Mosisi Buluku ne mɔɔ lumua mɔɔ bɛfɛlɛ ye Mɔlebɛbo 11 - BAEBOLO ANZƐƐ BULUKU NWUANZANWUANZA

Babelɔn Tawa ne

¹ Alumua ne ɛnee ewiade amra amuala ka aneɛ ko, yɛɛ bɛ ɛdendɛlɛ le ko.

² Na bɛvi aduduleɛ bɛdule bɛ bo la, bɛradwule Babelonia azɛlɛ sɛsɛ bie azo na bɛdɛnlanle ɛkɛ.

³ Nzinlii bɛhanle bɛhilele bɛ nwo ngoko kɛ, “Bɛrɛla! Bɛmaa yɛva ɛva yɛgua belekese, na yɛdo yɛmaa bɛyɛ ketekete.” Amgba bɛguale ɛva belekese bɛdonle bɛmanle bɛyɛle ketekete na bɛvale bɛmɛ bɛyɛle awolɛ, yɛɛ bɛnyianle bilewu mɔɔ bɛfa bɛasosɔ ayia ne mɔ azo la.

⁴ Akee bɛzele kɛ, “Bɛmaa yɛkyekye suakpole ko na yɛzi tawa tendendenlenle ko mɔɔ kɔkpula Nyamenle ne ako abo nehane la, amaa yɛalie duma na yeamkponde azɛlɛ ye azo.”

⁵ Ɛdɛnkɛma dwule aze rakpɔlale suakpole ne mɔɔ bɛkyekye nee tawa tendendenlenle ne mɔɔ sonla ɛzi la.

⁶ Na ɔhanle kɛ, “Bɛnlea, kɛkala, bɛle menli ko, yɛɛ bɛ aneɛ le ko; ɛhye le mɔɔ kenle bie bɛbayɛ la mɔlebɛbo. Ɔnrɛhyɛ, bɛbahola bɛayɛ debie biala mɔɔ bɛkɛze kɛ bɛyɛ la.

⁷ Bɛmaa yɛhɔkpɔtɔ bɛ ɛdendɛlɛ ne, amaa bɛande bɛ nwo aneɛ bieko.”

⁸ Yemɔti Ɛdɛnkɛma manle bɛkpondenle bɛhɔle azɛlɛ ye azo ɛleka biala, na bɛgyakyile suakpole ne ɛkyekyelɛ.

⁹ Bɛvɛlɛle suakpole ne Babelɔn, ɔboalekɛ ɛkɛ ne a Ɛdɛnkɛma manle menli ne aneɛ yɛle ngakyile ngakyile na ɔmanle bɛkpondenle azɛlɛ ye azo amuala a.

Hyɛm abo zo amra

¹⁰ Hyɛm abo zo amra ɛne. Azuyilɛ ne anzi ɛvolɛ nwiɔ, mɔɔ ɛnee Hyɛm ɛli ɛvolɛ ɛya ko la, ɔwole ralɛ nrenya na ɔdonle ye Apakyehyade.

¹¹ Ɛhye anzi, Hyɛm dɛnlanle aze ɛvolɛ ɛya nnu na ɔwole mralɛ mrenya nee mraalɛ.

¹² Apakyehyade lile ɛvolɛ abulasa nee nnu la, ɔwole ɔ ra nrenya Hyila.

¹³ Ɛhye anzi, Apakyehyade dɛnlanle aze ɛvolɛ ɛya nna ɛvolɛ nsa, na ɔwole mralɛ mrenya nee mraalɛ.

¹⁴ Hyila lile ɛvolɛ abulasa la, ɔwole ɔ ra nrenya Yibɛ.

¹⁵ Ɛhye anzi, Hyila dɛnlanle aze ɛvolɛ ɛya nna ɛvolɛ nsa, na ɔwole mralɛ mrenya nee mraalɛ.

¹⁶ Yibɛ lile ɛvolɛ abulasa nee nna la, ɔwole ɔ ra nrenya Pilɛge.

¹⁷ Ɛhye anzi, Yibɛ dɛnlanle aze ɛvolɛ ɛya nna abulasa, na ɔwole mralɛ mrenya nee mraalɛ.

¹⁸ Pilɛge lile ɛvolɛ abulasa la, ɔwole ɔ ra nrenya Riliwu.

¹⁹ Ɛhye anzi, Pilɛge dɛnlanle aze ɛvolɛ ɛya nwiɔ ɛvolɛ ngɔnla, na ɔwole mralɛ mrenya nee mraalɛ.

²⁰ Riliwu lile ɛvolɛ abulasa nee nwiɔ la, ɔwole ɔ ra nrenya Silɛge.

²¹ Ɛhye anzi, Riliwu dɛnlanle aze ɛvolɛ ɛya nwiɔ ɛvolɛ nsuu, na ɔwole mralɛ mrenya nee mraalɛ.

²² Silɛge lile ɛvolɛ abulasa la, ɔwole ɔ ra nrenya Neehɔ.

²³ Ɛhye anzi, Silɛge dɛnlanle aze ɛvolɛ ɛya nwiɔ, na ɔwole mralɛ mrenya nee mraalɛ.

²⁴ Neehɔ lile ɛvolɛ abulanwiɔ nee ngɔnla la, ɔwole ɔ ra nrenya Tilaa.

²⁵ Ɛhye anzi, Neehɔ dɛnlanle aze ɛvolɛ ɛya ko ɛvolɛ bulu nee ngɔnla, na ɔwole mralɛ mrenya nee mraalɛ.

²⁶ Tilaa lile ɛvolɛ abulasuu kolaa na yeawo ɔ mra mrenya Ebilam, Neehɔ, yɛɛ Hɛlan.

Tilaa abo zo amra

²⁷ Tilaa, mɔɔ wole Ebilam, Neehɔ, yɛɛ Hɛlan la abo zo amra ɛne: Hɛlan wole Lɔɔto.

²⁸ Hɛlan wule kolaa na ɔ ze Tilaa awu. Ɔwule ɔdaye ye maanle nu, suakpole ne mɔɔ bɛfɛlɛ ye Yule mɔɔ wɔ Babelonia maanle nu la azo.

²⁹ Ebilam gyale Sɛleeyae, yɛɛ Neehɔ gyale Melekaa, mɔɔ ɔ ze a le Hɛlan la. Hɛlan a wole Yesakaa a.

³⁰ Sɛleeyae yɛle mota; yeanwo ralɛ.

³¹ Tilaa vale ɔ ra nrenya Ebilam, ye anlɔnra Lɔɔto, mɔɔ ɔ ze a le Hɛlan la yɛɛ ɔ ra Ebilam aye Sɛleeyae na bɛvile bɛ sua zo Yule, mɔɔ wɔ Babelonia maanle nu la kɛ bɛkɔ Keena azɛlɛ zo. Noko mɔɔ bɛhɔdwule Hɛlan la, bɛhale ɛkɛ ne bɛdɛnlanle.

³² Ɛkɛ ne a Tilaa wule a; ɔlile ɛvolɛ ɛya nwiɔ ɛvolɛ nnu.