Hozia Buluku ne 8 - BAEBOLO ANZƐƐ BULUKU NWUANZANWUANZA

Ɛdɛnkɛma bua Yizilayɛ fɔlɛ wɔ mmonlezɔlɛ nwo

¹ Ɛdɛnkɛma se, “Bɛwu aweɛne tendenle ne anu. Agbɔvolɛ ɛlɛba arali me azɛlɛ ye mutule kɛ ahɔleɛ! Ɔluakɛ menli ne ɛtulu me ngyekyeleɛ ne mɔɔ me nee bɛ kyekyele la na bɛbulu me mɛla ne azo.

² Bɛsu bɛfɛlɛ me kɛ, ‘Me Nyamenle, yɛze wɔ.’

³ Yizilayɛma ɛkpo mɔɔ le kpalɛ la. Ɛhye ati bɛ kpɔvolɛma badu bɛ mgbaliko.

⁴ “Bɛziele arelemgbunli, noko bɛanlua me nwo zo a bɛziele a. Bɛzieziele mgbanyima mɔɔ menze nwolɛ bie. Bɛvale bɛ dwɛtɛ fufule nee bɛ ezukoa nvutuke bɛguale ananze bɛzɛkyele bɛ nwo.

⁵ Mekyi nvutuke ɛnlankɛ ralɛ ananze ne mɔɔ suakpole Samɛlea amra zonlenle ye la. Me ahonle ɛfutu bɛ nwo. Kenlenzu yɛɛ bɛkɛgyakyi bɛ mmonlezɔlɛ ne a?

⁶ Yizilayɛnli dwinvolɛ a yɛle ananze ne a, ɔnle Nyamenle. Bɛbagelegele Samɛlea nvutuke ɛnlankɛ ralɛ ananze ne dwɔkɔdwɔkɔ.

⁷ Bɛdua anwoma, na bɛbabu ahumu. Ɛya avule nu abɛlɛ ɛnrɛvievia mralɛ, bɛnrɛnyia aleɛ wɔ nu, yɛɛ saa bɛfievia mralɛ bɔbɔ a, nyɛvolɛ a bali a.

⁸ Yizilayɛ ɛli akoatɔ; kɛkala bɛhyɛ bɛ maanle maanle ne mɔ anu na bɛyɛ kɛ buakɛ mgbane bie la.

⁹ Yizilayɛma le kɛ asoaso ahohonyinli, bɛdabɛ bɛpɛ adenle bɛhɔ kɛ bɛkabiza Aseleama moalɛ. Yifelaem ɛbɔ maanle maanle gyɛne ɛkpa kɛ bɛraboa ye.

¹⁰ Saa kanza bɛluolua nu bɛbɔ maanle maanle ɛkpa a, akee mebaboɔboa bɛ nloa. Na bɛbagyakyi belemgbunli nee mgbanyima ɛzielɛ.

¹¹ “Kɛmɔ Yifelaemma ɛsisi azukponle dɔɔnwo ɛva ɛyɛ ɛtane la, bɛmaa azukponle ɛyɛ debie ɛtane me nye zo.

¹² Saa mekɛlɛ me mɛla apenle apenle bulu meamaa bɛ a, anrɛɛ bɛbabu bɛ debie ngakyile bie.

¹³ Bɛkulo azubɔlɛ; bɛku nane bɛbɔ azu na bɛdi. Na medame Ɛdɛnkɛma, me nye ɛnlie nwolɛ. Akee mebahakye bɛ ɛtane ne mɔ na meadea bɛ wɔ nwolɛ, na meamaa bɛazia bɛahɔ Yigyibiti.

¹⁴ “Yizilayɛma ɛsisi arelemgbunli azua na bɛ rɛle ɛvi bɛ Bɔvolɛ ne. Dwudama ɛsisi azuamgbole ɛbɔ bɛ nwo bane. Na mebakpomgbɔ senle meagua bɛ azuamgbole ne mɔ azo na ɔbayela bɛ aranemgbole ne mɔ.”