Mosisi Buluku ne mɔɔ lumua mɔɔ bɛfɛlɛ ye Mɔlebɛbo 17 - BAEBOLO ANZƐƐ BULUKU NWUANZANWUANZA

Ngyekyeleɛ ne nzonlɛ a le mrenyanu nzonlɛyɛlɛ

¹ Mekɛ mɔɔ Ebilam lile ɛvolɛ abulahɔnla nee ngɔnla la, Ɛdɛnkɛma yele ɔ nwo hilele ye na ɔzele ye kɛ, “Medame a mele Nyamenle Bedevinli ne a; di me mɛla zo na mmamaa ɛ nwo nyia ngehanleɛ biala.

² Me nee wɔ bayɛ ngyekyeleɛ, yɛɛ mebamaa ɛ bo zo amra azo dɔɔnwo kpalɛ.”

³ Na Ebilam dule dɔle ɔ nyunlu mutule nu, na Nyamenle zele ye kɛ,

⁴ “Me nee wɔ ɛyɛ ngyekyeleɛ ne; ɛbayɛ maanle maanle dɔɔnwo bɛ ze.

⁵ Bɛnrɛvɛlɛ wɔ Ebilam bieko, bɛbavɛlɛ wɔ Ebileham, ɔluakɛ meyɛ wɔ maanle maanle dɔɔnwo bɛ ze.

⁶ Mebamaa wɔanyia ɛ bo zo amra dɔɔnwo. Ɛ bo zo amra bazo somaa ayɛ maanle maanle, na bie mɔ ayɛ arelemgbunli.

⁷ “Me nee wɔ nee ɛ bo zo amra bayɛ ngyekyeleɛ mɔɔ baha awolɛndoazo ne mɔ amuala la, na yeayɛ ngyekyeleɛ mɔɔ bɛntulu ye ɛlɛ a. Mebayɛ wɔ Nyamenle na meayɛ ɛ bo zo amra noko Nyamenle.

⁸ Na mebava azɛlɛ ne mɔɔ ɛlɛkpɔsakpɔsa zolɛ la meamaa wɔ nee ɛ bo zo amra. Bɛbava Keena azɛlɛ ne kɔsɔɔti bɛayɛ bɛ ɛdeɛ, na mebayɛ bɛ Nyamenle.”

⁹ Nyamenle zele Ebileham kɛ, “Wɔmɔ, ɔwɔ kɛ ɛdawɔ nee ɛ bo zo amra kɔsɔɔti di me ngyekyeleɛ ne azo.

¹⁰ Ngyekyeleɛ mɔɔ wɔ me nee ɛdawɔ nee ɛ bo zo amra yɛ avinli, mɔɔ ɔwɔ kɛ bɛdi zolɛ la ɛne: Ɔwɔ kɛ bɛyɛ nrenya biala mɔɔ wɔ bɛ avinli la mrenyanu nzonlɛ.

^11-13 Ɔvi ɛnɛ mɔɔ kɔ la, ɔwɔ kɛ bɛyɛ nrenya biala mɔɔ bɛkɛwo ye na ɔkɛli kenle mɔtwɛ la mrenyanu nzonlɛ. Saa bɛwo ye wɔ wɔ sua nu o, kanranli mɔɔ wɔva wɔ ezukoa wɔdɔ wɔvi ɛyɛvolɛ bie ɛkɛ ne la o, kanranli mɔɔ bɛwo ye wɔ wɔ sua nu ɛkɛ ne la o, ɔwɔ kɛ bɛyɛ ye mrenyanu nzonlɛ. Ɛhye a bahile kɛ bɛlɛdi me ngyekyeleɛ ne azo a. Ɔwɔ kɛ bɛyɛ bɛ mrenyanu nzonlɛ wɔ awolɛndoazo muala anu, amaa me ngyekyeleɛ ye nzonlɛ aha bɛ nwonane nu yeayɛ ngyekyeleɛ mɔɔ bɛntulu ye ɛlɛ a.

¹⁴ Nrenya biala mɔɔ anyɛ ye mrenyanu nzonlɛ la ɛtulu me ngyekyeleɛ ne; ɔwɔ kɛ bɛye ye bɛfi me menli ne avinli.”

¹⁵ Nyamenle zele Ebileham kɛ, “Ɛ ye Sɛleeyae noko, mmafɛlɛ ye Sɛleeyae bieko. Ye duma a le Sɛla.

¹⁶ Mebayila ye, na yeayɛ maanle maanle bɛ nli. Ɔ bo zo amra bie mɔ bayɛ arelemgbunli.”

¹⁷ Ebileham dule dɔle mutule nu zelele na ɔbizale ɔ nwo kɛ, “Asoo nrenya mɔɔ ɛli ɛvolɛ ɛya la bahola awo ralɛ? Asoo Sɛla mɔɔ ɛli ɛvolɛ abulahɔnla la bawo ralɛ?”

¹⁸ Na ɔhanle ɔhilele Nyamenle kɛ, “Anrɛɛ ɛmanle Yehyemeeyɛle zɔle ɛ nye.”

¹⁹ Nyamenle zele ye kɛ, “Kyɛkyɛ, ɛ ye Sɛla bawo ralɛ nrenya na ɛbavɛlɛ ye Ayezeke. Mebali me ngyekyeleɛ ne azo meamaa ye nee ɔ bo zo amra mɔɔ bɛntulu ye ɛlɛ a.

²⁰ Yehyemeeyɛle ɛdeɛ, mede mɔɔ wɔha la. Nea, meyila ye na mebamaa ɔ sa zo ada, bɛ nwo azo dɔɔnwo. Ɔbayɛ arelemgbunli bulu nee nwiɔ bɛ ze, na mebamaa yeayɛ maanle kpole kpalɛ.

²¹ Noko Ayezeke mɔɔ Sɛla bawo ye ɛvolɛ bieko kabezɛ la, yemɔ yɛɛ me nee ye bakyekye me ngyekyeleɛ ne a.”

²² Nyamenle wiele tendɛ la, ɔgyakyile Ebileham ɛkɛ ɔhɔle anwuma.

²³ Akee, Ebileham vale ɔ ra Yehyemeeyɛle nee ahanra mrenya mɔɔ bɛwole bɛ ye sua nu ɛkɛ, nee mɔɔ ɔvale ye ezukoa ɔdɔle la amuala na ɔyɛle bɛ mrenyanu nzonlɛ, kɛmɔ Nyamenle hanle hilele ye la.

²⁴ Mɔɔ bɛyɛ Ebileham mrenyanu nzonlɛ la, ɛnee yeli ɛvolɛ abulahɔnla nee ngɔnla.

²⁵ Ɛnee Yehyemeeyɛle ɛli ɛvolɛ bulu nee nsa yɛɛ bɛyɛle ye mrenyanu nzonlɛ a.

²⁶ Kenle ko ne ala a bɛyɛle Ebileham nee ɔ ra Yehyemeeyɛle mrenyanu nzonlɛ a.

²⁷ Kenle ko ne ala, mrenya mɔɔ wɔ sua nu ɛkɛ ne la, bɛdabɛ mɔɔ bɛwole bɛ ɛkɛ nee bɛdabɛ mɔɔ bɛdɔle bɛ ahanra la, bɛyɛle bɛ kɔsɔɔti mrenyanu nzonlɛ.