Edwɛkpa ne kɛmɔ Luku hɛlɛle la 14 - BAEBOLO ANZƐƐ BULUKU NWUANZANWUANZA

Gyisɛse yɛ nrenya wuleravolɛ bie ayile

¹ Ɛnwomenlelielɛ Kenle ko Gyisɛse hɔle kɛ ɔkakpula ɔ sa wɔ Falasii mgbanyima ne mɔ ko sua nu. Mekɛ ne anu ɛnee menli ɛlɛtɛ ye kpalɛ.

² Nrenya bie mɔɔ mutulemutule ɛyɛ ye la rale Gyisɛse anwo ɛkɛ ne,

³ na Gyisɛse bizale mɛla kilehilevolɛma ne nee Falasiima ne mɔ kɛ, “Asoo yɛ mɛla ne tua ayileyɛlɛ wɔ Ɛnwomenlelielɛ Kenle ne, anzɛɛ ɔndua?”

⁴ Na bɛandɛ bɛ nloa anu. Yemɔti Gyisɛse vale nrenya ne na ɔyɛle ye ayile ɔmanle ɔhɔle.

⁵ Akee ɔbizale bɛ kɛ, “Bɛ nuhua boni yɛɛ saa ɔ ra nrenya anzɛɛ ye ɛnlankɛ tɔ bula nu Ɛnwomenlelielɛ Kenle ne a, ɛkɛ ne ala ɔnrɛye ye a?”

⁶ Na bɛangola ɛhye noko anloa ye.

Mɛlɛbɛnwoaze nee nyɛvolɛlielɛ

⁷ Gyisɛse nwunle bɛdabɛ mɔɔ bɛdole ɛsalɛ bɛvɛlɛle bɛ la kɛ bie mɔ anye ɛbolo ɛlɛkpondɛ ɛleka kpalɛ adɛnla, yemɔti ɔbule bɛ muala ɛrɛlɛ ɛhye:

⁸ “Saa awie to ɔ sa fɛlɛ wɔ wɔ atɔfolɛlielɛ bo a, mmakɔtɛnla ɛleka kpalɛ ne. Ɔkɛyɛ kɛ bie a ɛnee bɛvɛlɛ awie mɔɔ lɛ dibile tɛla wɔ la,

⁹ na ahenle mɔɔ vɛlɛle yemɔ nee wɔmɔ la ɔwɔ kɛ ba na ɔbase wɔ kɛ, ‘Dwazo, fa ɛ bo zo ne maa sonla ɛhye.’ Ɛnee akee ɛlɛ nyiane ɛbahɔdɛnla bɛ nzi lɔ ebia zo.

¹⁰ Yemɔti saa bɛto ɛsalɛ bɛfɛlɛ wɔ a, kɔdɛnla bɛ nzi lɔ ɛleka bie, na saa mɔɔ vɛlɛle wɔ la ba a, yeaze wɔ kɛ, ‘Me gɔnwo, bɛla badɛnla ɛleka kpalɛ.’ Ɛhye kɛyɛ anyunlunyia kɛmaa wɔ wɔ menli mɔɔ nee wɔ de ɛkponle ne anwo la anyunlu.

¹¹ Ɔluakɛ mɔɔ memaa ɔ nwo zo la Nyamenle bɛlɛ ye aze, yɛɛ mɔɔ bɛlɛ ɔ nwo aze la Nyamenle kpogya ye zo.”

¹² Akee Gyisɛse zele nrenya ne mɔɔ dole ɛkponle ne la kɛ, “Saa ɛto ɛkponle ewiazo anzɛɛ nɔsolɛ nu a, mmafɛlɛvɛlɛ ɛ gɔnwo mɔ anzɛɛ ɛ mediema anzɛɛ wɔ mbusuafoɔ anzɛɛ wɔ kpalɛzo sukoavolɛma angome, ɔluakɛ bɛdabɛ noko bɛbavɛlɛ wɔ bie bɛazie wɔ ɛdeɛ ne abo zo.

¹³ Na saa ɛto ɛkponle a, fɛlɛvɛlɛ ehyianvolɛma, abuburama, bɛdabɛ mɔɔ bɛ sa anzɛɛ bɛ gyakɛ le azinli, yɛɛ anyenzinliravolɛma,

¹⁴ na Nyamenle kɛyila wɔ. Ɔluakɛ bɛmɛ, bɛdabɛ bɛnrɛhola bɛnrɛzie wɔ ɛdeɛ ne abo zo. Nyamenle ala a bazie ɔ bo zo amaa wɔ wɔ mekɛ mɔɔ menli kpalɛ ne mɔ vi ewule nu kɛdwazo la a.”

Ɛkponledolɛ kpole ne anwo ɛrɛlɛ

¹⁵ Menli mɔɔ de ɛkponle ne anwo la anu ko mɔɔ dele ɛhye la hanle hilele Gyisɛse kɛ, “Nyilalɛ ɛha bɛdabɛ mɔɔ bɛbadɛnla ɛkponledolɛ kpole ne abo wɔ Nyamenle Belemgbunlililɛ ne anu la!”

¹⁶ Gyisɛse zele ye kɛ, “Nrenya bie dole ɛkponle na ɔvɛlɛle menli dɔɔnwo.

¹⁷ Mɔɔ mekɛ ne dwule la, ɔzoanle ye sonvolɛma kɛ bɛhɔze bɛdabɛ mɔɔ yedo ɛsalɛ yevɛlɛ bɛ la kɛ, ‘Bɛrɛla na mewie debie biala yɛ.’

¹⁸ Na bɛ muala bɛbɔle ɔ bo kɛ bɛtwenlehwenle bɛ bo aze. Mɔɔ lumua la zele kɛ, ‘Medɔ me azɛlɛ bie na ɔwɔ kɛ mekɔnea. Yemɔti mmanyia ɛya.’

¹⁹ Ko noko ɔdaye ɔhanle kɛ, ‘Medɔ nlankɛ nwiɔ nwiɔ fane nnu na mekɔ meahɔnlea bɛ. Yemɔti mebodo wɔ mmanyia ɛya.’

²⁰ Bieko noko zele kɛ, ‘Megya raalɛ, zɔhane ati menrɛhola ba.’

²¹ “Sonvolɛ ne ziale hɔbɔle ɔ menle ne amaneɛ. Awuke menle ne vale ɛya kpole na ɔzele ye sonvolɛ ne kɛ, ‘Maa ɔyɛ ndɛ, kɔ sua ye azo kpalɛ ne mɔ azo nee awɔdenle ne mɔ anu kɔsesa ehyianvolɛma, abuburama, anyenzinliravolɛma, yɛɛ bɛdabɛ mɔɔ bɛ sa nee bɛ gyakɛ le azinli la ɛ nee bɛ ɛrɛla.’

²² Yeangyɛ biala yɛɛ sonvolɛ ne ziale rale a na ɔrahanle ɔhilele ɔ menle ne kɛ, ‘Yɛmenle, mɔɔ ɛhanle la meyɛ ye zɔhane, noko ɛleka tɛbɔ ɛkɛ ne.’

²³ Yemɔti awuke menle ne zele ye sonvolɛ ne kɛ, ‘Kɔ ademgbole ne mɔ nee ndenle ngyikyi ne mɔ anu na twe menli maa bɛrɛla bɛrayi me sua ye.

²⁴ Na meka meahile bɛ, bɛdabɛ mɔɔ menlumuale menvɛlɛle bɛ a bɛamba la, me aleɛ ne nretee bɔbɔ ɛnrɛtia biala agye zo.’ ”

Ɛdoavolɛ ɛyɛlɛ

²⁵ Kenle ko menli dɔɔnwo bie nee Gyisɛse lua bɛlɛkɔ la, ɔhakyile ɔ nwo ɔzele bɛ kɛ,

²⁶ “Awie biala mɔɔ ba me nwo arayɛ me ɛdoavolɛ, na yeangulo me edwɛkɛ yeandɛla ɔ ze nee ɔ nli, ɔ ye nee ɔ mra, ɔ mediema mrenya nee mraalɛ nee ɔdaye mumua ne ɔ nwo la ɛnrɛhola ɛnrɛyɛ me ɛdoavolɛ.

²⁷ Awie biala mɔɔ anzoa ye meanubaka ne anli me nzi la ɛnrɛhola ɛnrɛyɛ me ɛdoavolɛ.

²⁸ “Saa bɛ nuhua bie kpondɛ kɛ ɔsi sua a, ɔdumua ɔtɛnla aze, ɔsese ye bolɛ, na ɔnea saa ɔlɛ ezukoa mɔɔ sa ye si la a.

²⁹ Saa yeanyɛ ye zɔhane na ɔwula sua ne aze a, bie a ɛnee yeangola ye si. Saa bɛnwu ye zɛhae noko a bɛbazi ye amgbu kɛ

³⁰ ‘Nea, nrenya ɛhye sua ko mɔɔ ɔbɔle ɔ bo la, yeanwie ye si ɛlɛ!’

³¹ “Saa belemgbunli bie fa menli apenle bulu kɛ ɔ nee belemgbunli ko mɔɔ lɛ menli apenle abulanwiɔ la kaho a, ɔbalumua yeadɛnla aze yeadwenle nwolɛ saa ɔkɛhola ɔkɛgyinla belemgbunli zɔhane anyunlu wɔ konle nu a.

³² Saa ɔnea na ɔnrɛhola ye a, ɛnee mɔɔ belemgbunli zɔhane yɛ la a le kɛ, mɔɔ kpɔvolɛ ne wɔ moa moa, na ɔtɛnyianle ɔtɛdwule ɛkɛ ne la, ɔsoa ye kpɔmanvolɛ ɔmaa bɛkɔka bɛyɛ anzonudwolɛ ngyehyɛlɛ.”

³³ Na Gyisɛse dwulale ye edwɛkɛ ne kɛ, “Zɔhane ala yɛɛ saa bɛ nuhua ko biala angyakyi debie biala mɔɔ ɔlɛ la anzi ɛlilɛ a, ɔnrɛhola ɔnrɛyɛ me ɛdoavolɛ a.

Ngyenle mɔɔ ɛda la

³⁴ “Ngyenle sonle bolɛ, na saa ɔta a bɛngola bɛnyɛ ye menlemenle.

³⁵ Bɛfa bɛyɛ debie biala a ɔnyɛ boɛ; bɛgua ye lɔ. Yemɔti mɔɔ lɛ ɛnzonlɛ la ɛdie!”