bie noko wɔ ɛkɛ ne, bɛfɛlɛ ye Ana. Raalɛ ɛhye, bɛfɛlɛ ɔ ze Fanuwɛle, ɔvi Ahya abusua nu. Raalɛ ɛhye hɔle agyalɛ la ye ɛvolɛ nsuu ne azo yɛɛ ɔ hu wule a, na kɛkala yeyɛ kpanyinli kpalɛ, na yeyɛ kunlanvolɛ ɛvolɛ abulatwɛ nee nna. Ɔ gyakɛ amkpa Ɛzonlenlɛ Sua ne anu ɛlɛ; dahuu ɔvale ɛhɔnehyelɛ nee nzɛlɛlɛ ɔzonlenle ye Nyamenle nɔɔzo nee ewiazo.

³⁸ Ɔdaye noko ɔrale Ɛzonlenlɛ Sua ne anu dɔnehwele ne ala anu ɔrayɛle Awulae mo na ɔhanle kakula ne anwo edwɛkɛ ɔhilele bɛdabɛ mɔɔ bɛ nye la kɛ Nyamenle barakpɔne Gyɛlusalɛm la.

Gyisɛse awovolɛ sia ara Nazalɛte

³⁹ Mɔɔ bɛwiele debie biala yɛ, kɛmɔ Awulae Mɛla ne se la, Mɛle nee Dwosefi ziale rale bɛ sua zo Nazalɛte mɔɔ wɔ Galeli maanzinli nu la.

⁴⁰ Kakula ne nyinle na ɔ nwo yɛle se; nrɛlɛbɛ yile ye tɛkɛɛ, na Nyamenle yilale ye dɔɔnwo.

Kakula Gyisɛse wɔ Ɛzonlenlɛ Sua ne anu

⁴¹ Ɛvolɛ biala Gyisɛse awovolɛ kɔ Gyɛlusalɛm kɔdi Akpabɛnwo Ɛvoyia ne bie.

⁴² Mɔɔ Gyisɛse lile ɛvolɛ bulu nee nwiɔ la, bɛhɔle Gyɛlusalɛm kɛ bɛkali ɛvoyia ne.

⁴³ Bɛwiele ɛvoyia ne di na bɛsia bɛara la, kakula Gyisɛse hale Gyɛlusalɛm, na ye awovolɛ ne annwu ye zɔhane.

⁴⁴ Bɛdwenlenle kɛ yebɔ menli dɔɔnwo ne anu, yemɔti bɛdiale kenle ko adenle na bɛhɔkpondɛle ye wɔ bɛ mbusua nee bɛ gɔnwo mɔ avinli,

⁴⁵ na bɛannwu ye, yemɔti bɛziale bɛhɔle Gyɛlusalɛm kɛ bɛkakpondɛ ye.

⁴⁶ Ye kenle nsa ne azo, bɛnwunle ye wɔ Ɛzonlenlɛ Sua ne anu kɛ ɔde Dwuu kilehilevolɛma avinli, ɔlɛtie bɛ edwɛkɛ ne bie na ɔbizebiza bɛ kpuyia.

⁴⁷ Nrɛlɛbɛ mɔɔ wɔ ye nyelebɛnloa nee ye ndelebɛbo nu la zinle bɛdabɛ mɔɔ ɛnee bɛlɛtie ye la anwo.

⁴⁸ Ye awovolɛ ne nwunle ye la ɔyɛle bɛ azibɛnwo, na ɔ nli zele ye kɛ, “Me ra, duzu ati a wɔyɛ yɛ zɛhae ɛ? Nea, me nee ɛ ze yɛvɛ kpalɛ wɔ wɔ ɛkpondɛlɛ nu.”

⁴⁹ Ɔbuale bɛ kɛ, “Duzu ati a bɛkpondɛ me ɛ? Bɛnze kɛ ɔwɔ kɛ metɛnla Egya sua nu ɔ?”

⁵⁰ Noko bɛande edwɛkɛ ne mɔɔ ɔhanle la abo.

⁵¹ Yemɔti Gyisɛse nee bɛ ziale rale Nazalɛte, na ɔyɛle tieyɛ ɔmanle bɛ. Ɔ nli vale edwɛkɛ ɛhye mɔ amuala ziele ɔ ti akunlu.

⁵² Na Gyisɛse nyinle nwonane nu nee nrɛlɛbɛ nu, na ɔnyianle ɔ nyunlu wɔ Nyamenle nee menli nyunlu.