Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 9 - BAEBOLO ANZƐƐ BULUKU NWUANZANWUANZA

Nyɛmoa ne mɔ ɛwulɛ

¹ Akee Ɛdɛnkɛma zele Mosisi kɛ, “Kɔ belemgbunli ne ɛkɛ kɔze ye kɛ, ‘Kɛ Ɛdɛnkɛma, Hibuluma Nyamenle ne se la ɛne: Maa me menli ne ɛhɔ, amaa bɛazonle me.

² Ɔluakɛ saa ɛkpo, wɔamaa bɛangɔ na ɛkye bɛ nuokɛ a,

³ Ɛdɛnkɛma asa ɛnlomboɛ ne badɔ bɛ nlankɛ ne mɔ mɔɔ wɔ bɛ ɛya nu, bɛ mgbɔnwɔ, asoaso, afunlumu, mbɔnkye, yɛɛ mboane ne mɔ anwo zo, yeaye ewule yeado bɛ nwo yeamaa bɛawu.

⁴ Ɛdɛnkɛma bava ɛweɛne ado Yizilayɛma nee Yigyibitima nlankɛ ne mɔ avinli, na Yizilayɛma nlankɛ ne mɔ anu ko bɔbɔ ɛnrɛwu.’ ”

⁵ Na Ɛdɛnkɛma hilele mekɛ, ɔse, “Ɛhyema Ɛdɛnkɛma bayɛ ɛhye wɔ azɛlɛ ne azo.”

⁶ Aleɛ hyenle la Ɛdɛnkɛma yɛle ɛhye, ɔmanle Yigyibiti nlankɛ ne mɔ kɔsɔɔti wule, na Yizilayɛma nlankɛ ne mɔ, ɛdwoba ko bɔbɔ anwu.

⁷ Na belemgbunli ne zoanle manle bɛhɔnleanle mɔɔ ɛzi la, na bɛnwunle kɛ Yizilayɛma nlankɛ ne mɔ, ɛdwoba ko bɔbɔ anwu. Noko belemgbunli ne dapele ne yɛle kpole kpalɛ, yeammaa menli ne angɔ.

Nyila

⁸ Akee Ɛdɛnkɛma zele Mosisi nee Aalɔn kɛ, “Bɛvula anyevinli nzonle bɛ sa ngoko na Mosisi ɛkponde bɛ anwomanyunlu wɔ belemgbunli ne anyunlu ɛkɛ.

⁹ Ɔbazande kɛ munlutu kɛnlɛma bie wɔ Yigyibiti azɛlɛ ne kɔsɔɔti azo, na yeamaa nyila anwunwu menli nee nyɛmoa na bɛakpukekpuke bɛayɛ nganlɛ.”

¹⁰ Yemɔti bɛvulale anyevinli nzonle na bɛhɔle belemgbunli ne anyunlu. Mosisi vuandinle nzonle ne anwoma ne anu, na ɔmanle nyila nwunwunle menli nee nyɛmoa na bɛkpukekpukele bɛyɛle nganlɛ.

¹¹ Na nyila ne mɔ ati ngonyiama ne angola Mosisi anyunlu gyinla, ɔluakɛ ɛnee nyila ɛnwunwu bɛ nee Yigyibitima kɔsɔɔti.

¹² Na Ɛdɛnkɛma manle belemgbunli ne ahonle yɛle se, yeandie bɛ edwɛkɛ, kɛmɔ Ɛdɛnkɛma hanle hilele Mosisi ala la.

Ezuawolɛ

¹³ Eza Ɛdɛnkɛma zele Mosisi kɛ, “Dwazo nwonlomɔ mangyee ne kɔ belemgbunli ne anyunlu kɔze ye kɛ, ‘Kɛ Ɛdɛnkɛma, Hibuluma Nyamenle ne se la ɛne: Maa me menli ne ɛhɔ, amaa bɛazonle me.

¹⁴ Ɔluakɛ akee mebava me ndeanlɛ kɔsɔɔti meagua ɛ nwo zo, nee wɔ mgbanyima nee wɔ menli ne anwo zo, amaa wɔanwu kɛ awie biala mɔɔ le kɛ medame la ɛnle azɛlɛ ye azo ɛleka biala.

¹⁵ Ɔluakɛ kɛkala, saa medenrɛ me sa kɛ memaa ewulenzane adɔ wɔ nee wɔ mgbanyima avinli a, anrɛɛ mezɛkye bɛ muala mevi azɛlɛ ye azo.

¹⁶ Na mevavi wɔ, memaa wɔdɛnla ngoane nu kɛ mefa meahile me tumi ne, na wɔakponde me duma wɔ azɛlɛ ye kɔsɔɔti azo.

¹⁷ Noko ɛtɛmemaa ɛ nwo zo ɛtɛkile me menli ne, ɛnrɛmaa bɛnrɛhɔ.

¹⁸ Nea, ɛhyema bekezɛ mebamaa ezuawolɛ mɔɔ sumunli kɛ bɛkyekyele Yigyibiti maanle ne toonwo mɔɔ yeradwu ɛnɛ la bie ɛtɛtɔle ɛlɛ la adɔ.

¹⁹ Yemɔti soa maa bɛhɔyeye wɔ nyɛmoa nee wɔ ninyɛne mɔɔ wɔ ɛya ne mɔ anu la amuala bɛzie azua nu, ɔluakɛ ezuawolɛ badɔ menli nee nyɛmoa mɔɔ wɔ ɛya avule nu na bɛamba sua zo la anwo zo, na bɛawu.’ ”

²⁰ Na awie biala mɔɔ wɔ belemgbunli nee mgbanyima ne mɔ anu na ɔzulole Ɛdɛnkɛma anloa edwɛkɛ ne la, manle ye sonvolɛma nee ye nyɛmoa nriandile hɔle sua bo.

²¹ Bɛdabɛ noko mɔɔ bɛambu Ɛdɛnkɛma edwɛkɛ ne bie la gyakyile bɛ sonvolɛma nee bɛ nyɛmoa wɔ bɛ ɛya avule ne mɔ anu.

²² Na Ɛdɛnkɛma zele Mosisi kɛ, “Tende ɛ sa anwomanyunlu maa ezuawolɛ ɛdɔ Yigyibiti azɛlɛ ye kɔsɔɔti azo ɔgua menli nee nyɛmoa nee aleɛ mɔɔ wɔ ɛbɔ nu la azo.”

²³ Mosisi dendenle ye kpɔma ne anwomanyunlu. Ɛdɛnkɛma manle maanle nu hulule, ezuawolɛ dɔle, na ɛsɛlɛmanye kpakyele vi anwuma penle aze. Na Ɛdɛnkɛma manle

²⁴ ezuawolɛ dɔle, ahumu kpole dule, anwomanyunlu kpale senle vedele ndoɔdoazo, na ezuawolɛ ne dɔle kpole kpalɛ mɔɔ sumunli kɛ Yigyibiti yɛle maanle la bie ɛtɛtɔle ɛlɛ a.

²⁵ Ezuawolɛ ne hanle debie biala mɔɔ wɔ wienyi nu la wɔ Yigyibiti maanle ne kɔsɔɔti anu, menli nee nyɛmoa; ɔhanle aleɛ biala mɔɔ wɔ ɛbɔ nu la, ɔzɛkyele dɔɔnwo.

²⁶ Gohyɛn azɛlɛ zo, ɛleka mɔɔ Yizilayɛma wɔ la yɛɛ ezuawolɛ ne bie andɔ a.

²⁷ Akee belemgbunli zoanle menli manle bɛhɔvɛlɛle Mosisi nee Aalɔn na ɔzele bɛ kɛ, “Meyɛ ɛtane. Ɛdɛnkɛma di benle. Me nee me menli ne yɛdi fɔlɛ.

²⁸ Bɛzɛlɛ Ɛdɛnkɛma bɛmaa maanle nu ɛhululɛ nee ezuawolɛ ɛdɔlɛ ne ɛgyakyi na memaa bɛahɔ; menrɛmaa bɛnrɛdɛnla ɛke bieko.”

²⁹ Mosisi hanle kɛ, “Saa meye me nwo suakpole ye azo a, mebamaa me sa zo meazɛlɛ Ɛdɛnkɛma, na maanle nu ɛhululɛ ne bagyakyi, yɛɛ ezuawolɛ ne ɛnrɛdɔ bieko, amaa wɔanwu kɛ azɛlɛ ye le Ɛdɛnkɛma ɛdeɛ.

³⁰ Na wɔmɔ, ɛ nee wɔ mgbanyima, meze kɛ bɛnzulo Ɛdɛnkɛma Nyamenle ne.”

³¹ Bolɔfodɔ nee baale zɛkyele, ɔluakɛ ɛnee baale ɛtulutulu na bolɔfodɔ ɛlɛwula nya.

³² Na hwiiti anzɛkye, ɔluakɛ bɛnlua bɛ ndɛ la ati bɛanfifi ndɛ.

³³ Yemɔti Mosisi vi belemgbunli ne anwo ɛkɛ hɔle na ɔyele ɔ nwo suakpole ne azo. Ɔdɛlɛle ɔ sa nu ɔzɛlɛle Ɛdɛnkɛma na maanle nu ɛhululɛ ne gyakyile, ezuawolɛ ne gyakyile ɛdɔlɛ, na ezule ɛdɔlɛ bilididi andɔ azɛlɛ ne azo bieko.

³⁴ Belemgbunli ne nwunle kɛ ezule ne nee ezuawolɛ ne nee maanle nu ɛhululɛ ne ɛgyakyi la, ɔyɛle ɛtane bieko, na ɔ nee ye mgbanyima ne mɔ dapele ne akee yɛle kpole.

³⁵ Belemgbunli ne ahonle yɛle se, yemɔti yeammaa Yizilayɛma angɔ, kɛmɔ Ɛdɛnkɛma luale Mosisi anwo zo hanle la.