Hozia Buluku ne 13 - BAEBOLO ANZƐƐ BULUKU NWUANZANWUANZA

Yizilayɛ ndɛnebualɛ mɔɔ li amozi

¹ Dɛba ne, saa Yifelaem tendɛ a, menli nwo wozo bɛ; bɛkpogyale ye zo wɔ Yizilayɛma avinli; na ɔluale bozonle Beeyale anwo zo ɔyɛle ɛtane na ɔwule.

² Kɛkala bɛtɛkɔ zolɛ bɛtɛyɛ ɛtane; bɛfa dwɛtɛ fufule bɛgua mmonle ananze mɔɔ dwinvolɛma a ɛyɛ la, na bɛse kɛ, “Bɛbɔ azu bɛmaa bɛ.” Menli ala, bɛdabɛ bɛfo nlankɛ ananze nloa anwo!

³ Yemɔti menli ɛhye mɔ abo zo baminli kɛ nwonlomɔ nzulemungu anzɛɛ ɛbɔlɛ la. Bɛbayɛ kɛ abonle mɔɔ anwoma ɛlɛbɔ ye avi ma ɛwozolɛ ɛleka, anzɛɛ esike mɔɔ lua nvɛnzɛlɛ nu la.

⁴ Ɛdɛnkɛma se, “Medame a mele Ɛdɛnkɛma bɛ Nyamenle ne mɔɔ yele bɛ vile Yigyibiti la. Bɛnlɛ Nyamenle biala kɛ medame ala. Bɛye me a bɛnlɛ dievolɛ biala.

⁵ Medame a meneanle bɛ wɔ fienemgbole ne mɔɔ nzule biala ɛnle nu la anu a.

⁶ Na mɔɔ bɛdwule azɛlɛ kpalɛ ne azo na bɛlile bɛ ko yile la, bɛ mgbanyizonle yɛle kpole na bɛ rɛle vile me.

⁷ Yemɔti mebayɛ bɛ kɔme nu kɛ awenade. Mebahakyi ɛrane meazia bɛ adenle nu.

⁸ Mebateta bɛ kɛ bedi mɔɔ bɛhye ɔ mra, na meatete bɛ nu, na ɛkɛ ne, mebali bɛ kɛ awenade di nane, na meatete bɛ nzokanzoka kɛ nanemgbole tete nane la.

⁹ “Yizilayɛma, mebazɛkye bɛ! Na nwane a kɛhola kɛboa bɛ a?

¹⁰ Bɛbizale bɛliele belemgbunli nee mgbanyima. Bɛ belemgbunli ne mɔɔ balie bɛ la wɔ nienwu?

¹¹ Menvale ɛya yɛɛ menvale arelemgbunli ne mɔ memanle bɛ a, yɛɛ meva ɛya meye bɛ ɛkɛ.

¹² “Bɛbɔ Yifelaem ninyɛndane ne mɔ kpɔkɛ, bɛva ye ɛtane ne mɔ bɛzie ɛkɛ.

¹³ Ɔmaa ɔ nli te awolɛ ne nyane, na ɔle koasea la ati, ɔmba. Ɔle kakula mɔɔ ye awolɛ mekɛ dwu a ɔnva ɔ ti ɔndua awodeɛ ne anloa a.

¹⁴ Memkpɔne bɛ menvi Ɛbolɔ tumi bo ɔ? Menlie bɛ menvi Ewule asa anu ɔ? O Ewule, wɔ bɔlɔ ne wɔ nienwu? O Ɛbolɔ, wɔ ɛzɛkyelɛ tumi ne wɔ nienwu? Anwunvɔnezelɛ ɛnle me nye zo bieko.

¹⁵ Yifelaem banyi bokoboko kɛ baka ndɔ, noko mebamaa medame Ɛdɛnkɛma, me aduduleɛ anwoma wuluwulu ne adwazo ɛsɛlɛ ne azo abɔ asesa bɛ azɛlɛ bo nzule nee bɛ bula ne mɔ; ɔbaminli debie biala mɔɔ sonle bolɛ wɔ ye gya nu la abo zo.

¹⁶ Mebadua Samɛlea kakɛ kɛ yede me nwo atua a. Ye menli ne bawu konle nu; bɛbava bɛ nlɔma ne mɔ bɛafifi debie bɛatete bɛ, na bɛatulutulu nrenzɛvolɛma ako.”