Hozia Buluku ne 10 - BAEBOLO ANZƐƐ BULUKU NWUANZANWUANZA

¹ Yizilayɛma le kɛ vanye mbaka mɔɔ so kposekpose la. Mekɛ mɔɔ bɛ nwo ɛlɛso la, ɛnee bɛlɛsisi azukponle dɔɔnwo. Mekɛ mɔɔ maanle ne ɛlɛkpazi la, ɛnee bɛlɛsisi awolɛ mpila dɔɔnwo mɔɔ bɛsonle nwolɛ la.

² Bɛnli nɔhalɛ, yemɔti ɔwɔ kɛ bɛdi bɛ ɛtane ne mɔ anwo ɛzonle. Ɛdɛnkɛma babubu bɛ azukponle ne mɔ, na yeazɛkye bɛ mpila ne mɔ.

³ Akee menli ɛhye mɔ baha kɛ, “Yɛnlɛ belemgbunli, ɔluakɛ yɛanzulo Ɛdɛnkɛma. Na duzu yɛɛ belemgbunli kola yɛ maa yɛ a?”

⁴ Bɛbuke bɛ nloa bɛkeha bie ala; bɛfa adalɛ ndane bɛkyekye ngyekyeleɛ, yemɔti ndeanlɛ fifi bɛ nwo kɛ ɛya nu ɛzezeane kuma nu ndile mɔɔ le pɔezen la.

⁵ Menli mɔɔ de suakpole Samɛlea azo la bazulo, bɛ nwo awozo bɛ, wɔ bɛ nvutuke ɛnlankɛ ananze ne mɔɔ ɛvi Bɛtɛle la ati. Menli ne bazu ye, yɛɛ sɛlɛvolɛma ne mɔ mɔɔ sonle ananze ne la bazu aye awolɛ wɔ ye anyunlunyia ne mɔɔ ɛdɔ aze ɛbɔ la ati.

⁶ Ɛhɛe, bɛbava ananze ne bɛayɛ adwule bɛahɔdua bɛamaa Aselea maanle maanle belemgbunli kpole ne. Anyiemgba baha Yifelaemma na nyiane ahu Yizilayɛma wɔ bɛ mmonlezɔlɛ ti.

⁷ Samɛlea belemgbunli ne baminli kɛ taboa ebule nretee mɔɔ la azule nye la.

⁸ Bɛbazɛkye awoka zo ɛzonlenlɛ ɛleka ne mɔ mɔɔ wɔ Evɛn mɔɔ Yizilayɛma kɔ ɛkɛ kɔsonle na bɛyɛ ɛtane la. Mbowule nee ndile bafifi bɛ azukponle ne mɔ azo. Na bɛbaha bɛahile awoka ne mɔ kɛ, “Bɛheda yɛ nwo zo!” na bɛaha bɛahile awoka ngyikyi kɛ, “Bɛdu bɛgua yɛ nwo zo.”

Ɛdɛnkɛma bua Yizilayɛ ndɛne

⁹ Ɛdɛnkɛma se, “Sumunli kɛ Yizilayɛma yɛle ɛtane tiale me wɔ Gebɛya la, bɛtɛgyakyile ɛtane ɛyɛlɛ ne. Yemɔti konle bava bɛ aze wɔ Gebɛya.

¹⁰ Mebara menli ɛhye mɔ mɔɔ ɛde atua la anwo zo mearadea bɛ. Maanle maanle baha abɔ nu aho atia bɛ, wɔ mekɛ mɔɔ bɛkɛdua bɛ ɛtane dɔɔnwo ne mɔ anwo kakɛ la.

¹¹ “Ɛnee Yifelaem le kɛ ɛnlankɛ belɛ mɔɔ bɛtete ye, mɔɔ hulole kɛ ɔkɛwozo ma la. Noko mebava gyɛnvayile meagyɛnva ɔ kɔme kɛnlɛma ne meamaa yeayɛ gyima ɛsesebɛ. Ɔwɔ kɛ Dwuda funduvundu azɛlɛ ne yɛɛ ɔwɔ kɛ Yizilayɛ siezie azɛlɛ ne maa ɔ nwo.

¹² Menganle kɛ, ‘Bɛlua tenleneyɛlɛ ma na bɛabu ɛhulolɛ kpundii. Bɛzo azɛlɛ ne mɔɔ la mgbane la, ɔluakɛ mekɛ ɛdwu mɔɔ ɔwɔ kɛ bɛkpondɛ medame, Ɛdɛnkɛma me bo zo a, amaa meara na mearawola ngoanelielɛ meagua bɛ nwo zo.’

¹³ Bɛlua amumuyɛ, bɛbu nzisi, bɛli adalɛ ma. “Kɛmɔ bɛva bɛ rɛle bɛwula bɛ konle ehwili ne mɔ nee bɛ ɛlɔnema dɔɔnwo ne mɔ anu la,

¹⁴ konle bava bɛ menli ne aze na bɛbabubu bɛ aranemgbole ne mɔ kɔsɔɔti. Ɔbayɛ kɛ mekɛ mɔɔ Belemgbunli Hyaleman zɛkyele suakpole Bɛtabɛle la. Wɔ konle ne anu, bɛvale mrɛladane mraalɛ nee bɛ mra bɛfifinle debie bɛhunle bɛ.

¹⁵ Bɛmɛ Bɛtɛlema, bɛ amumuyɛ ne ati, debie mɔɔ bɛbava bɛayɛ bɛ la ɛne. Konle ne anu bɛbahu Yizilayɛ belemgbunli ne.”