Dwɔhyua Buluku ne 23 - BAEBOLO ANZƐƐ BULUKU NWUANZANWUANZA

Dwɔhyua nee Yizilayɛma di nrɛlaleɛ

¹ Mekɛ ne hɔle bie la, Ɛdɛnkɛma bɔle Yizilayɛma anwo bane wɔ bɛ kpɔvolɛma mɔɔ ɛbɔ ɛyia bɛ la asa anu. Mekɛ ne anu ɛnee Dwɔhyua ɛyɛ kpanyinli,

² yemɔti ɔvɛlɛle Yizilayɛma amuala, bɛ mgbanyima, bɛ mbusua mgbanyinli, ndɛnebuavolɛma, nee bɛ mbɔlɔba ne mɔ amuala na ɔzele bɛ kɛ, “Kɛkala, akee meyɛ kpanyinli.

³ Bɛdabɛ bɛnwu debie mɔɔ bɛmɛ bɛ ti Ɛdɛnkɛma bɛ Nyamenle ne ɛva ɛyɛ maanle maanle ɛhye mɔ la. Ɛdɛnkɛma bɛ Nyamenle ne a ɛho ɛmaa bɛ a.

⁴ Mehyɛ azɛlɛ ne mɔɔ maanle maanle mɔɔ yɛtɛtule bɛ la de zolɛ la, nee maanle maanle mɔɔ ɛbɔ ye Azule Dwɔdan aduduleɛ toonwo mɔɔ kɔgua Mɛdetɛlenia Nyevile ne anu mɔɔ meli bɛ nwo zo konim la memaa bɛ, memaa abusua ekpunli ko biala ɛnyia bie.

⁵ Ɛdɛnkɛma bɛ Nyamenle ne bamaa maanle maanle zɔhane mɔ agua ndwɛlɛ aze na yeavoa bɛ, wɔ mekɛ mɔɔ bɛmɛ bɛkɛze kɛ bɛko bɛahɔ bɛ nyunlu la. Bɛ azɛlɛ ne bayɛ bɛ ɛdeɛ, kɛmɔ Ɛdɛnkɛma vale bɔle bɛ ɛwɔkɛ la.

⁶ Yemɔti bɛnlea boɛ na bɛli debie biala mɔɔ bɛhɛlɛ ye wɔ Mosisi Mɛla ne anu la azo. Bɛmmabu bɛ nye bɛgua ye kpɔkɛ ko bɔbɔ azo.

⁷ Akee menli ɛhye mɔ mɔɔ de bɛ avinli la, bɛ nee bɛ mmatu fane biala, bɛmmabɔ bɛ awozonle ne mɔ aluma, bɛmmafa bɛ bɛka ndane, bɛmmasonle bɛ yɛɛ bɛmmabɔ bɛ ti aze bɛmaa bɛ.

⁸ Bɛli nɔhalɛ bɛmaa Ɛdɛnkɛma, kɛmɔ bɛyɛ toonwo yeradwu ɛnɛ la.

⁹ Ɛdɛnkɛma voanle maanle mgbole mgbole mɔɔ anwo yɛ se la wɔ mekɛ mɔɔ bɛzele kɛ bɛba bɛ nyunlu la. Maanle maanle zɔhane mɔ anu menli, ko bɔbɔ angola bɛ nyunlu gyinla.

¹⁰ Bɛmɛ, bɛ nuhua ko biala kola maa menli apenle gua ndwɛlɛ aze, ɔboalekɛ Ɛdɛnkɛma bɛ Nyamenle ne a ɛlɛko amaa bɛ a, kɛmɔ ye ɛwɔkɛ ne se la.

¹¹ Zɔhane ati bɛnlea bɛ nwo boɛ na bɛhulo Ɛdɛnkɛma bɛ Nyamenle ne.

¹² Saa bɛanli nɔhalɛ na bɛ nee menli mɔɔ bɛandu bɛ, na bɛ nee bɛ a de la yɛ ko, bɛgya bie a,

¹³ ɛnee bɛnwu ye kɛ, Ɛdɛnkɛma bɛ Nyamenle ne ɛnrɛdu menli ɛhye mɔ wɔ mekɛ mɔɔ bɛ nee bɛ kɛnyia konle la. Menli zɔhane anwo bayɛ ɛzulolɛ kɛ ɛhane anzɛɛ kuma la amaa bɛ; na nyane mɔɔ bɛbanwu ye la bayɛ kɛ bɛlɛ empele bɛlɛbila bɛ nzi kuma nu anzɛɛ bɛlɛ mbowule bɛlɛwowɔ bɛ nye zo la. Na ɛhye bahɔ zolɛ toonwo kɔkpula kɛ bɛ muala bɛkɛwie azɛlɛ kpalɛ ɛhye mɔɔ Ɛdɛnkɛma bɛ Nyamenle ne ɛva ɛmaa bɛ la azo.

¹⁴ “Akee me ewule mekɛ asɛɛ ɛdwu. Bɛ nuhua ko biala ze ye wɔ ye ahonle nu na ɔdie ɔto nu kɛ Ɛdɛnkɛma bɛ Nyamenle ne ɛva ninyɛne kpalɛ ne mɔɔ ɔvale ɔbɔle bɛ ɛwɔkɛ la ɛmaa bɛ. Ɛwɔkɛ biala mɔɔ ɔbɔle la yeli zolɛ; kokye anga nu.

¹⁵ Na kɛmɔ yeli ɛwɔkɛ biala mɔɔ ɔbɔle yɛ la azo la, zɔhane ala yɛɛ ndeanlɛ biala mɔɔ fɛta la ɔbava yeadea bɛ a.

¹⁶ Saa bɛanli mɛla ne mɔɔ Ɛdɛnkɛma bɛ Nyamenle ne ɛva ɛmaa bɛ la azo, na bɛsonle anzɛɛ bɛyeyɛ awozonle a, yemɔ, ɔbava ɛya na yeadea bɛ. Na bɛ nuhua ko bɔbɔ ɛnrɛha azɛlɛ kɛnlɛma ye mɔɔ yeva yemaa bɛ la azo.”