Kɛlata mɔɔ bɛhɛlɛle bɛhɔmanle Hibuluma la 3 - BAEBOLO ANZƐƐ BULUKU NWUANZANWUANZA

Gyisɛse le kpole tɛla Mosisi

¹ Me mediema Keleseɛnema, mɔɔ bɛdabɛ noko Nyamenle ɛvɛlɛ bɛ a! Bɛdwenle Gyisɛse, mɔɔ Nyamenle ɛzoa ye kɛ ɔrayɛ Sɛlɛvolɛ Kpanyinli wɔ diedi ye mɔɔ yɛlɛ nu la anwo.

² Ɔlile nɔhalɛ ɔmanle Nyamenle mɔɔ zoanle ye la, kɛmɔ Mosisi lile nɔhalɛ wɔ ye gyimayɛlɛ nu wɔ Nyamenle sua nu la.

³ Sonla mɔɔ si sua la lɛ ɔ nyunlu tɛla sua ne mɔɔ ɔkɛzi la. Zɔhane ala yɛɛ Gyisɛse lɛ ɔ nyunlu tɛla Mosisi a.

⁴ Sonla ala a si sua a, yɛɛ Nyamenle noko a ɛyɛ ninyɛne muala a.

⁵ Mosisi lile nɔhalɛ kɛ ɔle akɛlɛ wɔ Nyamenle sua nu, na ɔlile ninyɛne mɔɔ Nyamenle baha nwolɛ bie wɔ kenle bie la anwo daselɛ.

⁶ Na Kelaese ɛdeɛ ɔlile nɔhalɛ kɛ ɔle Ralɛ mɔɔ nea Nyamenle sua nu ɛkɛ a. Saa yɛgyinla akɛnrasesebɛ zo na yɛsi pi wɔ anyelazo nu a, yɛkɛnwu kɛ yɛle ye sua.

Nyamenle menli ne ɛnwomenlelielɛ

⁷ Yemɔti, kɛ Sunsum Nwuanzanwuanza ne se la ɛne, “Saa ɛnɛ bɛte Nyamenle ane a,

⁸ bɛmmayɛ anzosesebɛ, kɛmɔ bɛ nlenya mɔ yɛle na bɛdele Nyamenle anwo atua, na mekɛ ne anu bɛzɔle ye bɛnleanle wɔ ɛsɛlɛ ne azo la.

⁹ Bɛ nlenya mɔ nwunle gyima kpalɛ mɔɔ menlile memanle bɛ ɛvolɛ abulanla anu la, noko bɛgyegyele me na bɛzɔle me bɛnleanle.

¹⁰ Ɛhye ati menvale menli zɔhane mɔ anwo ɛya na menganle kɛ, ‘Bɛle menli mɔɔ bɛsolo na bɛkpo kɛ bɛnrɛli me mɛla zo a.’

¹¹ Menvale ɛya na menganle ndane kɛ, ‘Bɛ gyakɛ ba ɛnrɛtia ɛleka mɔɔ meyɛ kɛ memaa bɛaralie bɛ ɛnwomenle la!’ ”

¹² Me mediema diedima, bɛnlea boɛ na bɛ bie mɔ ansolo, na bɛande bɛ nwo bɛanvi tease Nyamenle ne anwo.

¹³ Zɔhane ati, amaa ɛtane ambɛlɛbɛla bɛ biala na yeakpunli ye ahonle la, bɛboa bɛ nwo ngoko alehyenlɛ biala, kɛmɔ “Ɛnɛ” gyi ɛkɛ ne maa yɛ alehyenlɛ biala mɔɔ kɛhye yɛ nyunlu la.

¹⁴ Ɔluakɛ alumua diedi ne mɔɔ yɛnyianle la, saa yɛsɔ nu ɛsesebɛ yɛkɔ awieleɛ a yɛɛ yɛ nee Kelaese kɛli agya a.

¹⁵ Nyamenle Edwɛkɛ ne se, “Saa ɛnɛ bɛte Nyamenle ane a, bɛmmayɛ anzosesebɛ, kɛmɔ bɛ nlenya mɔ yɛle na bɛdele Nyamenle anwo atua la.”

¹⁶ Nwane mɔ a dele Nyamenle ane noko bɛdele atua la? Bɛdabɛ kɔsɔɔti mɔɔ Mosisi hɔyele bɛ vile Yigyibiti la ɔ.

¹⁷ Nwane mɔ a Nyamenle vale bɛ nwo ɛya ɛvolɛ abulanla la? Bɛdabɛ mɔɔ bɛyɛle ɛtane na bɛdɔle amolɛ nu wɔ ɛsɛlɛ ne azo la ɔ.

¹⁸ Mɔɔ Nyamenle ka ye ndane ne kɛ, “Bɛ gyakɛ ba ɛnrɛtia ɛleka mɔɔ meyɛ kɛ memaa bɛaralie bɛ ɛnwomenle la” ɛnee ɔ nee nwane mɔ? Ɔ nee menli mɔɔ dele atua la.

¹⁹ Ɛhye maa yɛnwu kɛ bɛandwu ɛleka ne, ɔboalekɛ bɛanlie bɛanli.