Mosisi Buluku ne mɔɔ lumua mɔɔ bɛfɛlɛ ye Mɔlebɛbo 9 - BAEBOLO ANZƐƐ BULUKU NWUANZANWUANZA

Nyamenle nee Nowa ngyekyeleɛ ne

¹ Nyamenle yilale Nowa nee ɔ mra ne mɔ na ɔzele bɛ kɛ, “Bɛwo mralɛ dɔɔnwo na bɛ bo zo amra ɛyi azɛlɛ ye azo.

² Nane, nloma, ninyɛne mɔɔ twenle bɛ nwo aze nee fɛlɛ muala bazulo bɛ; meva bɛ muala mewula bɛ sa nu.

³ Meva debie biala mɔɔ ɛnwomenle wɔ ye nu wɔ azɛlɛ ye azo la memaa bɛ kɛ bɛli. Kɛmɔ menvale mbaka nee ndile memanle bɛ kɛ bɛli la, zɔhane ala yɛɛ meva nane nee nloma nee fɛlɛ muala memaa bɛ a. Meva debie biala memaa bɛ.

⁴ Debie ko ala a metua bɛ kɛ bɛmmadi a, yemɔ a le nane mɔɔ mogya ne tɛbɔ nu la, ɔboalekɛ mogya ne anu a ye ngoane wɔ a.

⁵ Awie biala mɔɔ kɛhu sonla, awie biala mɔɔ kɛhu ɔ diema, yɛɛ nane biala mɔɔ kɛhu sonla la, mebabiza ye mealie mogya ne wɔ ye ɛkɛ.

⁶ Nyamenle nleanle ɔdaye ye ɛsaso a ɔbɔle sonla a, ɛhye ati awie biala mɔɔ kɛhu sonla la bɛkɛhu ɔdaye.

⁷ “Bɛwo mralɛ dɔɔnwo, na bɛmaa bɛ nwo ɛzo wɔ azɛlɛ ye azo.”

⁸ Akee Nyamenle zele Nowa nee ɔ mra ne mɔ kɛ,

⁹ “Nea, me nee wɔ nee ɛ bo zo amra,

¹⁰ tease abɔdeɛ biala, nloma, nyɛmoa nee azɛlɛ ye azo nane biala mɔɔ nee wɔ vi ɛlɛne ne anu dwule aze la yɛ ngyekyeleɛ.

¹¹ Me nee wɔ yɛ ngyekyeleɛ kɛ, ɔvi ɛnɛ mɔɔ kɔ la azuyilɛ ɛnrɛzɛkye abɔdeɛ muala bieko, yɛɛ azuyilɛ mɔɔ bazɛkye azɛlɛ ye la ɛnrɛra bieko.

¹² Sɛkɛlɛneɛ mɔɔ wɔ ngyekyeleɛ ɛhye anwo na ɔbala me nee ɛdawɔ nee tease abɔdeɛ biala avinli la a le kɛ,

¹³ mebado me nyangondonle ne wɔ anwomanyunlu, na yemɔ yɛɛ bayɛ ngyekyeleɛ ne mɔɔ me nee ewiade amra ɛkyekye la anwo sɛkɛlɛneɛ a.

¹⁴ Mekɛ biala mɔɔ maanle nu kɛmunla na nyangondonle kɛdo la,

¹⁵ mebahakye ngyekyeleɛ ne mɔɔ me nee wɔ nee abɔdeɛ muala ɛkyekye la kɛ azuyilɛ ɛnrɛzɛkye ewiade abɔdeɛ ne mɔ amuala bieko ɛlɛ.

¹⁶ Mekɛ biala mɔɔ nyangondonle kɛdo anwomanyunlu la, mebahakye zɛhae damɛnlangoate ngyekyeleɛ ye mɔɔ me nee azɛlɛ ye azo abɔdeɛ muala ɛkyekye la.

¹⁷ Ngyekyeleɛ mɔɔ me nee aleɛabo tease abɔdeɛ muala ɛkyekye la anwo sɛkɛlɛneɛ ɛne.”

Nowa nee ɔ mra mrenya ne mɔ

¹⁸ Nowa amra ne mɔ mɔɔ vi ɛlɛne ne anu dwule aze la a le Hyɛm, Ham, yɛɛ Gyeefɛte. (Ham ara a le Keena).

¹⁹ Nowa amra mrenya nsa ɛhye mɔ anu a menli mɔɔ wɔ azɛlɛ ye azo la amuala kpokpoti vi a.

²⁰ Nowa le ɛyazonlɛnli. Ɔdaye a ɔlumuale ɔzonle ɛya na ɔyɛle vanye egyinli a.

²¹ Ɔnlonle nwanye ne bie na ɔbole, ɔkpale ɔ nwo na ɔhɔlale ye ndanlɛ sua ne anu.

²² Ham, mɔɔ ɔ ra a le Keena la, hɔnwunle kɛ ɔ ze lɛ ɔ nwo zɔ la, ɔvindele ɔhɔhanle ɔhilele ɔ mediema nwiɔ ne.

²³ Hyɛm nee Gyeefɛte vale ɛdanlɛ guale bɛ bati, na bɛhɔle bɛ nzi bɛ nzi toonwo bɛvale ɛdanlɛ ne bɛhɔguale bɛ ze anwo, amaa bɛannwu kɛ bɛ ze lɛ ɔ nwo zɔ.

²⁴ Nowa anye zo tetele ye na ɔdele mɔɔ ɔ ra nrenya ekyi ne ɛyɛ la,

²⁵ ɔhanle kɛ, “Munzule ɛha Keena! Ɔbayɛ ahanra nu kanra yeamaa ɔ mediema ne mɔ dahuu.

²⁶ Ɛdɛnkɛma me Nyamenle ne ɛyila Hyɛm. Keena bayɛ Hyɛm kanranli dahuu.

²⁷ Nyamenle ɛmaa Gyeefɛte abo zo ɛdɛlɛ! Ɔ bo zo amra nee Hyɛm abo zo amra ɛdɛnla! Keena bayɛ Gyeefɛte kanranli.”

²⁸ Azuyilɛ ne anzi Nowa lile ɛvolɛ ɛya nsa abulanlu.

²⁹ Nowa lile ɛvolɛ ɛya ngɔnla abulanlu, na ɔwule.