Ɛzela Buluku ne 5 - BAEBOLO ANZƐƐ BULUKU NWUANZANWUANZA

¹ Mekɛ ne anu ɛnee Nyamenle kpɔmanvolɛma, Hagae nee Zɛkalaya, mɔɔ ɔ ze a le Yido la lua Yizilayɛ Nyamenle ne duma nu lɛ Nyamenle nrɛlaleɛ ɛlɛmaa Dwuuma mɔɔ wɔ Dwuda nee Gyɛlusalɛm la.

² Na Hyialeteɛle ara Zɛlɛbabɛle nee Gyɛhozadake ara Dwɔhyua dwazole na bɛbɔle ɔ bo bieko kɛ bɛsi Nyamenle Sua ne wɔ Gyɛlusalɛm. Nyamenle kpɔmanvolɛma nwiɔ ne boale bɛ.

³ Ndɛndɛ ne ala Yufileti Adɔleɛ Amɛnlado Tatenae, nee Hyita Bɔzenae, nee bɛ gɔnwo mɔ arane mbɔlɔba rale Gyɛlusalɛm rabizale bɛ kɛ, “Nwane a manle bɛ adenle kɛ bɛzɔ Nyamenle Ɛzonlenlɛ Sua ye ɛzilɛ zo bieko a?”

⁴ Eza bɛbizale bɛ bɛliele menli mɔɔ ɛlɛsi sua ne la kɔsɔɔti aluma.

⁵ Na ɛnee Nyamenle anye wɔ Dwuu mgbanyima ne mɔ anwo zo la ati, bɛandua bɛ kɛ bɛmmasi sua ne. Bɛvale nwolɛ edwɛkɛ bɛhɔmanle Belemgbunli Dalayɛse na bɛyɛle kɛ bɛkendɛ bɛadie nwolɛ mualɛ kolaa na bɛkɛyɛ debie a bɛayɛ.

⁶ Kɛlata mɔɔ Yufileti Adɔleɛ Amɛnlado Tatenae, Hyita Bɔzenae, nee bɛ sa zo arane mbɔlɔba vale hɔmanle Belemgbunli Dalayɛse la, edwɛkɛ mɔɔ wɔ nu la ɛne:

⁷ “Yɛlɛ yɛkamaa Maanle Maanle Belemgbunli Dalayɛse. Wɔ belemgbunlililɛ ɛva anzonudwolɛ ɛrɛla.

⁸ “Yɛmaa belemgbunli ade kɛ yɛhɔle Dwuda maanzinli nu na yɛhɔnwunle kɛ bɛlɛsi Nyamenle bedevinli ne Ɛzonlenlɛ Sua ne bieko. Menli ne mɔ lɛ awolɛ mgbole a ɛlɛsi a na bɛfa mbaka mgbole bɛwulowula ye bane ne mɔ anu. Menli ne lɛ nrɛlɛbɛ nee adwenle, bɛdo bɛ rɛle aze yɛɛ bɛlɛsi sua ne a, na ɔlɛkɔ zolɛ kpalɛ.

⁹ “Yɛbizale bɛ mgbanyima ne mɔ kɛ bɛhile yɛ ahenle mɔɔ manle bɛ adenle kɛ bɛzi Ɛzonlenlɛ Sua ne la.

¹⁰ Eza yɛbizale menli mɔɔ ɛlɛsi sua ne la aluma amaa yɛahɛlɛ menli mɔɔ li bɛ ti la aluma yɛarɛlɛ wɔ.

¹¹ “Na bɛbuale yɛ kɛ, ‘Yɛle Nyamenle ne mɔɔ bɔle anwuma nee aze la sonvolɛma. Yɛlɛsi Ɛzonlenlɛ Sua ɛhye mɔɔ bɛzile ye mɔmoane la bieko. Ɔle sua mɔɔ Yizilayɛ belemgbunli kpole bie a zile wiele a.

¹² Na kɛmɔ yɛ nlenya mɔ hanle Nyamenle mɔɔ wɔ anwuma la ɛya la ati, ɔyele bɛ ɔmanle Kyaledianli Babelonia Belemgbunli Nɛbukadenɛza. Na yemɔ yɛɛ ɔzɛkyele Ɛzonlenlɛ Sua ye, na ɔhyele menli ne bie mɔ nuokɛ ɔhɔle Babelonia a.

¹³ Noko mɔɔ Belemgbunli Saelɛse ralile Babelonia ebia ne la, ɛvolɛ ne ala anu, ɔvale mɛla ɔrale kɛ bɛzi Nyamenle Sua ne bieko.

¹⁴ Eza ezukoa nvutuke nee dwɛtɛ fufule ahyɛnze mɔɔ Belemgbunli Nɛbukadenɛza rahwenle vile Gyɛlusalɛm Ɛzonlenlɛ Sua ne anu hɔle ye belemgbunli sua nu ɛkɛ ne la, Saelɛse hwenle bɛ kɔsɔɔti vile Babelɔn awozonle sua ne anu vindele. Belemgbunli Saelɛse vale ninyɛne zɔhane mɔ manle nrenya bie mɔɔ bɛfɛlɛ ye Hyɛhyebazaa mɔɔ ɛnee yeyɛ ye amɛnlado wɔ Dwuda maanzinli nu la,

¹⁵ na ɔzele ye kɛ, “Die ninyɛne ɛhye mɔ na fa kɔgua Ɛzonlenlɛ Sua ne anu wɔ Gyɛlusalɛm, na eza bɛzi Nyamenle Sua ne wɔ ɔ bo zo ne ala.”

¹⁶ Yemɔti Hyɛhyebazaa zɔhane a rawulale Nyamenle Sua ye aze wɔ Gyɛlusalɛm ɛke a, yɛɛ ɔvi mekɛ zɔhane toonwo mɔɔ yeradwu ɛnɛ la yɛtɛgua zolɛ yɛtɛsi sua ye, yɛtɛnyianle yɛtɛwiele fee.’

¹⁷ “Ɛhye ati saa ɔyɛ belemgbunli ɛhulolɛ a, ɛnee ɔmaa bɛnleɛnlea ye ngɛlata ne mɔ mɔɔ wɔ ye ngɛlata ɛzielɛ ɛleka ne mɔ la anu kɛ saa amgba Belemgbunli Saelɛse manle bɛ zɔhane mɛla ne kɛ bɛzi Nyamenle Sua ɛhye mɔɔ wɔ Gyɛlusalɛm ɛke la bieko a. Na akee belemgbunli ɛmaa yɛnwu mɔɔ ɔkulo kɛ yɛyɛ ye wɔ edwɛkɛ ɛhye anwo la.”