Hozia Buluku ne 1 - BAEBOLO ANZƐƐ BULUKU NWUANZANWUANZA

¹ Nrɛlaleɛ mɔɔ Ɛdɛnkɛma vale manle Biyɛlae ara nrenya Hozia wɔ Dwuda arelemgbunli Ɛzaya, Dwotam, Ehaze, yɛɛ Hɛzikaya mekɛ zo la ɛne. Mekɛ ne anu ɛnee Gyɛhowahye ara nrenya Gyɛlɔbowam le Yizilayɛ belemgbunli.

Hozia aye nee ɔ mra

² Mɔɔ Ɛdɛnkɛma dumua alua Hozia anwo zo adendɛ ahile Yizilayɛma la, ɔzele Hozia kɛ, “Kɔgya tuutuu raalɛ na wo tuutuu mralɛ. Ɔluakɛ azɛlɛ ne azo amra ɛkpo medame Ɛdɛnkɛma, na bɛlɛbɔ tuutuu ɛbɛla.”

³ Yemɔti Hozia gyale Debeleeyem ara raalɛ Gomɛ. Gomɛ nrenzɛle na ɔwole ralɛ nrenya.

⁴ Ɛdɛnkɛma zele Hozia kɛ, “To ye ‘Gyɛzelii’ ɔboalekɛ ɔnrɛhyɛ biala na meadea Yizilayɛ belemgbunli ne wɔ mogya mɔɔ ɔ nlenya Gyɛhu hanle guale wɔ Gyɛzelii la anwo. Mefa Gyɛhu belemgbunlililɛ ne meara awieleɛ.

⁵ Kenle zɔhane mebabubu Yizilayɛ ɛda ne anu wɔ Gyɛzelii Bɔnza.”

⁶ Gomɛ nrenzɛle bieko na ɔwole ralɛ raalɛ. Ɛdɛnkɛma zele Hozia kɛ, “To ye ‘Bɛnzeyeanwunvɔne,’ ɔluakɛ menrɛze Yizilayɛma anwunvɔne bieko, yɛɛ menrɛva bɛ ɛtane ne mɔ menrɛhyɛ bɛ fee.

⁷ Mebaze Dwudama anwunvɔne, medame, Ɛdɛnkɛma bɛ Nyamenle, mebalie bɛ ngoane, na tɛ konle nu ɔ, menrɛva konle dadeɛ anzɛɛ ɛda nee ɛda mbaka anzɛɛ mgbɔnwɔ nee menli mɔɔ ka mgbɔnwɔ la.”

⁸ Mɔɔ Gomɛ pɛle ɔ ra ne nyɛfonlɛ la, ɔnrenzɛle na ɔwole ralɛ nrenya bieko.

⁹ Ɛdɛnkɛma zele Hozia kɛ, “To ye ‘Bɛnlememenli,’ ɔboalekɛ Yizilayɛma ɛnle me menli, yɛɛ menle bɛ Nyamenle.”

Yizilayɛ banyia ye gyinlabelɛ dɛba ne

¹⁰ Yizilayɛma bazo kɛ ɛnweazo anwea mɔɔ bɛngola bɛnzuzu anzɛɛ bɛngola bɛndia la, na ɛleka ne mɔɔ bɛzele bɛ kɛ, “Bɛnle me menli” la, ɛkɛ ne a bɛbaha bɛahile bɛ kɛ, “Bɛle tease Nyamenle ne amra” a,

¹¹ na Dwudama nee Yizilayɛ bali ngamɔnu. Bɛbaye bɛ kpanyinli ko bɛamaa yeanlea bɛ nwo zo, bɛ nwo bazo na bɛakpazi wɔ azɛlɛ ne azo. Ɔluakɛ Gyɛzelii kenle ne bayɛ kenle kpole!