Edwɛkpa ne kɛmɔ Luku hɛlɛle la 13 - BAEBOLO ANZƐƐ BULUKU NWUANZANWUANZA

Bɛgyakyi bɛ ɛtane ne mɔ anrɛɛ bɛkɛwu

¹ Mekɛ ne anu menli bie rahanle Galelima bie mɔɔ Paelɛte ɛmaa bɛhu bɛ wɔ mekɛ mɔɔ ɛnee bɛlɛbɔ azu bɛamaa Nyamenle la anwo edwɛkɛ hilele Gyisɛse.

² Gyisɛse buale bɛ kɛ, “Kɛmɔ bɛhunle Galelima zɔhane mɔ wɔ adenle zɔhane anu la, ɛnee bɛdabɛ bɛnea a ɔkile kɛ bɛle ɛtanevolɛma kpole bɛtɛla Galelima mɔɔ ɛha la amuala ɔ?

³ Ɔnle zɔhane. Meka meahile bɛ, saa bɛdabɛ noko bɛanzia bɛanvi bɛ ɛtane ne mɔ anwo a, bɛ muala bɛbawu kɛ menli zɔhane mɔ ala la.

⁴ Na menli bulu nee mɔtwɛ ne mɔɔ sua tendenle ne bule guale bɛ nwo zo hunle bɛ wɔ Saelowam la noko ɛ? Bɛdabɛ bɛnea a, ɛnee ɛhye kile kɛ menli zɔhane mɔ le ɛtanevolɛma kpole tɛla menli mɔɔ wɔ Gyɛlusalɛm la ɔ?

⁵ Ɔnle zɔhane. Na meka meahile bɛ, saa bɛdabɛ noko bɛanzia bɛanvi bɛ ɛtane ne mɔ anwo a, bɛ muala bɛbawu kɛ menli zɔhane mɔ ala la.”

Feege baka ne mɔɔ ɛnzo ma la anwo ɛrɛlɛ

⁶ Akee Gyisɛse bule bɛ ɛrɛlɛ ɛhye. Ɔse, “Ɛnee nrenya bie lɛ feege baka wɔ ye vanye tola bie anu. Na ɔhɔle kɛ ɔkakpondɛ ma wɔ zolɛ na yeannyia bie.

⁷ Yemɔti ɔzele ye tola ne azo neavolɛ ne kɛ, ‘Nea, mekpɔla feege baka ye azo ɛvolɛ nsa kɛ mekpondɛ ma wɔ zolɛ na mennyia bie. Pɛ ye to aze! Ɔnle kɛ ɔgyinla ɛkɛ ne ɔsɛkye azɛlɛ ne mgbane!’

⁸ Na tola neavolɛ ne buale ye kɛ, ‘Yɛmenle, maa ɔgyinla ɛkɛ ne na yɛnlea ye ɛvolɛ ye noko; mebavuduvudu ɔ bo na meagugua ewula ɔ bo.

⁹ Na saa ɛvolɛ ne kadwu na ɔso a, ɔle kpalɛ; yeanzo noko a, yɛkɛpɛ ye yɛkɛdo.’ ”

Gyisɛse yɛ raalɛ abubura bie ayile wɔ Ɛnwomenlelielɛ Kenle ne

¹⁰ Ɛnwomenlelielɛ Kenle ko bie ɛnee Gyisɛse ɛlɛkilehile wɔ nyianu sua bie anu.

¹¹ Raalɛ ko wɔ ɛkɛ ne mɔɔ sunsum ɛtane vale ye la yedwu ɛvolɛ bulu nee mɔtwɛ, na yemaa ewule ɛdɔ ɔ nwo, yekpo kondokondo mɔɔ ɔngola ɔ nwo tenrɛ fee a.

¹² Mɔɔ Gyisɛse nwunle ye la, ɔvɛlɛle ye na ɔzele ye kɛ, “Ɔmɔ, bɛye wɔ bɛvi wɔ anwonyane ne anu!”

¹³ Akee ɔvale ɔ sa ɔguale raalɛ ne anwo zo, na ɛkɛ ne ala ɔdenrɛle ɔ nwo fɔɔnwo na ɔyele Nyamenle ayɛlɛ.

¹⁴ Nyianu sua ne kpanyinli ne vale ɛya kɛ Gyisɛse ɛyɛ ayile wɔ Ɛnwomenlelielɛ Kenle ne a, na ɔzele menli mɔɔ wɔ ɛkɛ ne la kɛ, “Yɛlɛ kenle nsia mɔɔ ɔwɔ kɛ yɛfa yɛyɛ gyima a; yemɔti bɛrɛla kenle zɔhane mɔ bɛmaa bɛyɛ bɛ ayile, na bɛgyakyi Ɛnwomenlelielɛ Kenle ne bɛmaa ɔla ɛkɛ ne.”

¹⁵ Awulae buale ye kɛ, “Bɛmɛ nabalabama! Saa ɔdwu Ɛnwomenlelielɛ Kenle a bɛ biala sianyi ye ɛnlankɛ anzɛɛ asoaso ɔfa ye ɔkɔmaa ye nzule.

¹⁶ Na raalɛ ɛhye mɔɔ le Ebileham abo zo sonla, na Seetan ɛva ewule ɛkyekye ye toonwo ɛvolɛ bulu nee mɔtwɛ la, yɛɛ ɔnle kɛ bɛsianyi ye wɔ Ɛnwomenlelielɛ Kenle a?”

¹⁷ Ye mualɛ ne manle ye agbɔvolɛ ne mɔ amuala anyunlu guale aze, na menli ne amuala lile fɛlɛko wɔ nwanwane ninyɛne mgbole mɔɔ ɔyɛle la anwo.

Mɛsetade baka ma nwo ɛrɛlɛ

¹⁸ Gyisɛse bizale kɛ, “Kɛ Nyamenle Belemgbunlililɛ ne si de ɛ? Duzu a menva mendo nwolɛ a?

¹⁹ Ɔle kɛ mɛsetade baka ma nretee bie mɔɔ awie vale luale ye tola nu la; ɔfifile, ɔnyinle ɔyɛle baka, na nloma yɛle bɛ sane wɔ ye ngane ne mɔ anu.”

Mgbɔvonle nwo ɛrɛlɛ

²⁰ Gyisɛse bizale bɛ bieko kɛ, “Duzu a menva Nyamenle Belemgbunlililɛ ne mendo nwolɛ a?

²¹ Ɔle kɛ mgbɔvonle mɔɔ raalɛ fa wula ɛdɔkɛ nu la. Ɔmaa ɛdɔkɛ ne amuala tu.”

Anlenkɛ ekyi ne

²² Gyisɛse kpɔsale azua nee namunamu zo hilehilele menli ne, na ɛnee ɔlua zo ɔlɛkɔ Gyɛlusalɛm.

²³ Awie bie bizale ye kɛ, “Yɛmenle, asoo ɔle nɔhalɛ kɛ menli ekyi bie ala a bɛbalie bɛ ngoane a?” Gyisɛse buale bɛ kɛ,

²⁴ “Bɛbɔ mɔdenle bɛva anlenkɛ ekyi ne anu, ɔboalekɛ menli dɔɔnwo babɔ mɔdenle kɛ bɛfa nu, noko bɛnrɛhola.

²⁵ Sua menle ne badwazo ado anlenkɛ ne anu, na saa bɛka alie nwo na bɛbɔ anlenkɛ ne anu bɛse kɛ, ‘Yɛmenle, tukue yɛ anlenkɛ ne!’ a, ɔkɛbua bɛ kɛ, ‘Menze ɛleka mɔɔ bɛvi a!’

²⁶ Na bɛmɛ bɛbabua kɛ, ‘Yɛ nee wɔ lile, nlonle; ɛhilehilele wɔ yɛ sua zo.’

²⁷ Na ɔbaze bɛ bieko kɛ, ‘Menze ɛleka mɔɔ bɛvi a. Bɛvi ɛkɛ ne bɛhɔ, amumuyɛma!’

^28-29 Na akee mɔɔ bɛkɛnwu bɛ nlenya mɔ Ebileham, Ayezeke nee Gyekɔbo nee Nyamenle kpɔmanvolɛma ne mɔ mɔɔ bɛfa bɛ bɛtu bɛ nloa nu la amuala wɔ Nyamenle Belemgbunlililɛ ne anu, na menli vi aduduleɛ nee adɔleɛ, ɛbɔ nu nee nyevile nu ɛra ɛvoyia ne abo, na akee bɛye bɛmɛ bɛgua alie nwo nehane la, ɛkɛ ne yɛɛ bɛbazu na bɛadedɛ bɛ nwo bonrane nu a.

³⁰ Bɛdabɛ mɔɔ kɛkala bɛli amozi la baralumua, na bɛdabɛ mɔɔ kɛkala bɛlumua la arali amozi.”

Gyisɛse kulo Gyɛlusalɛm

³¹ Mekɛ ne anu Falasiima bie rale Gyisɛse anwo ɛkɛ ne razele ye kɛ, “Ye ɛ nwo ɛke na kɔ ɛleka fofolɛ, ɔluakɛ Hɛlɔdo kpondɛ wɔ ahu wɔ.”

³² Gyisɛse buale bɛ kɛ, “Bɛhɔ na bɛhɔze musuofoɔ ne kɛ, melɛtu mbɔnsam, meayɛ ayile ɛnɛ nee ɛhyema, na ye kenle nsa ne azo menwɔwie me gyima ne.

³³ Noko ɔwɔ kɛ mesɔ me adendulɛ ne azo ɛnɛ nee ɛhyema nee ye alehyenlɛ nu. Ɔnle kpalɛ kɛ bɛkɛhu Nyamenle kpɔmanvolɛ wɔ ɛleka gyɛne biala kyesɛ Gyɛlusalɛm ala.

³⁴ “Gyɛlusalɛm, O Gyɛlusalɛm! Wɔhu Nyamenle kpɔmanvolɛma ne, wɔzi menli mɔɔ Nyamenle zoanle bɛ ɛ nwo la awolɛ! Fane dɔɔnwo yɛɛ mehulo kɛ anrɛɛ menwɔva me sa menwɔbɛla bɛmɛ Gyɛlusalɛmma kɛ akɔlɛ ɛdane fa ɔ mra fea ɔ ndɛba abo la; na bɛammaa me adenle.

³⁵ Yemɔti bɛ sua ye badɔ mgbane. Meka meahile bɛ kɛ bɛnrɛnwu me, kɔkpula kɛ mekɛ ne kɛdwu mɔɔ bɛbadeɛdea nu bɛaze kɛ, ‘Nyilalɛ ɛha mɔɔ lua Awulae duma nu ɛlɛba la.’ ”