Pɔɔlo Kɛlata mɔɔ ɔhɛlɛle ɔhɔmanle Galeehyeama la 1 - BAEBOLO ANZƐƐ BULUKU NWUANZANWUANZA

¹ Medame Pɔɔlo, mɔɔ Gyisɛse Kelaese nee Nyamenle Selɛ ne mɔɔ dwazole ye vile mɔwuamra anu la ɛvɛlɛ me kɛ menyɛ ɛzoanvolɛ, na tɛ menli a ɛhyehyɛ ɛyɛ me bɛ ɛzoanvolɛ la a melɛkɛlɛ kɛlata ɛhye a.

² Me nee mediema mɔɔ wɔ ɛke la amuala yɛbiza bɛdabɛ asɔnema mɔɔ bɛwɔ Galeehyea maanzinli nu la amuala ahye.

³ Nyamenle Selɛ ne nee Awulae Gyisɛse Kelaese ɛlo bɛ na ɔmaa bɛ anzonudwolɛ.

⁴ Gyisɛse Kelaese wule manle yɛ, ɔliele yɛ ɔvile yɛ ɛtane nu, amaa yeaye yɛ yeavi munzule mekɛ ɛhye anu; ɔyɛle ɛhye, ɔluakɛ mɔɔ yɛ Ze Nyamenle ne kpondɛ kɛ ɔyɛ la ɛne.

⁵ Anyunlunyia ɛha Nyamenle dahuu! Amen.

Edwɛkpa ne le kokye

⁶ Ɔyɛ me azibɛnwo kɛ kɛkala angome bɛlɛnriandi bɛavi Nyamenle ne mɔɔ ɔlua Gyisɛse Kelaese ati yelo bɛ na yevɛlɛ bɛ la anwo bɛahɔli edwɛkpa fofolɛ nzi a.

⁷ Nɔhalɛ, Edwɛkpa fofolɛ bieko ɛnle ɛkɛ mɔɔ vi Nyamenle ɛkɛ, kɛ mɔɔ meha mehile bɛ la ala. Menwu kɛ awie mɔ ɛlɛgyegye bɛ azɛkye bɛ adwenle, na bɛahakyi Edwɛkpa ne mɔɔ fane Kelaese anwo la.

⁸ Noko awie biala, saa yɛdayɛ o anzɛɛ Nyamenle soanvolɛma o, mɔɔ bɔ edwɛkpa gyɛne bie nolo ahile bɛ atia mɔɔ yɛha yɛhile bɛ dɛba la, munzule ɛha ye.

⁹ Yɛha, na eza mesi zolɛ bieko kɛ awie biala mɔɔ kɛbɔ edwɛkpa gyɛne bie nolo kɛhile bɛ kɛtia mɔɔ bɛde na bɛlie bɛli la, munzule ɛha ye.

¹⁰ Ɛnee ɔyɛ bɛ kɛ kɛkala akee mekpondɛ menli nganvolɛ, anzɛɛ Nyamenle nganvolɛ ɔ? Anzɛɛ mekpondɛ me nyunlu wɔ menli nu ɔ? Kyɛkyɛ! Saa mekpondɛ me nyunlu wɔ menli nu a, ɛnee menle Kelaese akɛlɛ.

Kɛ Pɔɔlo zile yɛle Kelaese ɛzoanvolɛ la

¹¹ Ayi mɔ, mekakye bɛ adwenle kɛ Edwɛkpa ne mɔɔ mebɔ ye nolo la ɛnvi sonla ɛkɛ.

¹² Meanlie meanvi awie lɔ, yɛɛ tɛ awie a hilehilele me a. Gyisɛse Kelaese ɔdaye mumua ne a yele hilele me a.

¹³ Bɛdabɛ bɛde mɔɔ menyɛle wɔ mekɛ mɔɔ ɛnee meli Dwuuma Nyamenlezonlenlɛ maamɛla ne anzi la. Menyɛle Nyamenle menli ne kpɔdekpɔde memanle ɔbole zolɛ na membɔle mɔdenle kɛ megu asɔne ne.

¹⁴ Wɔ me tipɛne ne mɔ anu, biala ɛnle ɛkɛ mɔɔ nee me sɛ wɔ Dwuuma maamɛla ne azo ɛlilɛ nu a, yɛɛ eza me nye bolo yɛ nlenya mɔ ngilehilelɛ ne mɔɔ bɛgyakyile yɛ la anwo ɛsesebɛ kpalɛ.

¹⁵ Na amuanrɛɛ wɔ ɛhye mɔ amuala anu, ɛnee Nyamenle ɛye me ɛzie ɛkɛ dɛba ɛmaa ɔ nwo, bɔbɔ kolaa na bɛawo me, yɛɛ akee yelua ye ɛlolɛ zo yevɛlɛ me kɛ mendoa ɔ bo zo na menyɛ ye gyima a. Yemɔti mɔɔ mekɛ ne dwule na ɔbɔle kpɔkɛ

¹⁶ ɔyele ɔ ra ne ɔhilele me kɛ akee menga Edwɛkpa ne mɔɔ fane Kelaese anwo mengile bɛdabɛ mɔɔ bɛnle Dwuuma la amuala mɔɔ ɛtɛtele la, meangɔmbiza sonla biala adwenle,

¹⁷ yɛɛ meangɔ Gyɛlusalɛm bɔbɔ kɛ mekanwu bɛdabɛ mɔɔ bɛle Kelaese ɛzoanvolɛma mɔɔ bɛli me nyunlu la. Ɛleka mɔɔ mengɔle la a le Areleebea, yɛɛ nzinlii menziale membale Dɛmasekɛse a.

¹⁸ Ɛvolɛ nsa anzi yɛɛ akee mengɔle Gyɛlusalɛm mengɔnlile dapɛne nwiɔ mengɔmkpɔlale Pita a.

¹⁹ Meangɔnwu ɛzoanvolɛ gyɛne bieko kɛ Gyemise mɔɔ le Awulae adiema nrenya ne ala.

²⁰ (Nyamenle anyunlu, mɔɔ melɛka la amuala, adalɛ fee ɛnle nu.)

²¹ Nzinlii mengɔle akpɔsa wɔ Selea nee Selesea maanzinli ne mɔ anu.

²² Mekɛ ne anu ɛnee asɔnema mɔɔ wɔ Dwudiya la biala ɛnze me.

²³ Mɔɔ ɛnee bɛze la a le mɔɔ awie mɔ ɛha na bɛde wɔ me nwo la kɛ, “Sonla ne mɔɔ yɛle yɛ kpɔdekpɔde kɛ ɔsɛkye Keleseɛn ɛzonlenlɛ ne la a ɛnɛ ɛlɛbɔ diedi ko ne ala nolo yeahile maanlema kɛ bɛlie Gyisɛse bɛli la!”

²⁴ Na ɔlua me ti bɛyele Nyamenle ayɛlɛ.