Mosisi Buluku ne mɔɔ lumua mɔɔ bɛfɛlɛ ye Mɔlebɛbo 6 - BAEBOLO ANZƐƐ BULUKU NWUANZANWUANZA

Sonla amumuyɛyɛlɛ

¹ Mekɛ mɔɔ akee menli bɔle ɔ bo kɛ bɛso dɔɔnwo wɔ azɛlɛ ye azo, na bɛwole mralɛ mraalɛ la,

² anwomanyunlu menli bie nwunle kɛ menli amra mraalɛ ne mɔ anwo yɛ fɛ; yemɔti bɛvale mɔɔ bɛdabɛ bɛkulo la bɛgyale bɛ.

³ Na Ɛdɛnkɛma zele kɛ, “Menrɛmaa sonla ɛnrɛdɛnla aze dahuu, ɔluakɛ ɔle nwonane. Ɔvi ɛnɛ mɔɔ kɔ la sonla ɛnrɛli ɛvolɛ mɔɔ bo ɛya ko abulanwiɔ la.”

⁴ Mekɛ zɔhane anu, yɛɛ nzinlii bɔbɔ, anwomanyunlu menli zɔhane nee mralɛ mraalɛ ne mɔ wole mralɛ. Na bɛmɛ bɛ mra a le menli kakanyinlima ne mɔ mɔɔ mɔmoane ne bɛliele duma la.

⁵ Akee Ɛdɛnkɛma nwunle kɛ sonla amumuyɛyɛlɛ ne ɛyɛ kpole kpalɛ wɔ azɛlɛ ye azo, na ɛtane ngome ɛyi ye adwenle nee ye ahonle nu tɛkɛɛ.

⁶ Na ɔyɛle Ɛdɛnkɛma nyane kɛ yebɔ sonla yedo azɛlɛ ye azo a. Ɔyɛle ye nyane somaa,

⁷ na ɔhanle kɛ, “Mebɔ sonla mɔɔ mebɔ la abo zo bɔkɔɔ wɔ azɛlɛ ye azo. Mesɛkye debie biala mɔɔ mebɔ la, sonla, nane, ninyɛne mɔɔ twenle bɛ nwo aze la, yɛɛ nloma muala. Menlu me nwo bɔbɔ kɛ mebɔ bɛ a.”

⁸ Noko Nowa ɛdeɛ, Ɛdɛnkɛma hulole ye.

Nowa

^9-10 Nowa abusua ɛlɔnwɔne ne ɛne. Nowa le sonla mɔɔ di pɛlepɛle a, ɔ nwo annyia ngehanleɛ wɔ ye awolɛndoazo ne mekɛ zo. Ɔ nee Nyamenle bɛ avinli ande ɛlɛ. Ɔwole mrenya nsa, Hyɛm, Ham, yɛɛ Gyeefɛte.

¹¹ Na ɔrale kɛ ɛnee akee asɛɛ sonla ko bɔbɔ ɛnle azɛlɛ ye azo mɔɔ di boɛ wɔ Nyamenle anyunlu a; sonla ɛhunlɛ, asayɛlɛ, amumuyɛ nee basabasayɛlɛ ɛlie ebia wɔ azɛlɛ ye azo ɛleka biala.

¹² Na Nyamenle nwunle kɛ amgba, ɛtane ngome ɛyi ewiade ye, ɔluakɛ ɛnee awie biala bɔ ɛbɛla ɛtane biala mɔɔ ɔdaye ɔkulo la.

¹³ Na Nyamenle zele Nowa kɛ, “Mezi pi kɛ mesɛkye ewiade ye nee nuhua menli ne amuala, ɔluakɛ bɛva basabasayɛlɛ, sonla ɛhunlɛ, asayɛlɛ, yɛɛ amumuyɛ bɛyi ewiade ye tɛkɛɛ.

¹⁴ Yemɔti fa gɔfa baka bobɔ ɛlɛnemgbole; kyɛ nuhua ekpumgbunli ekpumgbunli na fa bilewu ka nuhua nee nwolɛ amuala.

¹⁵ Kɛ ɔwɔ kɛ ɛyɛ ye la ɛne: maa ɛlɛne ne tendenle ɛyɛ mita ɛya ko abulasa nee nsa, ye tɛtɛlɛ ɛyɛ mita abulanwiɔ nee nwiɔ na ye anwumahɔlɛ ɛyɛ mita bulu nee nsa.

¹⁶ Tu ɛlɛne ne azo, na maa adenle mɔɔ le bɛ sa waa nwiɔ la ɛla ɛlɛne ne abɛta ne anwuma nee ɛlɛne ne azo ɛdulɛ ne avinli. Bobɔ ye nzɛzo nsa na pɛ ye anlenkɛ ne to ɔ kɛnra azo.

¹⁷ Ɔluakɛ mebamaa ezule kpole bie adɔ toonwo abu aze, yeazɛkye debie biala mɔɔ die ɛnwomenle mɔɔ wɔ aleɛabo la amuala; debie biala mɔɔ wɔ azɛlɛ ye azo la bawu.

¹⁸ Na wɔmɔ, me nee wɔ bayɛ ngyekyeleɛ. Ɛ nee ɛ mra mrenya, nee ɛ ye, yɛɛ ɛ mra mrenya mraalɛ ne mɔ bavo ɛlɛne ne anu.

^19-20 Ɛbava nane biala nee debie biala mɔɔ twenle ɔ nwo aze la, nloma nee abɔdeɛ mɔɔ wɔ aleɛabo la amuala, ko biala nyinli nee belɛ, wɔahɔ ɛlɛne ne anu, amaa bɛanwu.

²¹ Ɛbava aleɛ kɔsɔɔti bie wɔazie na bɛ nee nane nee nloma ne mɔ ali.”

²² Nowa yɛle ɛhye mɔ na ɔyɛle debie biala mɔɔ Nyamenle zele ye la.