Hozia Buluku ne 14 - BAEBOLO ANZƐƐ BULUKU NWUANZANWUANZA

Hozia bodo Yizilayɛma

¹ Yizilayɛma, bɛzia bɛrɛla Ɛdɛnkɛma bɛ Nyamenle ne ɛkɛ, ɔluakɛ bɛ ninyɛndane ɛmaa bɛdu koti.

² Bɛzia bɛhɔ Ɛdɛnkɛma ɛkɛ na bɛva nzɛlɛlɛ ɛhye bɛdo ɔ nyunlu: “Fa yɛ ɛtane kɔsɔɔti kyɛ yɛ; die mɔɔ le kpalɛ la, na yɛbaye wɔ ayɛlɛ.

³ Aselea ɛnrɛhola yɛ die, yɛɛ yɛnrɛvo konle mgbɔnwɔ zo bieko. Yɛnrɛha yɛnrɛhile yɛ mmonle ne mɔ mɔɔ yɛdayɛ yɛyɛ la bieko kɛ bɛle ‘Yɛ Nyamenle.’ O Ɛdɛnkɛma, ɛse nrisa anwunvɔne.”

Ɛdɛnkɛma bɔ Yizilayɛma ɛbɛla fofolɛ nwo ɛwɔkɛ

⁴ Ɛdɛnkɛma se, “Mebava me menli ne mɔɔ ɛnli nɔhalɛ la anwo edwɛkɛ meahyɛ bɛ. Mebava me ahonle muala meahulo bɛ, ɔluakɛ meye me ɛya ne bɛ nwo zo.

⁵ Mebayɛ kɛ ɛbɔlɛ meadɔ meagua Yizilayɛma anwo zo. Bɛbanyi bokoboko kɛ aloa, bɛbasosɔ ndinli kɛ Lɛbanɔn mbaka.

⁶ Bɛ ngane badɛlɛdɛlɛ, bɛbayɛ ngɛnlɛma kɛ ɔlivi mbaka, na bɛabɔ evuanlɛ kɛ Lɛbanɔn sida mbaka.

⁷ Bɛbazia bɛaradɛnla me alubo ne anu. Bɛbakpazi kɛ tola nu aleɛ; bɛbabua kɛ vanye mbaka, na bɛ evuanlɛ bayɛ kɛ Lɛbanɔn nwanye evuanlɛ la.

⁸ O Yifelaem, duzu a me nee mmonle lɛ yɛ a? Medame a mebua bɛ nzɛlɛlɛ nwo, menea bɛ nwo zo a. Mele kɛ sepelɛse baka dokodoko, medame a memaa bɛso ma a.”

Adwulaleɛ

⁹ Bɛdabɛ mɔɔ bɛze nrɛlɛbɛ la, bɛde edwɛkɛ ɛhye mɔ abo; bɛdabɛ mɔɔ bɛlɛ deɛnwunlɛ la, bɛnwu ninyɛne ɛhye mɔ. Ɔluakɛ Ɛdɛnkɛma ndenle ne mɔ le fɔɔnwo, tenlenema fa bɔ bɛ ɛbɛla, yɛɛ ɛtanevolɛma tu nwolɛ koti.