Dwɔhyua Buluku ne 8 - BAEBOLO ANZƐƐ BULUKU NWUANZANWUANZA

Eyae ɛvalɛ nee ye ɛbɔlɛ

¹ Ɛdɛnkɛma zele Dwɔhyua kɛ, “Fa wɔ ɛlɔnema ne kɔ Eyae. Mmasulo yɛɛ mmamaa wɔ ahonle tu. Mebamaa wɔali Eyae belemgbunli ne anwo zo konim; ye menli, ye suakpole ne, nee ye azɛlɛ ne amuala bayɛ wɔ ɛdeɛ.

² Kɛ ɛyɛle Gyɛleko nee ye belemgbunli ne la, zɔhane ala yɛɛ ɛbayɛ Eyae nee ye belemgbunli ne a. Na ɛnɛ ɛdeɛ, ninyɛne nee nlankɛ ne mɔ le bɛ ɛdeɛ. Bɛboɔboa bɛ nwo na bɛbu bɛ nzi bɛhɔ bɛ nwo zo arɛlevilɛ nu na bɛva sua ne.”

³ Zɔhane ati Dwɔhyua boɔboale ɔ nwo kɛ ɔ nee ye ɛlɔnema ne amuala kɔ Eyae. Ɔyele menli mɔɔ ze konle nye zo la apenle abulasa na ɔmanle bɛhɔle nɔe ne ala.

⁴ Ɔzele bɛ kɛ, “Bɛhɔvea suakpole ne anzi lɔ; bɛmmakɔ moa biala, na bɛva bɛzie bɛ nyunlu kɛ bɛfa suakpole ne.

⁵ Me nee me ɛlɔnema ne yɛbaye yɛ nyunlu. Na saa suakpole ne azo amra finde kɛ bɛbadoa yɛ bɛ nee yɛ aho a, yɛbanriandi yɛazia, kɛmɔ yɛyɛle ye alumua ne la.

⁶ Bɛbadoa yɛ na bɛ muala bɛbavi sua ne azo. Bɛbaha kɛ yɛle avoanvoanle na yɛlɛnriandi, kɛmɔ alumua ne yɛyɛle la;

⁷ na bɛmɛ bɛavinde arɛlevilɛ nu bɛarava suakpole ne. Ɛdɛnkɛma bɛ Nyamenle ne baye sua ne amaa bɛ.

⁸ Saa bɛfa sua ne a, bɛyela ye, kɛmɔ Ɛdɛnkɛma hanle la. Ɛnee kɛ mese ɛne!”

⁹ Zɔhane ati Dwɔhyua guale bɛ adenle zo, na bɛhɔveale Bɛtɛle nee Eyae avinli, mɔɔ di kɔ Eyae adɔleɛ la. Dwɔhyua nee ye menli ne mɔ hɔlale azokoɛleɛ ɛkɛ ne kenle ko ne nɔe ne.

¹⁰ Nwonlomɔ mangyee ne Dwɔhyua dwazole vɛlɛvɛlɛle ye ɛlɔnema ne. Akee ɔdaye yɛɛ Yizilayɛ mgbanyima ne mɔ lile ɛlɔnema mɔɔ ɛha la ati na bɛguale adenle zo kɛ bɛkɔ Eyae.

¹¹ Ɛlɔnema ne nee Dwɔhyua vale suakpole ne anuhɔlɛ kpole ne adenle zo, na mɔɔ bɛbikyele suakpole ne bie la, bɛzokoɛle ye ɛbɔ nu afoa nu, ɛleka bie mɔɔ bɔnza anu kuloonwu bie la bɛ nee Eyae avinli la.

¹² Ɔvale menli kɛyɛ apenle nnu na ɔmanle bɛhɔveale suakpole ne adɔleɛ wɔ Eyae nee Bɛtɛle avinli.

¹³ Kɛ bɛhyehyɛle ɛlɔnema ne anu la ɛne: bɛdabɛ mɔɔ bɛbaho konle mumua ne la a le menli mɔɔ wɔ suakpole ne ɛbɔ nu afoa nu la, yɛɛ ɛlɔnema mɔɔ zua alumua ɛlɔnema ne la a le bɛdabɛ mɔɔ bɛwɔ suakpole ne adɔleɛ afoa nu la. Dwɔhyua ɛdeɛ ɔlale bɔnza ne anu nɔe ne.

¹⁴ Mekɛ mɔɔ Eyae belemgbunli ne nwunle Dwɔhyua menli ne la, ɔhanle ɔ nwo ndɛndɛ ne ala na ɔvale ye ɛlɔnema ne amuala kɛ bɛ nee Yizilayɛma baho wɔ Dwɔdan Bɔnza ne anu, ɛnee ɔnze kɛ ɛlɔnema babu ɔ nzi.

¹⁵ Dwɔhyua nee ye ɛlɔnema ne yɛle kɛ asɛɛ bɛho bɛgua, na bɛbɔle ɔ bo kɛ bɛnriandi bɛahɔ ɛsɛlɛ ne azo lɔ.

¹⁶ Eyae belemgbunli ne vɛlɛle menli mɔɔ wɔ Eyae la kɔsɔɔti kɛ bɛraboka bɛ nwo bɛmaa bɛvoa Yizilayɛma. Mekɛ mɔɔ bɛdoa Dwɔhyua la ɛnee Dwɔhyua nee ye ɛlɔnema ne ɛlɛnriandi ahɔ moa moa kpalɛ.

¹⁷ Nrenya ko biala mɔɔ wɔ Eyae anzɛɛ Bɛtɛle la vindele hɔbokale ɛlɔnema ne mɔɔ ɛlɛfoa Yizilayɛma la anwo, na suakpole ne dɔle mgbane na eza bɛgyakyile ye anuhɔlɛ ne mɔ nwo.

¹⁸ Akee Ɛdɛnkɛma zele Dwɔhyua kɛ, “Tende wɔ atwɛ ne wɔ Eyae; mebaye sua ne meamaa wɔ.” Na Dwɔhyua dendenle atwɛ ne mɔɔ ɔlɛ ye ɔ sa nu la wɔ Eyae.

¹⁹ Ɔmanle ɔ sa zo ala la, Dwɔhyua menli ne mɔɔ hɔle nzia ne la dwazole ndɛndɛ na bɛvale ɛnriandilɛ bɛrale suakpole ne azo bɛravale. Na bɛdole senle suakpole ne azo.

²⁰ Eyaema dole bɛ nye bɛ nzi la, bɛnwunle kɛ senle ɛdɔ bɛ sua ne azo na ye esike ɛdwazo bolonwonwo zɛhae. Zɔhane ati ɛnee akee bɛnnwu ɛleka mɔɔ bɛnriandi bɛabɔ bɛ ti a, ɔboalekɛ Yizilayɛma ne mɔɔ nriandile hɔle ɛsɛlɛ ne azo la akee ɛzi ɛgyinla kɛ bɛ nee bɛ ko.

²¹ Dwɔhyua nee ye ɛlɔnema ne nwunle kɛ Yizilayɛma ɛhendeɛ ne mɔ ɛva suakpole ne na bɛdo senle wɔ zolɛ la, bɛhakyile bɛ nye na bɛbɔle ɔ bo kɛ bɛku bɛ kpɔvolɛma ne.

²² Yizilayɛma mɔɔ wɔ suakpole ne azo la rabokale konle ne anwo. Eyaema nwunle kɛ bɛha Yizilayɛma avinli bɔkɔɔ; na Yizilayɛma hunle bɛ muala. Ko bɔbɔ anvi ɛsalɛ

²³ kɛ Eyae belemgbunli ne ala. Bɛhyele ye bɛvale ye bɛrɛlɛle Dwɔhyua.

²⁴ Yizilayɛma hunle Eyae ɛlɔnema ne mɔɔ voanle bɛ wɔ ɛsɛlɛ ne azo la, na akee bɛziale bɛhɔle suakpole ne azo bɛhɔhunle bɛdabɛ mɔɔ bɛwɔ ɛkɛ ne la amuala.

^25-26 Dwɔhyua dendenle ye atwɛ ne wɔ Eyae la, yeando ye aze toonwo ɔhɔkpulale kɛ bɛhunle awie biala mɔɔ wɔ suakpole ne azo la. Bɛhunle awie biala mɔɔ wɔ Eyae la, mrenya nee mraalɛ kɔsɔɔti, na bɛ muala bɛlua apenle ngoko bulu nee nwiɔ.

²⁷ Yizilayɛma ne vale nlankɛ nee ninyɛne mɔɔ bɛnyianle bɛ wɔ suakpole ne azo la, kɛmɔ Ɛdɛnkɛma zele Dwɔhyua la.

²⁸ Dwɔhyua yelale Eyae na ɔmanle ɔyɛle suadu. Ɛnɛ nee ɛnɛ, ɛkɛ ne tɛde suadu.

²⁹ Ɔhendanle Eyae belemgbunli ne wɔ baka kpole bie azo na ɔgyakyile ye ɛkɛ ne toonwo nɔsolɛ. Sɛnzɛne ne kadɔ la Dwɔhyua manle bɛhɔyele funli ne, na bɛvuandinle ye bɛdole Eyae suakpole ne anuhɔlɛ kpole ne anyunlu. Bɛhuanle awolɛ edukue kpole kpalɛ ko bɛhedale funli ne azo, na ɛnɛ nee ɛnɛ ala ɔtɛbɔ ɛkɛ ne.

Bɛkenga mɛla ne wɔ Yibale Boka

³⁰ Akee Dwɔhyua zile azubɔlɛ ɛkponle manle Ɛdɛnkɛma, Yizilayɛ Nyamenle ne wɔ Yibale Boka ne azo.

³¹ Ɔyɛle ye kɛ mɔɔ Ɛdɛnkɛma sonvolɛ Mosisi hyehyɛle manle Yizilayɛma la. Ɔwɔ Mosisi mɛla ne anu kɛ ɔwɔ kɛ ɔyɛ “azukponle mɔɔ bɛva awolɛ mɔɔ bɛanva bulalɛ a bɛkpukekpukele la a bɛzile la.” Yemɔ azo yɛɛ bɛyelale nane ne bɛbɔle azu bɛmanle Ɛdɛnkɛma, na eza bɛbɔle anzonudwolɛ nwo azu a.

³² Ɛkɛ ne yɛɛ mɔɔ ɛnee Yizilayɛma amuala ɛlɛnea ye la, Dwɔhyua hɛlɛle Mosisi mɛla ne mɔɔ ɔde aze la ɔhɛlɛle la wo awolɛ ne mɔ azo a.

³³ Yizilayɛma amuala, bɛdabɛ mɔɔ bɛle nyɛvolɛ na bɛwɔ bɛ avinli nee bɛdabɛ Dwuuma amuala, bɛ nee bɛ mgbanyima nee mbɔlɔba mgbanyinli nee ndɛnebuavolɛma gyinlanle ye ɛhonlene nwiɔ wɔ Ɛdɛnkɛma Ngyekyeleɛ Ɛlɛka ne foa nee ye foa, na bɛnleanle Livae sɛlɛvolɛma ne mɔɔ zoale la. Menli ne foa ko anzi kɔ Gɛlaezem Boka yɛɛ foa ko noko anzi kɔ Yibale Boka. Ɛdɛnkɛma sonvolɛ Mosisi zele bɛ kɛ saa mekɛ ne dwu na bɛdie nyilalɛ a bɛgyinla ye zɔhane.

³⁴ Dwɔhyua akee gengale mɛla ne amuala, boka nyilalɛ nee amowa kɔsɔɔti, kɛmɔ bɛhɛlɛ ye wɔ Mɛla Buluku ne anu la.

³⁵ Dwɔhyua gengale Mosisi mɛla ne mɔ ngoko ngoko hilele Yizilayɛma kɔsɔɔti, mrenya nee mraalɛ, ngakula, yɛɛ nyɛvolɛ mɔɔ wɔ bɛ avinli la amuala.