Dwɔhyua Buluku ne 20 - BAEBOLO ANZƐƐ BULUKU NWUANZANWUANZA

Azuamgbole mɔɔ le ɛvealeka la

¹ Akee Ɛdɛnkɛma zele Dwɔhyua kɛ

² ɔha ɔhile Yizilayɛma kɛ, “Bɛva azuamgbole ne bie mɔ bɛyɛ ɛvealeka, kɛmɔ menzele me akɛlɛ Mosisi kɛ ɔha nwolɛ edwɛkɛ ɔhile bɛ la.

³ Saa awie anye ɛnla nwolɛ na ɔku sonla a ɔkola ɔnriandi ɔkɔfea ɛkɛ ne, amaa mɔɔ kpondɛ ye ali ye nzenralɛ ahu ye bie adua la asa anga ye.

⁴ Ɔkola ɔnriandi ɔkɔ azuamgbole ne mɔ bie azo ndɛnebualɛ ɛleka ne mɔɔ wɔ sua ne anuhɔlɛ kpole ne anloa la, na ɔkile edwɛkɛ mɔɔ ɛzi la anu ɔkile mgbanyima ne. Akee bɛbamaa ye ɛleka wɔ sua ne azo, amaa yeadɛnla ɛkɛ.

⁵ Saa sonla ne mɔɔ di nzenralɛ ne la toa ye ba sua ne azo a, bɛmmaye ahenle ne mɔɔ hunle sonla ne la bɛmaa. Ɔwɔ kɛ bɛbɔ ɔ nwo bane, ɔboalekɛ tɛ ɔ nye fuu a ɔhunle ahenle a, yɛɛ yeanva ɛya a ɔhunle ye a.

⁶ Ɔbadɛnla sua ne azo toonwo kɔkpula kɛ bɛkɛli ye edwɛkɛ bagua nu, na mekɛ ne anu sonla ne mɔɔ le sɛlɛvolɛ kpanyinli la kɛwu la. Ɛnee akee ɔkola ɔsia ɔkɔ ye sua zo, ɛleka mɔɔ ɔde mɔɔ ɔnriandile ɔrale la.”

⁷ Yemɔti wɔ Dwɔdan Adɔleɛ, bɛvale Kidɛhye mɔɔ wɔ Galeli mɔɔ wɔ Nafetalae awoka ne mɔ azo la, Hyikɛm mɔɔ wɔ Yifelaem awoka ne mɔ azo la, yɛɛ Hibulɔn mɔɔ wɔ Dwuda maanle nu la.

⁸ Wɔ Dwɔdan Aduduleɛ noko, bɛvale Bizɛ mɔɔ wɔ Wulubɛn azɛlɛ zo wɔ ɛsɛlɛ ne mɔɔ wɔ Gyɛleko aduduleɛ la, Releemɔto mɔɔ wɔ Geleade mɔɔ wɔ Gaade azɛlɛ zo la, yɛɛ Golan mɔɔ wɔ Beehyan mɔɔ wɔ Manasɛ azɛlɛ zo la.

⁹ Azuamgbole ɛhye mɔ a bɛvale bɛyɛle ɛvealeka ne mɔ bɛmanle Yizilayɛma amuala nee nyɛvolɛ mɔɔ bɛ nee bɛ de la a. Awie biala mɔɔ ɔ nye ɛnla nwolɛ na ɔkɛhu sonla la kola kɔ ɛkɛ ɔmaa bɛbɔ ɔ nwo bane wɔ ahenle mɔɔ kpondɛ kɛ ɔku ye bie ɔtua la asa anu. Bɛngola bɛngu ye, kyesɛ bɛli ye edwɛkɛ bagua nu na yeli fɔlɛ.