Gyɛlɛmaya Awolɛyelɛ 2 - BAEBOLO ANZƐƐ BULUKU NWUANZANWUANZA

Ɛdɛnkɛma ɛdeanlɛ mɔɔ ɔtea Gyɛlusalɛm

¹ Nea kɛ Awulae ɛzi ɛva ɛya, ɛmaa awozinli ɛva Zayɔn a. Yevuandi Yizilayɛ anyunlunyia ne yedo aze. Mekɛ mɔɔ ɔvale ɛya la yeanvavi ye Ɛzonlenlɛ Sua ne bɔbɔ.

² Awulae anze anwunvɔne, yebɔ Yizilayɛ sua biala; yeva ɛya yegologolo Dwudama aranemgbole ne mɔ; yemaa maanle ne nee ye arelemgbunli anyunlu ɛgua aze.

³ Yeva ɛya kpole yehu Yizilayɛ katakyiema; kpɔvolɛma dwazole bɛ nwo zo, na Awualae amboa bɛ; ɔzɔle gbolamgbolam kɛ senle wɔ Yizilayɛ ɔyelale debie biala.

⁴ Yeva ye ɛda ne yezu yɛ, yeva ye tumi ne yetia yɛ kɛ kpɔvolɛ; yehu bɛdabɛ mɔɔ yɛ nye die bɛ nwo wɔ Gyɛlusalɛm la kɔsɔɔti, yewola ye ɛya ne yegua kɛ senle.

⁵ Awulae ɛyɛ kɛ kpɔvolɛ, yebɔ Yizilayɛ bɔkɔɔ; yebubu ye suakunlu kɔsɔɔti, yegologolo ye aranemgbole ne mɔ; yemaa Dwudama nyanelilɛ nee awolɛyelɛ ɛyɛ kpole.

⁶ Yegologolo ye Ɛzonlenlɛ Sua ne kɛ asɛɛ tola nu kpɔda, yezɛkye ɛleka mɔɔ bɛsonle ye la. Ɛdɛnkɛma ɛmaa ɛvoyialilɛ nee Ɛnwomenlelielɛ Kenle ɛzielɛ ɛzi aze wɔ Zayɔn, yeva ɛya kpole yekpo ye arelemgbunli nee ye sɛlɛvolɛma.

⁷ Awulae ɛkpo ye azukponle ne, yekpo ye ɛleka nwuanzanwuanza ne; yemaa kpɔvolɛma ɛbubu ye suakunlu bane ne mɔ; bɛdeɛdeanle nu wɔ Ɛdɛnkɛma Sua ne anu, kɛ asɛɛ bɛlɛdi ɛvoyia la.

⁸ Ɛdɛnkɛma vuale kɛ ɔka Zayɔn bane ne mɔ yeagua; ɔvale ɛzuzudeɛ ɔzuzule bane ne; yeangakyi adwenle ne mɔɔ ɔvale kɛ ɔsɛkye ye la; ɔmanle bane nee aranemgbole bubule guale, bɛ muala bɛgulule nu bɛgolole bɛguale.

⁹ Zayɔn nlenkɛ mgbole ne mɔ ɛbubu ɛgua; bɛ nzi mbulalɛ ne mɔ ɛbubu; bɛhye ye belemgbunli nee ye mgbanyima bɛhɔ nlɔnu; mɛla ne ɛnle ɛkɛ bieko, yɛɛ ye Nyamenle kpɔmanvolɛma ɛnnwu ɛnyelɛzodeɛnwunlɛ ɛnvi Ɛdɛnkɛma ɛkɛ.

¹⁰ Zayɔn mgbanyima dede ye ngungoonwu; bɛvula nzonle bɛgua bɛ ti zo na bɛheda ɛrele; Gyɛlusalɛm mbɛlɛra ɛsisi bɛ ti aze.

¹¹ Me nye la monle nu; me ɛkɛla anye zo ɛda ye; debie ɛlɛyɛ me ahonle, ɔlua Zayɔn ɛbɔlɛ mɔɔ ɛbɔ la ati, ɔboalekɛ mbɛda nee nlɔma anye zo ɛbulu wɔ Zayɔn guabile zo.

¹² Bɛsu bɛfɛlɛ bɛ nli mɔ kɛ, “Aleɛ nee nwanye wɔ nienwu?” Bɛ nye zo bulu wɔ Zayɔn guabile ne mɔ azo kɛ menli mɔɔ ɛbodɛboda la; bɛ nli mɔ kɛdwu bɛ la ɛnee bɛhete bɛ sa nu.

¹³ O Gyɛlusalɛmma, duzu a menga a, duzu a menva bɛ mendo nwo a? Duzu a menva bɛ mendo nwolɛ, amaa meakyekye bɛ rɛle a, O Gyɛlusalɛm? Ɔluakɛ mɔɔ ɛdo bɛ la le kpole tɛla nyevile tandane; awie ɛngola nwolɛ ɛhwee yɛ.

¹⁴ Bɛ Nyamenle kpɔmanvolɛma ɛha adalɛ nee mɛlɛbɛla ɛnyelɛzodeɛnwunlɛ ɛhile bɛ; bɛamkpa bɛ ninyɛndane nwo ɛdanlɛ bɛanlie bɛ bɛanvi munzule nu; bɛhanle adalɛ ɛnyelɛzodeɛnwunlɛ nee amaneɛ mɔɔ minli sonla la a bɛhilele bɛ a.

¹⁵ Menli mɔɔ se adenle ne azo la nea bɛ, bɔ bɛ sa nu, si bɛ amgbu; bɛkpusu bɛ ti na bɛsele Gyɛlusalɛmma kɛ, “Asoo suakpole kɛnlɛma ne mɔɔ ye kɛnlɛma di munli na ewiade amra amuala anye sɔ ye la ɛ?”

¹⁶ Bɛ kpɔmanvolɛma kɔsɔɔti tendɛ tia bɛ, bɛsele bɛ bɛkpobi bɛ nloa bɛse kɛ, “Aa, mekɛ ne mɔɔ yɛhendɛ dedee la ɛne; yɛ sa ɛha ye, yɛzɛkye ye, mɔɔ yɛkpondɛ la ala ɛne!”

¹⁷ Ɛdɛnkɛma ɛyɛ mɔɔ ɔzele la, yeyɛ mɔɔ ɔbɔle bɛ nwolɛ kɔkɔ la, kɛmɔ ɔhanle ye dɛbadɛba la, yeanze anwunvɔne, yezɛkye debie biala, yemaa wɔ kpɔvolɛma ɛzi ɛ nwo zo agole, na yemaa bɛ anwosesebɛ ne ɛyɛ kpole.

¹⁸ O Gyɛlusalɛm, tea nu fɛlɛ Awulae. Maa monle ɛbia wɔ kɛ nzule, wɔ alehyenlɛ nee aledwolɛ. Mmadie wɔ ɛnwomenle fee, yɛɛ mmadafe.

¹⁹ Dwazo, su aledwolɛ nu amuala, bɔ ɔ bo nɔsonɔso ne ala! Wola wɔ nyane gua Awulae anyunlu, kɛ ɛwola nzule wɔagua. Sɛlɛ ye wɔ ɛ mra ne mɔ ngoane ti; ɛhɔne ti bɛ nye zo bulu awɔdenle ne mɔ azo.

²⁰ O Ɛdɛnkɛma, to ɛ nye nea! Nwane mɔ a ɛ nee bɛ ɛli ye zɛhae a? Asoo mraalɛ ɛhu bɛ mra ɛli? Bɛ mra mɔɔ bɛ nye die bɛ nwo la. Bɛlɛku sɛlɛvolɛma nee Nyamenle kpɔmanvolɛma wɔ Awulae Ɛzonlenlɛ Sua ne anu.

²¹ Wɔ gua ne mɔ azo lɔ, mgbanyinli nee ngakula avunli ngome; me mbɛlɛra nee me mgbavolɛ ɛdɔ dadeɛ nloa; wɔ ɛya mekɛ ne ɛdwu, wɔhu bɛ, wɔanvavi bie.

²² Ɛdole ɛsalɛ ɛvɛlɛle me kpɔvolɛma, bɛrale kɛ asɛɛ bɛba ɛvoyialilɛ. Mekɛ mɔɔ Ɛdɛnkɛma vale ɛya la, awie biala anvi ɛsalɛ; menli mɔɔ menlile bɛ adane la, me kpɔvolɛma hunle bɛ kɔsɔɔti.