Ɛzela Buluku ne 9 - BAEBOLO ANZƐƐ BULUKU NWUANZANWUANZA

Ɛzela te kɛ Dwuuma bie mɔ ɛgya menli mɔɔ ɛnle Dwuuma la bie mɔ

¹ Yɛyɛle ninyɛne ɛhye mɔ yɛwiele la, Yizilayɛ mgbanyima ne bie mɔ rale me nwo ɛkɛ ne razele me kɛ Yizilayɛma, sɛlɛvolɛma, nee Livaema bie mɔ ɛtɛtwenle bɛ nwo ɛtɛfile menli mɔɔ wɔ azɛlɛ ne azo la munzule ɛbɛla ne mɔ anwo. Menli ɛhye mɔ a le Keenama, Hɛtema, Pɛlɛzema, Gyibɛsema, Amɔnoma, Mowabema, Yigyibitima, yɛɛ Amɔlema.

² Dwuuma bie mɔ ɛgya azɛlɛ ne azo amra bie mɔ amra mraalɛ na bɛmaa bɛ mra mrenya noko ɛgya bɛ mra mraalɛ, ɔlua zolɛ yemaa menli nwuanzanwuanza ɛhye mɔ nee azɛlɛ ne azo amra ɛli afonla. Nyɛleɛ ɛtane zɛhae, mbusua mgbanyinli ne mɔ nee mbɔlɔba ne mɔ bɔbɔ a yɛle ye kpalɛ a.

³ Mendele ɛhye na ɛya mɔɔ hunle me nee me nwo mɔɔ yelɛyelale me la manle mensuosuanle me tɛladeɛ mɔɔ mewula la anu na mendudule me ti nee me kɛsa enrinli. Nyane nee arɛlebɔlɛ wiele me kyekye na mendɛnlanle aze koonwu.

⁴ Bɛdabɛ mɔɔ bɛ ahonle dule wɔ Yizilayɛ Nyamenle ne edwɛkɛ ne mɔɔ ɛha wɔ ninyɛndane ɛhye mɔ mɔɔ menli mɔɔ vi nlɔnu ɛra la ɛyɛ la anwo la bɔle yiale me, na yɛ muala yɛdɛnlanle ɛkɛ ne toonwo ɔhɔdwule nɔsolɛ azubɔlɛ mekɛ ne.

⁵ Ɔdwule nɔsolɛ azubɔlɛ mekɛ ne la, menvile ɛleka mɔɔ ɛnee mede melɛkye ɛhɔne ne la mendwazole, menvale me tɛladeɛ suosuanlera ne ala mengotole, mendɛlɛle me sa nu na menzɛlɛle Ɛdɛnkɛma me Nyamenle ne kɛ,

⁶ “O me Nyamenle, ɔyɛ me anyiemgba na ɔyɛ me nyiane bɔbɔ kɛ menwɔkpogya me nye zo menwɔnlea wɔ a, ɔluakɛ yɛ amumuyɛ ɛbɛla ne ɛbo zolɛ na yɛ ɛtane ne mɔ ɛdwu ɛ nyunlu.

⁷ Ɔvi yɛ nlenya mɔ mekɛ zo toonwo mɔɔ ɛradwu ɛnɛ la, yɛvo dɔɔnwo kpalɛ. Ɔlua yɛ ɛtane ne mɔ ati, yɛdayɛ o, yɛ arelemgbunli, nee yɛ sɛlɛvolɛma o, yɛ muala yɛdɔ donvula wɔ arelemgbunli mɔɔ ɛbɔ ɛyia yɛ la asa anu. Ɔlua zolɛ bɛhu yɛ bie mɔ, bɛkpokpo yɛ, bɛhye yɛ bie mɔ nuokɛ bɛhɔ nlɔnu, bɛhile yɛ nyane, bɛgua yɛ nyunlu aze toonwo a yeradwu ɛnɛ a.

⁸ Noko Ɛdɛnkɛma yɛ Nyamenle, wɔ mekɛ ekyi ye anu, wɔlo yɛ na wɔmaa yɛ bie mɔ ɛvi akɛlɛzonlenlɛ nu kɛ bɛradɛnla anzonudwolɛ nu wɔ ɛleka nwuanzanwuanza ɛhye. Wɔ yɛ akɛlɛzonlenlɛ nu, ɛmanle yɛ nwo kpundinle yɛ, amaa yɛabɔ ɛbɛla kpalɛ.

⁹ Mɔɔ ɛnee yɛle ahanra la, yɛ Nyamenle ne arɛle amkpa yɛ nwo zo. Wɔmaa wɔ ɛhulolɛ ɛdenrɛ yɛ nwo zo wɔ Pɛhyea Maanle Maanle arelemgbunli anyunlu. Ɔlua zolɛ bɛbɔ yɛ ɛwɔkɛ na bɛmaa yɛ anwosesebɛ kɛ yɛzi yɛ Nyamenle ne Ɛzonlenlɛ Sua ne mɔɔ ɛbubu la, na yɛyɛ ye boɛ, na wɔazinza yɛ wɔ Dwuda nee Gyɛlusalɛm amuala.

¹⁰ “Na kɛkala, O Nyamenle, duzu edwɛkɛ bɔbɔ yɛɛ akee yɛha wɔ ɛhye mɔ amuala anzi a? Yɛtietia wɔ mɛla ne mɔ mɔɔ

¹¹ ɛluale wɔ ngɛkɛlɛ Nyamenle kpɔmanvolɛma anwo zo ɛvale ɛmanle yɛ kɛ, ‘Azɛlɛ ne mɔɔ bɛlɛkɔ bɛahɔva la le azɛlɛ mɔɔ menli mɔɔ wɔ zolɛ la ɛva munzule ɛbɛla ɛzɛkye ye, ɔvi ɔ ti yehɔdwu ɔ bo a.

¹² Zɔhane ati bɛmmamaa bɛ mra mrenya gya ɛkɛ ne mbɛlɛra ne mɔ bie, yɛɛ bɛmmamaa bɛ mra mraalɛ gya ɛkɛ ne mgbavolɛ ne mɔ bie. Bɛmmakpondɛ bɛ nee anzonudwolɛ anzɛɛ ɛkpazilɛ, amaa bɛdabɛ Yizilayɛma bɛ nwo ayɛ se bɛadidi azɛlɛ ne azo na bɛagyakyi bɛazie bɛ mra nee bɛ nlɔnra wɔ mekɛ biala.’

¹³ Ndeanlɛ biala mɔɔ wɔva wɔdea yɛ nee debie biala mɔɔ ɛzi yɛ nwo zo wɔ yɛ ɛtane nee yɛ amumuyɛ ne mɔ ati la le ekyi, ɛhye ati yɛɛ kɛkala yɛdayɛ mɔɔ yɛha la yɛtɛte aze a.

¹⁴ Saa ye zɛhae a ɛnee yɛbulu wɔ mɛla ne azo bieko na yɛsia yɛ nee amumuyɛma ɛhye mɔ gyigya yɛ nwo a ɔnrɛyɛ boɛ. Yɛyɛ ye zɔhane a ɛbava ɛya kpole na wɔazɛkye yɛ mɔɔ yɛ nuhua ko bɔbɔ ɛnrɛha a.

¹⁵ O Ɛdɛnkɛma, Yizilayɛ Nyamenle, wɔmɔ ɛdi pɛlepɛle, noko wɔnwu yɛ anwunvɔne wɔva yɛ ɛtane ne mɔ wɔhyɛ yɛ wɔmaa yɛdayɛ ekyi mɔɔ yɛha la yɛtɛte ngoane nu. Yɛka yɛto gua kɛ yɛdi fɔlɛ na yɛnfɛta ɛ nyunlu.”