Hozia Buluku ne 2 - BAEBOLO ANZƐƐ BULUKU NWUANZANWUANZA

¹ Yemɔti bɛvɛlɛ bɛ mediema mrenya ne mɔ “Me Menli” na bɛvɛlɛ bɛ mediema mraalɛ ne mɔ “Bɛnwubɛanwunvɔne.”

Gomɛ ɛnli nɔhalɛ, Yizilayɛ ɛnli nɔhalɛ

² Me mra, bɛ nee bɛ nli ɛdendɛ; kɛkala ɔnle me ye bieko, yɛɛ medame noko menle ɔ hu bieko, noko bɛ nee ye ɛdendɛ. Bɛzɛlɛ ye kɛ ɔgyakyi ye tuutuu ɛbɛlabɔlɛ ne nee ye awuvolɛvalɛ mɛladonlɛ ne.

³ Saa yeangyakyi a, mebakpa ɔ nwo meamaa yealɛ ɔ nwo zɔ kɛ kenle mɔɔ bɛwole ye la. Mebamaa yeayɛ kɛ fienemgbole nu azɛlɛ mɔɔ ɛwe la, na meamaa nzuhɔne ngome ahu ye ado ye lɔ.

⁴ Menrɛze ɔ mra ne mɔ anwunvɔne, ɔboalekɛ bɛle tuutuu mralɛ,

⁵ ɔluakɛ bɛ nli le tuutuunli. Raalɛ ne mɔɔ nrenzɛle bɛ la ɛbɔ anyiemgba ɛbɛla. Ɔluakɛ ɔhanle kɛ, “Metoa me kulovolɛma mɔɔ maa me aleɛ nee nzule, mboane enrinli nee lenen, ɔlivi nwole, yɛɛ nwanye la.”

⁶ Yemɔti mebava mbowumbaka meagya ye anyiane na mealie bane meawa ye, amaa yeannwu ye ndenle ne mɔ.

⁷ Ɔbadu ye kulovolɛma ako na ɔnrɛdo bɛ. Ɔbakpondɛ bɛ na ɔnrɛnwu bɛ. Na akee ɔbaha kɛ, “Mesia meadoa me hu ne mɔɔ lumuale gyale me la, ɔluakɛ ɛnee ɔle kpalɛ ɔmaa me ɔtɛla kɛkala.”

⁸ Ɔnze kɛ medame a menvale abɛlɛ, nwanye, ɔlivi nwole, dwɛtɛ fufule, yɛɛ ezukoa nvutuke memanle ye a, yɛɛ bɛvale bɛzonlenle bozonle Beeyale ne a.

⁹ Yemɔti ɛbuhenle ne dwu a mebalie me abɛlɛ, nwanye ne mɔ nee me mboane enrinli nee lenen ne mɔ mɔɔ menvale memanle ɔyɛle ndanlɛ ɔhedale la.

¹⁰ Mebakpa ɔ nwo wɔlɔnwo wɔ ye kulovolɛma anyunlu, na awie biala ɛnrɛhola ɛnrɛlie ye ɛnrɛvi me tumi bo.

¹¹ Mebamaa yeagyakyi ye anyelielɛ ne mɔ, ye ɛvoyia ne mɔ, ye siane fofolɛ ɛvoyialilɛ ne mɔ, ye Ɛnwomenlelielɛ Ɛvoyia ne mɔ, yɛɛ ye nyamenlezonlenlɛ ɛvoyialilɛ ne mɔ kɔsɔɔti.

¹² Mebazɛkye ye vanye mbaka nee ye feege mbaka mɔɔ ɔse ɔle ye ɛkpabɔdeɛ mɔɔ ye kulovolɛma vale manle ye la. Mebamaa ye vanye nee ye feege egyinli ne mɔ ahakyi kpɔkɛ, nanemgbole arali.

¹³ Mebadea ye wɔ mekɛ mɔɔ ɔ rɛle vile me na ɔhɔkpunle ɛyɛlɛ ɔmanle ye awozonle Beeyale ne mɔ, na ɔvale anwoneɛ ɔzieziele ɔ nwo ɔdoale ye kulovolɛma la; kɛ medame Ɛdɛnkɛma mese la ɛne.

Ɛdɛnkɛma lɛ ye menli ne anwo ɛhulolɛ

¹⁴ Yemɔti nea, mebali ye adwenle na meava ye meahɔ fienemgbole ne anu, na meadendɛ kɛnlɛma meahile ye.

¹⁵ Ɛkɛ ne, mebava ye vanye egyinli ne mɔ meamaa ye na meamaa Ngyegyelɛ Bɔnza ayɛ anyelazo anlenkɛ. Na ɛkɛ ne yɛɛ mefɛlɛ ye a ɔbalie zo, kɛmɔ ye mbɛlɛra nu mɔɔ ɔvi Yigyibiti ɔrale la ɔyɛle la.

¹⁶ Mekɛ ne anu medame Ɛdɛnkɛma, ɛbavɛlɛ me “Me hu” na ɛnrɛvɛlɛ me, “Me Beeyale.”

¹⁷ Ɔluakɛ menrɛmaa ɔnrɛbɔ Beeyale ne mɔ duma bieko, yɛɛ bɛnrɛbɔ bɛ duma bieko.

¹⁸ Kenle zɔhane me nee ɛbɔ nu nanemgbole, anwomanyunlu nloma, yɛɛ debie biala mɔɔ twenle ɔ kɛnra aze la bayɛ ngyekyeleɛ; mebaye ɛda, konle dadeɛ nee konle meavi azɛlɛ ne azo, na me menli ne adɛnla bɛ nwo adɔ bɛ.

¹⁹ Yizilayɛ, mebayia wɔ meava wɔ meayɛ me ye dahuu. Mebava tenleneyɛlɛ nee pɛlepɛlelilɛ meagya wɔ, mebava ɛhulolɛ kpundii nee anwunvɔnezelɛ meagya wɔ.

²⁰ Mebava wɔ meayɛ me ye nɔhalɛ nu, na ɛbanwu kɛ mele Ɛdɛnkɛma.

²¹ Mekɛ ne anu, medame Ɛdɛnkɛma mese, mebadendɛ anwomanyunlu anwo na anwomanyunlu badendɛ azɛlɛ ye anwo.

²² Na azɛlɛ ye bamaa abɛlɛ, nwanye nee nwole na aleɛ abu Gyɛzelii.

²³ Mebalua ye azɛlɛ ne azo meamaa me nwo. Mebaze “Bɛnzebɛanwunvɔne” anwunvɔne, na meaze “Tɛmemenli ɔ” kɛ, “Bɛle me menli” na ɔdaye ɔbaha kɛ, “Ɛle me Nyamenle.”