Mosisi Buluku ne mɔɔ lumua mɔɔ bɛfɛlɛ ye Mɔlebɛbo 4 - BAEBOLO ANZƐƐ BULUKU NWUANZANWUANZA

Keen nee Ebɛle

¹ Adam nee ɔ ye Yive lale, na Yive vale ɛkolɛ na ɔwole ralɛ nrenya. Bɛdonle ye Keen. Yive edwɛkɛ a le kɛ, “Ɔlua Ɛdɛnkɛma moalɛ zo mewo ralɛ nrenya.”

² Nzinlii Yive wole Keen anzi ralɛ nrenya, na bɛdonle ye Ebɛle. Ebɛle ɛnee sie mboane, yɛɛ Keen yɛ egyinli.

³ Mekɛ hɔle bie la, Keen vale ye egyinli ne anu aleɛ ne bie bɔle azu manle Ɛdɛnkɛma.

⁴ Ebɛle noko hyele mboane mralɛ mɔɔ ye mboane ne mɔ bie lumuale wole bɛ la, na ɔvale bɛ nee bɛ ɛleka mɔɔ ɛlɔ kpalɛ la ɔbɔle azu ɔmanle Ɛdɛnkɛma. Ɛdɛnkɛma anye zɔle Ebɛle azubɔdeɛ ne,

⁵ na ɔ nye anzɔ Keen azubɔdeɛ ɛdeɛ ne. Ɛhye manle Keen ati zile aze na ɛya hunle ye kpole.

⁶ Ɛdɛnkɛma bizale Keen kɛ, “Duzu ati a ɛ nyunlu ɛyɛ kpundikpundi na wɔva ɛya ɛ?

⁷ Asoo saa ɛyɛle ye boɛ a, anrɛɛ ɛ nyunlu ɛnrɛra anyia? Na wɔanyɛ ye boɛ la, ɛtane ɛhɔ ɛ nwo nzia; ɔkpondɛ kɛ ɔfo ɛ nwo zo, na wɔmɔ yɛɛ ɔwɔ kɛ ɛfo ɔ nwo zo a.”

⁸ Ɛhye anzi Keen zele ɔ diema Ebɛle kɛ, “Maa yɛhɔ ɛbɔ nu.” Bɛhɔle la, Keen holole ɔ diema Ebɛle anwo zo na ɔhunle ye.

⁹ Na Ɛdɛnkɛma bizale Keen kɛ, “Ɛ diema Ebɛle wɔ nienwu?” Keen buale kɛ, “Menze, mame a menea me diema ne anwo zo a?”

¹⁰ Ɛdɛnkɛma bizale ye kɛ, “Duzu debie a wɔyɛ la? Ɛ diema ne mogya ne mɔɔ gua azɛlɛ ne anwo la ɛlɛsu avɛlɛ me.

¹¹ Wɔbɔ munzule kɛ wɔha ɛ diema ne mogya wɔgua, wɔmaa azɛlɛ ye ɛmeme a.

¹² Ɔvi ɛnɛ mɔɔ kɔ la, debie biala mɔɔ ɛkɛlua ye azɛlɛ ye azo la ɛnrɛyɛ kpalɛ ɛnrɛmaa wɔ ɛlɛ; ɛkɛdɔ ɛ bɔ nu na mgbɔsamgbɔsa adɔ ɛ nwo wɔ azɛlɛ ye azo.”

¹³ Na Keen hanle hilele Ɛdɛnkɛma kɛ, “Me ndeanlɛ ne bo me nwo zo.

¹⁴ Wɔye me sa wɔvi azɛlɛ ye mɔɔ medidi zolɛ la anwo; wɔvoa me wɔvi ɛ nye zo. Mebadɔ ɛbɔ nu, na eza mgbɔsamgbɔsa adɔ me nwo wɔ azɛlɛ ye azo; saa awie biala nee me yia a, ɔbahu me.”

¹⁵ Na Ɛdɛnkɛma zele ye kɛ, “Kyɛkyɛ, ɔnle zɔhane! Awie biala mɔɔ kɛhu Keen la, bɛbali ye nzenralɛ fane nsuu bɛazie ɔ bo zo.” Na Ɛdɛnkɛma yɛle Keen nzonlɛ, amaa awie biala mɔɔ nee ye kɛyia la angu ye.

¹⁶ Akee Keen vile Ɛdɛnkɛma anyunlu na ɔhɔdɛnlanle Nɔɔdo wɔ Yidɛn tola ne aduduleɛ.

Keen abo zo amra

¹⁷ Keen vale ɔ ye na ɔ ye wole ralɛ nrenya, bɛdonle ye Yinɔko. Keen kyekyele suakpole ko na ɔvale ɔ ra ne duma ɔdole zolɛ.

¹⁸ Yinɔko wole ralɛ nrenya, bɛfɛlɛ ye Ayelade; Ayelade wole Mɛhugyeeyɛle. Mɛhugyeeyɛle wole Mɛtuhyeeyɛle, yɛɛ Mɛtuhyeeyɛle wole Leemɛke.

¹⁹ Leemɛke gyale mraalɛ nwiɔ; bɛfɛlɛ ko Eda, yɛɛ bɛfɛlɛ ko Zela.

²⁰ Eda wole Gyeebale, mɔɔ ɔ bo zo amra a yɛle ndanlɛ azua lale nu la yɛɛ eza bɛlɛ nyɛmoa.

²¹ Gyeebale adiema nrenya a le Dwubale. Dwubale abo zo amra a le menli mɔɔ vale getaa nee fulutu bɔle edwɛne a.

²² Raalɛ Zela wole Tubale Keen, mɔɔ ɔ bo zo amra a vale mbulalɛ nee kɔbele yɛle ɛyazonlɛ nee konle ninyɛne la. Ɔ diema raalɛ a le Neeyama.

²³ Leemɛke zele ye mraalɛ ne mɔ kɛ, “Eda nee Zela, bɛdie me aneɛ; me ye mɔ, bɛdie mɔɔ melɛka la: Mehu kpavolɛ bie mɔɔ bɔle me, bodale me la.

²⁴ Saa mɔɔ kɛhu Keen la bɛkɛli ye nzenralɛ fane nsuu a, ɛnee mɔɔ kɛhu medame Leemɛke la, bɛkɛli ye nzenralɛ fane abulasuu nee nsuu.”

Sɛte nee Yinɔhye

²⁵ Adam nee ɔ ye wole ralɛ nrenya bieko. Ɔ ye hanle kɛ, “Nyamenle ɛmaa me ralɛ nrenya ɛmaa meva mezie Ebɛle, mɔɔ Keen hunle ye la abo zo.” Na ɔdonle ye Sɛte.

²⁶ Sɛte wole ralɛ nrenya na ɔdonle ye Yinɔhye. Mekɛ ne anu menli bɔle ɔ bo kɛ bɛsonle Ɛdɛnkɛma.