Pɔɔlo Kɛlata mɔɔ ɔhɛlɛle ɔhɔmanle Galeehyeama la 6 - BAEBOLO ANZƐƐ BULUKU NWUANZANWUANZA

Bɛsosɔ bɛ nwo ngoko

¹ Mediema, saa bɛnwu awie mɔɔ ɛlɛyɛ ɛtane a, bɛdabɛ mɔɔ Nyamenle Sunsum ne wɔ bɛ nu la ɛdenrɛ ye, noko anrɛɛ bɛyɛ ye bɛtɛɛ wɔ adenle kɛnlɛma nu. Bɛdabɛ noko bɛnlea bɛ nwo boɛ na bɛanyɛ mɔɔ ahenle yɛle la bie.

² Bɛsosɔ bɛ nwo ngoko, na bɛyɛ ye zɔhane a ɛnee bɛlɛdi Kelaese mɛla ne azo.

³ Saa awie bu ɔ nwo noko ɔndo ɛhwee a, ɛnee ɔlɛbɛlɛbɛla ɔ nwo.

⁴ Awie biala ɔdaye ɔwɔ kɛ ɔbua ye nyɛleɛ nwo ndɛne, na saa ɔle kpalɛ a yeava mɔɔ yeyɛ la yeadu ɔ nwo; ɔmmafa awie ɛdeɛ mɔɔ ɛyɛ la ɔto ye ɛdeɛ ne anwo.

⁵ Ɔluakɛ awie biala ɔdaye ɔbazoa ye adesoa.

⁶ Bɛmaa awie mɔɔ bɛlɛmaa ye Nyamenle Edwɛkɛ nwo ngilehilelɛ la ɛmaa ye kilehilevolɛ ne debie kpalɛ biala mɔɔ ɔkɛnyia ye la bie.

⁷ Bɛmmabɛlɛbɛla bɛ nwo; bɛnzi Nyamenle amgbu, ɔluakɛ mɔɔ sonla kɛlua la yɛɛ ɔbu a;

⁸ ɔluakɛ, mɔɔ kɛli ye nwonane ne atiakunluwɔzo nzi la banyia ewule. Na mɔɔ di Nyamenle Sunsum ne anzi la balua Sunsum ne azo anyia ngoane mɔɔ ɛnlɛ awieleɛ.

⁹ Bɛmaa yɛhɔ zolɛ yɛyɛ kpalɛ; ɔluakɛ saa yɛangyakyi nyele ɛyɛlɛ a, kenle bie yɛbanwu ɔ bo aleɛ.

¹⁰ Zɔhane ati, kenle biala mɔɔ mekɛ kɛra kɛ ɔwɔ kɛ yɛyɛ nyele la, bɛmaa yɛyɛ yɛmaa awie biala, bɔbɔ bɛdabɛ mɔɔ yɛ nee bɛ yɛ muala yɛlɛ diedi ko la.

Kɔkɔbɔlɛ nee ahyebizalɛ

¹¹ Bɛnlea kɛ mezi meva me sa anloa mgbole ye melɛkɛlɛ bɛ la.

¹² Menli mɔɔ ɛlɛka ye ndinlizo kɛ bɛyɛ bɛ mrenyanu nzonlɛ la kulo kɛ bɛkile bɛ nwo ala kɛ bɛze amaamuo. Bɛyɛ bie zɔhane ala, amaa awie anyɛ bɛ kpɔdekpɔde kɛ bɛlɛka Kelaese ewule mɔɔ ɔwule meanubaka ne azo la anwo edwɛkɛ.

¹³ Bɛdabɛ mumua ne mɔɔ bɛ nye ɛbolo mrenyanu nzonlɛyɛlɛ nwo bɔbɔ la, bɛnli mɛla ne azo nretee zɛhae. Bɛkulo kɛ bɛmɛ Galeehyeama bɛyɛ bɛ mrenyanu nzonlɛ, amaa bɛanyia bie bɛadu bɛ nloa anu kɛ bɛmɛ a bɛmaa bɛlɛdi zɛhae mɛla ne azo a.

¹⁴ Na mame, ɔkɛbɔ me tɔ kɛ menwɔdu me nloa anu a kyesɛ debie ko anwo ala, yemɔ a le Awulae Kelaese Gyisɛse meanubaka ne. Ɔluakɛ ye meanubaka ne ati, ewiade le debie funli maa me, yɛɛ medame mumua ne mewu memaa ewiade.

¹⁵ Saa ɔwɔ kɛ awie yɛ ye mrenyanu nzonlɛ o, saa ɔnle kɛ ɔyɛ o, ɔle debie mɔɔ ɛngyia fee a. Mɔɔ hyia la a le kɛ yɛkɛyɛ menli fofolɛ bɔkɔɔ.

¹⁶ Bɛdabɛ mɔɔ bɛdi zɛhae ngyehyɛlɛ fofolɛ ne azo la, bɛmɛ nee Nyamenle menli kɔsɔɔti, yɛɛ yɛsɛlɛ kɛ ɔdaye Nyamenle ɔnwu bɛ anwunvɔne na ɔmaa bɛdɛnla anzonudwolɛ nu a.

¹⁷ Ɔvi ɛnɛ mɔɔ kɔ la awie biala mmagyegye me bieko, ɔboalekɛ ahapenle mɔɔ wɔ me nwo la kile kɛ mele Kelaese Gyisɛse akɛlɛ.

¹⁸ Me mediema, yɛ Awulae Gyisɛse Kelaese ɛlo bɛ na ɔ nee bɛ muala ɛdɛnla! Amen.